Read Navajo HEBREWS 10 Bible Online

HEBREWS 10 - Navajo bible

HEBREWS 10

¹Bee haz'áanii éí yá'át'éehii hodooleełígíí doo bił aheełt'ée da, nidi t'óó bichaha'oh át'é. Éí biniinaa Diyin God yich'į' nidahałáa dooleełgo bikáá' náá'iiniihí yich'į' deíkáhígíí t'áá nináháhááh bik'eh t'áá áłahjį' t'ááłáhígi át'éego náádayiiłniihígíí binahjį' bee haz'áanii ts'ídá doo hadaałt'é ádabidoolíił da.

²Jó, náádayiiłniihígíí hadaałt'é ádabiilaago éí ádił nida'iiszíi'ii doo binááda'diił'áa da doo nít'éé', áko náádayiiłniih nít'ée'ii ts'ídá doo náádayiiłniih da doo nít'éé'.

³Nidi t'áá nináháhááh bik'eh díí náádahaniihii éí ádił nida'iiszíi'ii t'óó yéédabiyiiłníihii át'é.

⁴Háálá dóola bidił, doodaii' tł'ízí bidił éí bąąhági át'éii doo ąąh tááyógis át'ée da.

⁵Ákót'é bąą nahasdzáán bikáa'jį' Christ yigááł yę́ędą́ą́' Diyin God ííłní: Naaztseedgo nááhániihii índa t'áadoo le'é náádahaniihii náádayiiłniihígíí doo nínízin da, nidi shits'íís hodooleełgo shá hasht'einilaa.

⁶Didlidgo náádahaniihii índa bąąhági át'éii biniyé náádahaniihii náádayiiłniihígíí doo baa nił hóózhǫǫd da.

⁷Áko ádííniid, Diyin God nílíinii, jó'akon, t'áá naaltsoos biyi' shee bee ak'e'ashchį́įgo bee si'ánígi át'éego, íinínízinii baa nideeshaał biniyé níyá.

⁸Átsé kót'éego yee haadzíí', Naaztseedgo nááhániihii áádóó t'áadoo le'é náádahaniihii, áádóó didlidgo náádahaniihii índa bąąhági át'éii biniyé náádahaniihii náádayiiłniihígíí éí doo ninizį́į' da, doo baa nił hóózhǫǫd da. Éidíígíí bee haz'áanii bik'ehgo náádahaniihii ádaat'ée nidi ání.

⁹Áádóó kót'éego yee hanáánáádzíí', Jó'akon, Diyin God íinínízinii baa nideeshaał biniyé níyá. Áko Diyin God átséédą́ą́' náádahaniih nít'ée'ii nahjį' kóyiilaago éí náádahaniihii bitsásk'ehgi Christ nááhaaznii'.

¹⁰Áko éí Diyin God íinízinii bik'ehgo t'ááłáhídiígíí ałtso ła'yiyiilaago Jesus Christ t'áá bí bits'íís nááyiisnii'ígíí bee dadiniigingo ádanihi'diilyaa.

¹¹Nááda'iiłniihii t'ááłá'í nítínígo t'áá ákwíí jį́ náádahaniihii t'ááłáhígi át'éego náádayiiłniihgo binaanish danilį́įgo yich'į' naazį́, nidi éí ádił ni'iidzííh doo nahjį' kwíyólééh át'ée da.

¹²Nidi Christ t'ááłáhídi náá'ádiisnii'ígíí éí ádił ni'iidzííh biniyé hool'áágóó náá'ádiisnii', áádóó índa Diyin God binish'náájígo dah neezdá.

¹³Áko Diyin God éí hweda'ana'í bik'i jidées'eezgo áhoolaajį' nijólí.

¹⁴Jó, t'ááłáhídi náá'ázdiisnii'ii bee diné dadiyingo ádajiilaaígíí éí hool'áágóó doo bee bich'į' anáhóót'i'góó ájiilaa.

¹⁵Áádóó Níłch'i Diyinii t'áá bí ałdó' kót'éego nihił halne'. Áłtsé ání:

¹⁶Éí yoołkáłígíí adayiiską́ą́dóó bik'ijį' díí bee aha'deet'ą́ nilíinii Ízrel dine'é bee bił ahadi'deesht'ááł, ní Bóhólníihii: Bee hoséł'áanii dabijéí biih dadeeshłééł, áádóó bintsíkees biyi'di bee bik'eda'deeshchííł.

¹⁷Áádóó índa ánáádí'ní, Bibąąhági ádaat'éii índa doo ákwii ádaadzaa yę́ę doo bénáshniih da doo.

¹⁸Áko ádił nida'dziisdzí'ígíí t'áá íídą́ą́' há yóó'adoot'ą́ągo nínáá'iiniih dooleełígíí k'ad ádin.

¹⁹Éí bąą shik'isóó, Jesus nihá daaztsą́ągo bidił deezna'ígíí bee ts'ídá aláahgo hodiyingo haz'ą́ą́ góne' t'áadoo dasiiti'í yah adahidiikahgo át'é.

