Read Navajo I TIMOTHY 5 Bible Online

I TIMOTHY 5 - Navajo bible

I TIMOTHY 5

¹Hastóí nilíinii ła' dóóteeh lágo, nidi nizhé'é nilį́ nahalingo néiníkąąhgo bich'į' yáníłti'. Diné ániid nidaakaígíí t'áá ła' bił háíníjéé' nahalingo bich'į' ánít'é.

²Asdzání náás daazlį́į'ii nimá danilį́ nahalingo, áádóó asdzání ániid nidaakaígíí nilah danilį́ nahalingo bich'į' ánít'é, ts'ídá yá'át'éehgo bich'į' ánít'é.

³Sáanii bąąh ádahasdįįdii t'áadoo baa ádahóolyą́'ígíí nił danilį́.

⁴Sáanii bąąh ádahasdįįdii ła' ba'áłchínída, bitsóókéda, binálíkéda hólǫ́ǫgo, éí hooghan haz'ą́ą́dóó áłchíní átsé Diyin God k'ehgo dajiinánígíí nabídazhnitaahgo bídahwiizhdooł'ááł, áko dahashchíinii bik'i ninádadzildzil doo, háálá éí Diyin God bił yá'át'ééh, áádóó bił hóshóonii át'é.

⁵Asdzání t'áá aaníí bąąh áhásdįįdii áádóó t'áadoo bik'i dóldzíłíii éí Diyin God bee bił chohoo'į́, áko t'áá ákwíí tł'éé' áádóó t'áá ákwíí jį́ ná'ookąąhgo sodilzin.

⁶Nidi honeeni t'éí yaa ádeet'áanii azhą́ hináa nidi daaztsą́ągo át'é.

⁷Ts'ídá t'áadoo bee bik'ídahót'ahí da doo biniyé, díí bee bich'į' hahídziih.

⁸Ła'da hak'éí doo baa áhojilyą́ą́góó, índa haghandóó danilíinii íiyisí doo baa áhojilyą́ą́góó, Diyin God bina'nitin yóó'azhdíí'ą́ągo át'é, áko diné doo oodlání nilíinii biláahgo doo yá'át'éehii dzizlį́į'go át'é.

⁹Sáanii bąąh ádahasdįįdii hastą́diindóó nówehjį' binááhai t'éiyá da'oodlání baa ádahalyą́ą doo biniyé bízhi' ádoolnííł, índa bahastiin t'ááłá'í nít'ée'go t'éiyá.

¹⁰Yá'át'éehgo ájoonííł ha'níigo haa hane'go, ha'áłchíní yá'át'éehgo hizniséego, ha'ałk'ee nídaakahígíí bich'į' hoł ílį́įgo, Diyin God bidiyį́į́' bikee' bá tánínádzígis áádóó bich'į' nidahwii'náanii bíká aníjílwo'go, índa naanish yá'ádaat'éehii t'áá ałtso baa nijigháago t'éiyá atah házhi' ádoolnííł.

¹¹Nidi asdzání ániid nidaakaii bąąh ádahasdįįdii doo atah bízhi' ádoolníił da, háálá adáhonooníinii bide ádaat'įįhgo Christ yits'ą́ąjį' tsídahidikeesgo shá'doogeh dahiniizįįh,

¹²áko ádee hadadeesdzí'ígíí t'óó dayiitíihgo, aa hwiinít'įįh ák'ijį' yídaalná.

¹³Áádóó bił dahóyéé' nidahaleeh, áádóó doo t'áá éí t'éiyá da, nidi aseezį́ ádeił'į́įgo índa da'níłtł'ago hootaadaakaigo saad doo yee yádaałti' da doo nít'éé' yę́ę yee yádaałti' nidahaleeh.

¹⁴Éí bąą asdzání ániid nidajikaigo hąąh ádahasdįįdii háni'dii há nááda'iigeh áádóó ha'áłchíní ninádahwiidleeh doo, índa haghan haz'ą́ągi baa ádahojilyą́ą doo, áko nihits'ą́ą́jí danilíinii nichǫ́'íii yee ak'i dahodii'aahii doo bá dahwiizhdooł'aał da nisin.

¹⁵Háálá t'áá íídą́ą́' ła' ats'áhaaskaigo Séítan yikéé' aheeskai.

¹⁶Oodlání jílį́įgo hak'éí ła' bąąh ádahasdįįdgo éí baa ádahojilyą́ą doo, áko da'oodlání áłah nádleehii t'ah yówehgo doo biyéél ánáhojidléeh da doo, nidi bąąh ádahasdįįdii ts'ídá t'áadoo baa ádahólyą́'í daígíí t'éiyá yaa ádahalyą́ą doo.

¹⁷Hastóí da'oodlání yá aląąjį' naazíinii yá'át'éehgo bídahólníihii ahą́ą́h nániiláago hoł danilį́į dooígíí yą́ą́h danilį́į doo; hane' yá'át'éehii yaa dahalne'go índa nida'nitingo yindaalnishígíí íiyisí ákódajił'į́į doo.

¹⁸Háálá Diyin God bizaad bee ak'e'ashchíinii ání, Béégashii éí tł'oh naadą́ą́' haił'éesgo t'áadoo bíchį́į́h bąąh nida'sooł'ání. Áádóó, łahgo ánáádí'ní, Naalnishí bich'į' nahalyéii yą́ą́h nilį́.

¹⁹Hastóí da'oodlání aląąjį' naazíinii ła' bee bik'ihodiit'áanii t'áadoo yíníłts'ą́'í, t'áá hazhó'ó oo'íinii naakida, táa'da dahalne'go t'éiyá baa nídíít'įįł.

²⁰Doo da'diits'a'góó bąąhági ádaaníiłii éí da'oodlání t'áá ałtso binááł dadidííteh, áko da'oodlání bąąhági ádadooníiłgi bik'ee bił daayée' doo.

²¹Diyin God índa [Bóhólníihii] Jesus Christ áádóó diyingo nidaal'a'í bitah dahaasdlá'ígíí binááł ánidishní, T'áadoo diné ał'ohgo baa nitsíníkeesígo, índa t'áadoo ła' bich'ijí nílínígo bee hahásdzí'ígíí baa naniná.

²²Diné ła' Bóhólníihii yá naal'a' doo biniyé bits'áltį́įgo bik'i dah didíílnihgi t'áadoo bich'į' tsį́į́ł nílíní áádóó diné bibąąhági ádaat'éii t'áadoo bił ałts'ą́ą́' da'nółk'iizí; t'áadoo bee nik'íhót'ahígóó í'díínílzin.

²³Kodóó t'áadoo tó t'éiyá nidlání, nidi nitsą́ądi áhoot'éhígíí biniyé, índa t'áá ahą́ą́h nitah doo hats'íid daígíí bąą wáin áłch'į́į́dígo choiníł'į́.

²⁴Ła' diné bibąąhági ádaat'éii t'áadoo bahat'aadí daat'į́, áko éí ánihwiit'aahjį' dabí'éésh, nidi ła' bibąąhági ádaat'éii doo hah deiltséeh da.

²⁵T'áá ákót'éego ałdó' yá'át'éehgo ó'oo'níiłii t'áadoo bahat'aadí daat'į́, azhą́ doo t'áadoo bahat'aadí ákódaat'į́į da nidi, doo nazhnił'in le' át'ée da.