Read Navajo I TIMOTHY 6 Bible Online

I TIMOTHY 6 - Navajo bible

I TIMOTHY 6

¹Diyin God bízhi' áádóó bina'nitin doo baa'ihgo bá ha'doodzih da biniyé, da'oodlání naalte' danilíinii t'áá ałtso binanit'a'í t'áá ałtsojį' ił ídlį́ yą́ą́h danilį́įgo ádayósin doo.

²Hananit'a'í da'oodlání danilį́įgo éí oodlą́ bee bił ałk'isóó dajílį́įgo bąą t'áadoo doo ił ílį́ bee baa nitsídadzikeesí doo, nidi t'ah aláhídi yá'át'éehgo bá nidajil'a' doo, háálá bá nidajil'a'go bíká anídajilwo'ii éí da'oodlání danilį́, índa ayóó'ádaó'ní. Díí bee na'nítin índa bich'į' íł'á.

³Diné ła'da łahgo át'éego nazh'nitinii áádóó nihiBóhólníihii Jesus Christ bizaad t'áá ákogi át'éii índa Diyin God k'ehgo iiná bína'niltin doo hoł aaníinii,

⁴éí áshohódli' hade át'é, áko t'áadoo hoł bééhóziní da, nidi na'ahíyáti' índa saad baa ałgha'dit'ááh t'éiyá bíchą́yízhdéelni', éí bits'ą́ą́dóó ooch'į́į́d, ahiní'diiltłáád, t'áá ádzaagóó aa hane', índa nichxǫ́'ógo ayahoolniih nidahwiileeh.

⁵Áko diné bíni' dááchxǫ'go, áádóó t'áá aaníinii baa náádahaasdláa'ii bitahgi saad ét'ááh náádleeł. Éí Diyin God k'ehgo iiná bee a'ídeeł át'é danízin. [Ákódaat'éhígíí bits'ąą ádaa áhólyą́.]

⁶T'áá aaníí Diyin God k'ehgo iiná bee ił yá'áhoot'éehgo iinánígíí bee a'nídéél át'é.

⁷Háálá nahasdzáán bikáa'gi t'áadoo le'é t'áágééd dahosiidlį́į́', áádóó nahasdzáán bikáá'dóó dah nídiidzáago t'áadoo dah didiilyéłí da.

⁸Áko ch'iyáán índa éé' nihee dahólǫ́ǫgo haa'íshą' éidíígíí bee nihił yá'ádahoot'éeh doo.

⁹Nidi diné adeesht'įįł danízinii na'óhonitaah łoh nahalingo yiih hindééh, doo hódzą́ą́góó nitsáhákees áádóó bił bidáádahaníinii atída'ale'ii yiih hindééh, áko éí diné bił bidáádahaníinii bidoołchǫǫł áádóó ábidoołdįįł.

¹⁰Háálá béeso bíchą́hwíídéeni' éí doo yá'ádaat'éehii t'áá ałtso yehétł'óól nilį́; ła' éí yidádanoolníigo na'nitin woodláanii yits'ą́ąjį' aheeskai, áko yínííł t'óó ahayóí bijéí yee ahidayiishíísh.

¹¹Nidi ni, Diyin God bíí' nílíinii, díí bits'ąą ádaa áhólyą́, áádóó ts'ídá t'áá ákogi ánít'éego, diyin k'ehgo hinínáago, Diyin God yinídlą́ągo ba'íínílí, ayóó'í'ííní'níigo, yéego ha'íínílníigo índa diné a'ohgo í'dólzinii nílį́įgo wołí bee ánít'į́.

¹²Yinídlą́ągo baa dzíínílíii yéego bee nanibaahgo bich'ą́ą́h sínízį́. Diné lą'í dabinááł yá'át'éehgo ádee hadíínídzíí' yę́ędą́ą́' iiná doo ninít'i'ii bii'jį' níká áhodoo'niid yę́ę yéego yiiłtsóód.

¹³Diyin God t'áá ałtsoní hináago áyósinii, índa Pántiyas Páílat bidááhdóó Christ Jesus yá'át'éehgo ádaa hadoodzíi'ii binááł ánidishní,

¹⁴NihiBóhólníihii Jesus Christ bidi'dooltséełjį' díí bik'eh ó'oo'níiłii yá'át'éehgo bik'eh dahonoł'į́įgo, t'áadoo t'óó baa yáhásingo íínísiní.

¹⁵Éí baa hoolzhiizhgo Jesus yit'íní áhodi'doolnííł, éí haa ha'niih índa t'áá hó t'éiyá t'áá ałtsoní biNanit'a'í jílį́, áádóó aláahgo naat'áanii danilíinii biNanit'a'í jílį́, índa bídahólníihii bee Bóhólníihii jílį́.

¹⁶T'áá hó t'éiyá doo daatsaahii jílį́, adinídíín doo bit'ááh jóya' át'éii bii' kééhojit'į́, éí diné t'ah doo ła' hoołtséeh da, índa doo jooltsééł át'ée da. Éí haa ha'niih doo, índa hool'áágóó hóhólníih doo! T'áá ákót'ée doo.

¹⁷Diné éí naalye'é yee da'at'íinii kóbidiníigo bich'į' hahídziih, Daoht'íinii t'áadoo bee ádaa dadzíínóhdlíhí, naalye'é áádįįłii t'áadoo baa dadzíínóhłíhí, nidi Diyin God [hináanii] bił hadlee'go t'áá ałtsoní bee ákideiidláago yee nihaa áhályáanii baa dadzíínóhłí.

¹⁸Dajiinohba', yá'át'éehgo ó'oo'nííł lą'ígo baa nidaahkai, áádóó nihił dahadlee'go t'áá k'adę́ę áká oojéé' áda'díí'nółzin, dabidiní.

¹⁹Kót'éego náás hoolzhishgóó nizhónígo atł'ááh nástł'inii ádá ádazhdoolnííł, áko éí bee t'áá aaníí iináanii deizdoołtsoł.

²⁰Timothy nílíinii, bee na'ahoosdlí'ígíí baa áhólyą́. Diyin God doo dílzingóó niyá'áhoditi' índa ił ééhózin doo t'áá aaníí ádaat'éii bee ats'ą́ąjį' ashjéé' ha'nínígíí t'áadoo baa nánít'íní.

²¹Háálá ła' éí dayótą'go bi'oodlą' yóó'adeideez'ą́ągo nida'iisíi'go át'é. Ajooba' nihił hólǫ́ǫ doo.