²⁰Jó, t'áá bí bits'íís éí dáádiníbaal át'éego binákáá góne' yah ahóót'i' ániidíii índa hináanii nihá ąą áyiilaa.

²¹Diyin God ba'áłchíní daniidlį́įgo Jesus éí ts'ídá aláahgo náá'iiłniihii nihá jílį́.

²²Áko ts'ídá t'áá aaníí ádii'níigo, áádóó t'áadoo naaki nilíní dahwiiniidlą́ągo, áádóó nihijéí tł'áahdi hadił bee nihibąąhági át'éii nihąąh ádingo bee ádaa ákodaniidzį́į'go, índa tó niłtólíii bee danihits'íís táádaasgizgo Diyin God baa dahidiikah.

²³Haa'íshą' she'oodlą' bee shił chohoo'į́ dadii'nínígíí yéego dayíníitą' doo, háálá Diyin God yee haadzí'ígíí yi'doolíiłgo baa dadzííníidlí.

²⁴Áádóó haa'íshą' ayóó'áda'ííníi'níigo índa naanish yá'át'éehii baa neiikaigo ałk'i nideiildzilgo ahídaniidlį́į doo.

²⁵Áłah néiidleehígíí ła' nidayiisííh, nidi haa'íshą' nihí t'áadoo nidahiilzíhí doo. Bóhólníihii nídoodááł beidoołkáłígíí koshídę́ę́' bich'į' hoolzhishgo baa ákodanoohsįįh, haa'íshą' hózhǫ́ yéego ahił yadahoniidlįįh doo.

²⁶Háálá t'áá aaníinii nihił béédahoozindóó bik'ijį' t'áá ákódeii'néehgo ádił ninááda'ayiilzíihgo, ádił nida'ayeelzí'ígíí biniyé nááhidoonihii doo ła' nááhódlǫ́ǫ da.

²⁷Nidi ánihwiit'aah báhádzidii, índa kǫ' báhádzidii éí Diyin God bits'ą́ą́jí dajílíinii ahodidoołk'ą́ąłgo hólóonii t'éí há nidawólní.

²⁸Diné éí bee haz'áanii Mózes baa deet'áanii doo yi'iił'įįhgóó diné naaki, doodaii' táa'da oo'íinii k'ehgo baa halnihgo, t'áadoo baa hojoobá'í la' hwiindziní bi'diilyééh.

²⁹Diné t'áá háiida Diyin God biYe' yádoosnihgo yik'i naagháii áádóó dił bee aha'deet'áanii bee diyingo ábi'diilyaii doo ílį́į́góó yaa nitsíkeesii índa Níłch'i Diyinii baa jooba'ii doo bił yílįįdii, éí diné t'áadoo asohodoobézhígóó bee atí'él'íinii bą́ą́h jílį́ ni!

³⁰Háálá, K'ééhodidoo'níłígíí éí bee shóhólnííh, shí k'éédideesh'nííł, jidííniidii hwéédahoniilzin. Náá'áłdó' ánáázhdí'ní, Bóhólníihii éí bidine'é yaa nídóot'įįł.

³¹Diyin God hináanii bílák'ezhdootłishgi t'áá íiyisí bik'e'íyéé'!

³²Nahdę́ę́' nihił ch'ída'deezdláád yę́ędóó bik'ijį' até'él'į́ bik'ee ti'hoo'nííh bich'į' hada'íínółníigo yiníłkánígíí béédaałniih.

³³Íídą́ą́' łahda nihí dahoneedlį́įgo hasłą́ągi nihá ninádahadis índa atídanihi'dil'į́į́ nít'éé', áádóó łahda ákódabi'dil'íinii bił ahił danohdlį́įgo biniinaa ákódanihi'dil'į́į́ nít'éé'.

³⁴Awáalyaaí nishłį́įgo shaa a'ááh danoozį́į́', áádóó nihindaalye'é nihighadahaas'nil, nidi nihił dahózhǫ́ǫgo bidahishidoochid, háálá nihí éí wózhǫ́ yá'át'éehii índa doo nídínéeshii yá'ąąshdi nihee dahólǫ́ǫgo nihił béédahózin.

³⁵Éí bąą Diyin God baa dadzíínóhłíhígíí t'ááká bee nihąąh nidahókaad lágo, háálá éí ayóo ílį́įgo bik'é'azlá.

³⁶Diyin God íinízinii bik'ehgo ádaahdzaago nízaadgóó hada'íínółní, áko yee nihá haadzíi'ii nihíí' dadooleeł.

³⁷Háálá t'óó hodíína'go jígháahii jidoogááł, áádóó doo na'áhozdidoolził da.

³⁸Ts'ídá t'áá ákogi ájít'éii oodlą' bee jiináa doo, nidi ła' t'ą́ą́' anáátłizhgo éí doo bąą shił hózhǫ́ǫ da doo.

³⁹Nidi t'ą́ą́' anáhineezdee'go ádabi'disdįįdii doo bitahjí daniidlį́į da, nidi nihíyee' da'iiniidlą́ągo baa dadzííníidlíigo nihii' naazíinii yisdádoo'nił.