Read Navajo TITUS 2 Bible Online

TITUS 2 - Navajo bible

TITUS 2

¹Nidi ni, na'nitin t'áá ákóne' át'éii ts'ídá beełt'éego bee na'nítin.

²Diné wónáás daazlį́į'ii kódabidiní, Hazhó'ó nitsídaahkees, t'áadoo yíní ádahodołdiní, hazhó'ó ádaa ádahołyą́, índa dziilí bee da'iinohdlą́, ayóó'áda'íínóh'ní, índa nízaadgóó hada'íínółní.

³Asdzání wónáás daazlį́į'ii ałdó' nanítingo kódabidiní, T'áá ałtsojį' dahodíínóhsin, t'áadoo t'áá ádzaagóó aa nidahołne'í, wáin t'áadoo bee tsi'nidaahkaí, índa yá'ádaat'éehii bee nida'nohtin.

⁴Asdzání ániid nidajikaii hadahastiin índa hada'áłchíní ayóó'ádajó'ní dooleełgi éí asdzání wónáás daazlį́į'ii yee nidahonitin doo,

⁵áádóó dahonohsą́, dahodíínóhsin, nihighan baa ádahołyą́, yá'át'éhígi ádanoht'éego, índa nihadahastiin bídahwíínółnííh, dahałníi doo. Díí bida'jił'į́įgo Diyin God bizaad doo nichxǫ́'ógo bá ha'doodzih da.

⁶T'áá ákót'éego ałdó' diné ániid nidaakaii, Hazhó'ó ádaa ádahołyą́, dabidiníigo baa nídeinikąąh.

⁷T'áá ni ałdó' t'áá ałtsojį' yá'át'éehgo ááníłígíí éí da'oodlání yik'ehgo dayíkáah dooleełgo bee yit'íní í'díínílzin, t'áadoo baa niyá'áhodílti'í, nidi t'áá aaníígóó na'nítin.

⁸Saad t'áá ákóne' át'éii t'áadoo bee bik'íhót'ahígóó bee yáníłti', áko t'áá háiida nihik'ijį' nilíinii doo nichxǫ́'ógo nihá hadoodzih da, nidi yaa yádínóozįįł.

⁹Naalte' danilíinii kódabidiní, Nihinanit'a'í bídahwíínółnííh, índa t'áá ałtsojį' bił dahonohshǫ́. T'áadoo bich'į' saad dahonoł'íní,

¹⁰índa t'áadoo bee da'noh'įįhí, nidi t'áá ałtsojį' nihada'ahódlíigo áda'díínółzingo t'áá ałtsojį' ádaahníłígíí bee Diyin God Yisdánihiiníiłii bee na'nitinii diné bił danilį́įgo ádayósin doo.

¹¹Háálá diné t'áá ałtso yisdéidiyoonił biniyé Diyin God bibee ajooba' yee nihich'į' yit'íní í'diilyaa.

¹²Áko díí yee nanihinitin, díí nihokáa'gi doo Diyin God k'ehgo iináanii índa ts'ísee k'ehgo adáhonooníinii yóó'adahidiit'aah, áádóó hazhó'ó ádaa ádahwiilyą́ągo ts'ídá t'áá ákogi át'éego índa Diyin God k'ehgo dahinii'náago ánihósingo

¹³baa hózhǫ́ǫgo nayíníidlíii bíká dadíníit'į́į́', éí nihiDiyin God ayóó át'éii áádóó Yisdánihiiníiłii Jesus Christ nilíinii bee bi'oh hodidilyéehii yidooltséłígíí bíká dadíníit'į́į' doogo yínanihiniłtin.

¹⁴Jó, t'áá éí nida'iyiilzííh t'áá ałtso bii'dóó náánihidiyoołnih, índa bąąhági ádaat'éii nihąąh ádingo ánihidoolííł, áádóó t'áá bí bidine'é daniidlį́įgo yá'át'éehgo ádahooníiłii t'áá íiyisí bídaniidlį́įgo baa nideiikai doo biniyé nihá niná'ádeet'ą́.

¹⁵Díí t'áá ałtso bee na'nítin. T'áá ałtsojį' nóhólníihgo chánah ádanile' índa adítehgo bich'į' yáníłti'. Diné t'áá ałtsojį' bił danílį́įgo í'díínílzin.