Read Navajo II TIMOTHY 1 Bible Online

II TIMOTHY 1 - Navajo bible

II TIMOTHY 1

¹Shí Paul, Diyin God íinízinii binahjį' Jesus Christ yá yil'aadii nishłíinii, Christ Jesus bee iiná bee nihoot'áanii bik'ehgo hashne' dooleełgo shi'dool'aad.

²Timothy shiye' ayóó'óósh'níinii bich'į' naaltsoos áshłééh: Diyin God aTaa' áádóó Christ Jesus nihiBóhólníihii bibee ajooba' áádóó bibee aa a'ááh hasinii índa bibee ach'į' hózhǫ́ náhásdlį́į'ii yee nik'ijidlíi doo.

³T'áá dashizhé'é yę́ę ádáát'įįdígi át'éego t'áá ákogi ánísht'éego bee ádaa ákonisdzingo Diyin God bá choosh'į́. Éí bich'į' ahééh nisingo t'áá yoołkááł bik'eh ná sodiszingo nénáshniih.

⁴Ninák'eeshto' bénáshniihgo nándzoołtse' laanaa nisin, áko éí t'áá íiyisí baa shił hózhǫ́ǫ doo biniyé.

⁵T'áá aaníí iinídlą́ągo bee nééhéshnííh. Nimá sání Lois áádóó nimá Yónis átsé t'áá aaníí oodlą́ą́ nít'éé', índa ni ałdó' k'ad t'áá aaníí iinídlą́ągo shił bééhózin.

⁶Éí bąą sodizin bee nik'i dah díshnii'dą́ą́' Diyin God yee nik'ijisdli'go niih yiyííláhígíí nídiiłtłáadgo yéego diltłi'go íínísin dooleełígíí bééniyiishnííh.

⁷Háálá Diyin God hasti'go nitsáhákees doo nihaidiní'ą́ą da, nidi bee adziil, áádóó ayóó'ó'ó'ní, índa ádaa áháyą́ągo nitsáhákees nihaidiní'ą́.

⁸Éí bąą nihiBóhólníihii bá hólne'ígíí t'áadoo baa yáníníziní, índa shí t'áá éí biniinaa awáalyaaí nishłíinii ałdó' t'áadoo shaa yáníníziní, nidi Diyin God bibee adziilii ba'íínílíigo łahdóó hane' yá'át'éehii bá ti'hoyínííh.

⁹Diyin God yisdánihijíínil, áádóó doo t'áá nihí baa nidasiikai bik'ehgo da, nidi t'áá hó binahodziz'áanii áádóó hwe'ajooba' bik'ehgo diyingo dahinii'náa doo biniyé nihíká ázhdííniid. Éí t'ah doo hahalzhíísh yę́ędą́ą́' Christ Jesus bee nihaazhdiní'ą́.

¹⁰Áádóó binahodziz'áanii índa hwe'ajooba' éí Yisdánihiiníiłii Jesus Christ níyáhígíí bee k'ad nihich'į' bééhózingo ájiilaa. Christ éí aniné bibee adziilii k'éé'ayííłchǫ', áádóó iiná índa doo da'dootsaałii hane' yá'át'éehii yee bééhózíní áyiilaa.

¹¹Díí hane' yá'át'éehii yaa halne'ii áádóó yee yil'aadii índa yee na'nitinii nishłį́į doo biniyé doo Jew dine'é danilíinii bich'į' nishi'deeltį́,

¹²áko éí bąą yéego ti'hooshnííh. Nidi doo baa yánísin da, háálá hwiisisdląądii hwééhasin, áko beiníłką́ąjį' bee ha'iisélí'ígíí baa áhojilyą́ągo bízhneel'ą́ągo shił bééhózin.

¹³Oodlą' índa ayóó'ó'ó'ní Christ Jesus bits'ą́ą́dę́ę́' hólóonii bee saad t'áá ákogi át'éii bínaniníłtą́ą'ii yínítą'.

¹⁴Éí t'áá aaníinii bee na'ahoosdlíi'ii Níłch'i Diyinii nihii' dahólóonii bee baa áhólyą́.

¹⁵Éízhadi da'oodlání kéédahat'íinii shits'ádahaaskaigo nił bééhózin, Fijélas áádóó Hermájiiniiz nidi, atah shits'ání'áázh.

¹⁶Anesíforas ha'áłchíní t'áá bił Bóhólníihii haa a'ááh nízin doo, háálá hó t'áá ahą́ą́h shik'i náhojiłtah nít'éé'. Awáalyaaí nishłínígíí t'áadoo baa yázniizį́į' da,

¹⁷nidi Romegi jiníyá yę́ędą́ą́' t'áá íiyisí bízhneedlį́įgo hashizneeztą́ą'go shik'ízhníyá.

¹⁸Ánihwiit'aah beiníłką́ądi Bóhólníihii haa a'ááh dínóozįįł! Jó, Éfesasgi nijil'a'go t'áá ałtsoní bee shíká aníjílwo'ii ałdó' nił bééhózin.