Read Navajo II TIMOTHY 4 Bible Online

II TIMOTHY 4 - Navajo bible

II TIMOTHY 4

¹Diyin God áádóó Bóhólníihii Jesus Christ, éí dahináanii índa daneeznáanii yaa nídóot'įįłii binááł, áádóó Jesus yidooltséłígíí índa bee bóhólníihgo bił haz'áanii binahjį' ándishní,

²Hane' yá'át'éehii baa nahólne', ashja'ósingo índa doo ashja'ósin da nidi haleebee ánít'į́; bił ííshjání ádahóle', adíteh, ná'iinikąąh, t'áá ałtsojį' ha'íínílníigo na'nítin.

³Háálá diné t'áá ákogi át'éego na'nitin doo yich'į' hada'ólníi da dooleełígíí baa dahodoolzhish, nidi t'áá bí deinízinígíí t'éiyá dayíists'ą́ą'go bił yá'ádaat'éeh doo, t'áá bí yidádanoolníinii bik'ehgo nida'nitinii t'éiyá yíchą́deídéelni' doo.

⁴Na'nitin t'áá aaníinii dayíists'ą́ą'ii yits'ádahidookah, áádóó hane' t'óó ádaalyaii yich'į' yóó'adahidookah.

⁵Nidi ni, t'áá ałtsojį' ádaa áhólyą́; ti'hoo'nííh bich'į' ha'íínílní, hane' yá'át'éehii baa nahólne', ni'dool'aadígíí bi'ílééh.

⁶Nááshidi'yoolnihígíí koshídę́ę́' hoolzhish; dadeestsaałii baa hoolzhiizh.

⁷T'áá shizááká nisébaa', ałtso yiishtee', na'nitin woodláanii ts'ídá t'áá ákót'éego íínísingo ahoolzhiizh.

⁸K'ad ts'ídá t'áá ákogi é'ét'ééjí naat'á ch'ah shá hasht'e'niit'ą́, éí Bóhólníihii t'áá bí ts'ídá t'áá ákogi ááníiłgo ánihwii'aahii jílíinii hainíłką́ądi shaazhdoo'ááł, nidi doo t'áá shí t'éiyá da, hodidooltsééł biniyé ayóó'ádahó'níigo háká dadéez'į́į'ii ałdó' t'áá ałtso bitaazhdoonih.

⁹T'áá tsį́įłgo shaa díínáałgo haleebee bíká ánít'į́.

¹⁰Háálá Díímas, díí k'ad nihokáá' bił nidahazt'i'ii ayóó'áyó'níigo bąą yóó'ashidíí'ą́ągo Thesalonáíkagóó ííyá. Kréskens éí Galéíshiyagóó ííyá, Táítas éí Dalméíshagóó ííyá.

¹¹T'áá hazhó'ó Luke t'éiyá bił séké. Mark baa díínáałgo áádę́ę́' bił díí'ash, háálá shá naal'a'go t'áá íiyisí choo'į́.

¹²Tíkikas éí Éfesasgóó ííł'a'.

¹³Trówasdi Kárpas ba'ałk'ee éénééz niníłtsoozígíí áádę́ę́' díníyáago yíłtsos doo, naaltsoos ałdó', akágí bee ádaalyaago bik'eda'ashchíinii éí íiyisí yíjih doo.

¹⁴Alezáander béésh łichí'ii yitsidii lą'ígóó doo ákǫ́ǫ́ áshííł'įįd da; baa nijiyáhígíí bik'ehgo Bóhólníihii k'ééhodidoodlííł.

¹⁵Éí bits'ąą ádaa áhólyą́, háálá t'áá íiyisí bee nida'niitinii yik'ijį' naaldzil.

¹⁶Átsé shaa hwiiníst'įįd yę́ędą́ą́' t'áadoo ła' shik'íyádeesti'í da, nidi t'áá ałtso yóó'adasideez'ą́. T'ah nít'éé' lá Diyin God t'áadoo yee bik'íház'ah da łeh [dishníigo bá sodiszin].

¹⁷Nidi Bóhólníihii shíighahgi yiizį'go t'áadoo anáhóót'i'í hane' yá'át'éehii baa hashne'go, doo Jew dine'é danilíinii t'áá ałtso deididoots'į́į́ł biniyé shidziilgo áshiilaa, áádóó náshdóítsoh bitsiijį' daditł'ooígíí bizéé'dóó hááshi'dooltį́.

¹⁸Doo yá'ádaashóonii t'áá ałtso bits'ą́ąjį' Bóhólníihii yisdáshiiłteehgo yá'ąąshdi t'áá bí bee bóhólníihgo bił haz'ą́ąjį' shił yah adoo'ash. Éí hool'áágóó ahóyéel'áágóó baa ha'niih le'. T'áá ákót'ée doo.

¹⁹Príska áádóó Ákwila shá k'é bijiniih, índa Anesíforas bighan haz'ą́ą́dóó danilíinii shá k'é bijiniih.

²⁰Iirástas t'ahdii Kórinthdi naagháa ni'; Trófimas éí Mailíítasdi daatsaahgo bits'ą́ą́' dah diiyáa ni'.

²¹Haleebee ánít'į́įgo t'áadoo i'niiháhí shaa díínááł. Yobúlas áádóó Púdenz índa Láínas áádóó Kládiya índa nihik'isóó danilíinii t'áá ałtso k'é daniłní.

²²Nii' sizíinii Bóhólníihii Jesus Christ bił hólǫ́ǫ doo. Ajooba' nihił hólǫ́ǫ doo. [T'áá ákót'ée doo.]