Read Navajo TITUS 3 Bible Online

TITUS 3 - Navajo bible

TITUS 3

¹Oodlání danilíinii díí béédabiyíłnííh: naat'áanii danilínígíí índa bídahólníhígíí bídahojółníih doo, bik'eh dahojíł'į́į doo, t'áá ałtsojį' yá'át'ééh ó'oo'níiłii bee hasht'e'ádazhdólzin doo,

²áádóó t'áadoo diné ła' nichxǫ́'ógo baa yádajiłti'í doo, t'áadoo saad ahídajit'áhí doo, nidi ha'át'e' ádaadin doo, índa t'áá ałtsojį' diné t'áá ałtso joosánígo bił dajílį́į doo.

³Háálá nihí ałdó' łah doo dahoniidzą́ą da nít'éé', doo ak'eh dahoniil'į́į da nít'éé', yóó'adanihidi'niit'ááh nít'éé'. Adáhonooníinii índa honeeni ał'ąą ádaat'éii binaalte' daniidlį́į́ nít'éé'. Áká nideiit'áago índa da'iilch'į́įdgo, nihik'eda'diniihgo índa ak'edadinii'niihgo nihídayéełkaah nít'éé'.

⁴Nidi Diyin God Yisdánihiiníiłii diné bich'į' yee jooba'ii índa yee ayóó'ó'ó'níinii yit'íní silį́į'go

⁵yisdánihíínil. T'áá nihí ts'ídá t'áá ákogi át'éego ádeiidzaii binahjį' éí dooda, nidi t'áá bí nihaa a'ááh niizį́į'go yisdánihíínil, náádanihi'dizhchį́įgo táádanihizgiz, índa Níłch'i Diyinii bee iiná ániidíii nihiih náyoodlá.

⁶Éí Jesus Christ Yisdánihiiníiłii bee łą́ągo nihiih yiyííł'a',

⁷áko yee jooba'ii bee ts'ídá t'áá ákogi ádaniit'éego nihá haadzíi'go iiná doo ninít'i'ii bíká nihił chohoo'ínígíí nihíí' dooleeł.

⁸Ákóhodoo'niidii éí t'áá aaníí, áádóó Diyin God dayoosdląądii ts'ídá yá'át'ééh góne' ádaaníił doo biniyé díí bee hahásdzí'ígíí bich'į' íł'áago yéego bee na'nítin doo nósh'ní. Díidí t'áá íiyisí diné bá yá'ádaat'ééh áádóó chodao'íinii ádaat'é.

⁹Nidi doo áháyą́ą́góó na'ahíyá'áti', áádóó da'ahílchíihii baa dahane'ii, áádóó ahiní'diiltłáád, índa bee haz'áanii Mózes baa deet'áanii biniinaa ałgha'dit'ááh t'áadoo atah baa nanináhí. Éí doo chodao'į́į da índa t'áadoo nídanidlíní da.

¹⁰Diné ła' ałts'á'áldahgo ída'ale'ii, t'ááłáhídi éí doodaii' naakidida, T'áadoo ánít'íní, nábididíí'niiłgo índa t'áadoo baa nánít'íní doo.

¹¹Háálá nił bééhózingo diné ákót'éii honít'i'ii yits'áníyáago ádił ni'iisííh índa t'áá bí bibąąhági át'éii yee ádá nihoot'ą́.

¹²Ártemas éí doodaléi' Tíkikas nich'į' ííł'a'go, t'áá ha'át'éhígoda Nikápolisdi shaa díínááł, háálá ákwe'é shidoohah nisin.

¹³Zíínas, bee haz'áanii yína'niłtinii, índa Apálas, t'áá ha'át'íhída doo yídin nilį́į́góó ádíílíiłgo dah náádidoot'ash.

¹⁴Índa bíni'dii da'oodlání aadi kéédahat'ínígíí yá'át'ééh góne' ádaaníił dooleełígíí yídahwiidooł'ááł, áko t'áá íiyisí anídahazt'i'gi chodao'į́į doo, áko doo t'áadoo biniyéhígóó dahináa da dooleeł.

¹⁵Bił naháshtánígíí t'áá ałtso k'é daniłní. Oodlą' bee ayóó'ádanihó'níinii nihá k'é dabijiniih. T'áá ánółtso ajooba' nihił hólǫ́ǫ doo. T'áá ákót'ée doo.