Read Navajo II TIMOTHY 3 Bible Online

II TIMOTHY 3 - Navajo bible

II TIMOTHY 3

¹Díí baa ákonínízin doo! Nihoogháahjį' yoołkáałgo yéego ach'į' nahwii'náa doo.

²Háálá diné ayóó'ádadó'níi doo, béeso yíchą́deídéelni' doo, ádaa daha'niih doo, be'áshodahódli' doo, bizadahóchį' doo, bishchíinii doo yik'eh dahół'į́į da doo, doo ahééh danízin da doo, doo bił dahodiyin da doo,

³doo ayóó'áda'ó'níi da doo, doo ach'į' bá nídahójǫǫh ádaat'ée da doo, t'áá ádzaagóó aa nidahalne' doo, na'ageh yee tsi'naaldeeh doo, báádahadzid doo, yá'ádaat'éehii deijoołáa doo,

⁴yóó'ada'ahidiit'aah doo, t'áá bizááká nidaakai doo, ayóó ánísht'é danízin doo, Diyin God ayóó'ádayó'níi doo yę́ęgi honeenida yíchą́dayídéelni' doo,

⁵Diyin God k'ehgo dahináanii nidahalin nidi diyin k'ehgo iiná bibee adziil doo deinízin da doo. Diné ákódaat'éhígíí bits'ąą ádaa áhólyą́.

⁶Éí bitahdóó asdzání bąąhági át'éii bii' daahéełii índa adáhonooní t'áá da'níł'ąą ádaat'éii nidabini'aahii dabighangóó diné ła' bił yah anídaakahgo nidabiłnééh.

⁷Éí na'nitin t'áá bóhólníhígíí dayíists'ą́ą'go yídahooł'aah, nidi na'nitin t'áá aaníinii ts'ídá doo bił béédahoozį́į́' ádaat'ée da.

⁸Diné éí Jániiz índa Jámbriiz wolyéii Mózes yik'ijį' naasdzil yę́ęgi át'éego díí diné ałdó' t'áá aaníinii yik'ijį' nidaaldzil, diné nichxǫ́'ógo nitsídaakeesii, áádóó bida'oodlą' doo ákót'éégóó biniinaa Diyin God doo binízinii danilį́.

⁹Éí Jániiz índa Jámbriiz bidoo'áháyą' bee bééhózin yę́ęgi át'éego éí diné bidoo'ádahayą' diné t'áá ałtso bił béédahózin doo, áko t'áadoo ła'deidoolíłí da.

¹⁰Nidi ni éí shina'nitin nił bééhózin, ááshníiłii, índa biniyé hinishnáanii, she'oodlą' át'éegi, nízaadgóó ha'ííníshníigi, shibee ayóó'ó'ó'níinii, shiha'ahóní át'éegi,

¹¹shich'į' naho'diilnáago, ti'hwiisénii'ii ałdó' nił bééhózin. Ántiyakgi áádóó Aikóniyamgi índa Lístragi atíshi'dool'įįd, índa atíshi'dil'į́įgo bich'į' ha'iisisniidii baa ákoninizį́į́'! Nidi éí t'áá ałtso bits'ąą Bóhólníihii yisdáshííłtį́.

¹²Christ Jesus bił łá'í nishłį́įgo Diyin God k'ehgo iiná bee hinishnáa dooleeł daznízinii t'áá ádzíłtso atídaho'dil'į́į doo,

¹³nidi diné doo yá'ádaashóonii índa yóó'ada'nii'áahii binda'adlo'go índa bida'deesdlo'go t'óó yówehda bąąhági ádaaníił dooleeł.

¹⁴Nidi ni, bíhwiinił'ą́'ígíí índa yisínídląądígíí bidziilgo bee sínízį́. Háálá bits'ą́ą́dóó bíhwiinił'ą́ą'ii nił bééhózin,

¹⁵áádóó t'áá awéé' nílį́į́dę́ę́' Diyin God bizaad bee ak'eda'ashchíinii nił bééhoozinígíí bee aho'ni'niyąądgo éí Christ Jesus yinídlánígíí bee yisdádíínáałgi yíneel'ą́ągo yínaniniłtin.

¹⁶Diyin God bizaad bee ak'e'ashchíinii t'áá ałtso Diyin God ił halne'go bee ak'eda'ashchį́, éí na'nitin biniyé, adidooteh biniyé, k'éhézdon ninádoodlóós biniyé, índa t'áá ákogi é'ét'é bóhoo'aah biniyé choo'į́,

¹⁷áko Diyin God bá diné chojoo'íinii doo bee hach'į' anáhóót'i'í da doo, índa t'áá ałtsojį' yá'át'ééh ájooníił doo biniyé hasht'e'ázdólzin doo.