Read Navajo HEBREWS 11 Bible Online

HEBREWS 11 - Navajo bible

HEBREWS 11

¹Ha'át'íida t'áádóo nídí hodooleełgo bíká hoł chohoo'į́įgo baa nitsídzíkeesii éí hwe'oodlą' wolyé, éí doo daat'íinii t'áá aaníí dahólǫ́ǫgo bééhózínígo ííł'į́.

²Ałk'idą́ą́' hastóí yę́ę bida'oodlą' binahjį' Diyin God yá'át'éehgo bá hahaasdzíí'.

³Hodeeyáadi Diyin God bizaad bik'ehgo yádiłhił biyi'di dahiníláii dahazlį́į́', áko k'ad deiit'íinii éí t'áá ádindę́ę́' ádaalyaago nihe'oodlą' bee bik'idadi'yiitįįh.

⁴Éíbel bi'oodlą' bee Diyin God yich'į' nááyiisnii'ígíí éí Kéin nááyiisnii'ígíí t'ah biláhígi át'éego t'áá nídoolyéełgo nááyiisnii'. Éí bee Diyin God ts'ídá t'áá ákogi ájít'é, níigo yee há haadzíí', háálá Éíbel náádziisnii'ii Diyin God há bił yílįįd. Azhą́ dadziztsą́ą nidi hwe'oodlą' bee t'ahdii yájíłti'.

⁵Íínak hwe'oodlą' bee éí doo dazdootsaał da biniyé dego aho'dooltį́. Áko t'áadoo nááho'diiltsą́ą da, háálá Diyin God nááhodiiłtį́. Háálá t'ah doo nááho'diilteeh yę́ędą́ą́' Diyin God yił hóshǫ́ ha'níigo há ha'oodzíí'.

⁶T'áá háiida hwe'oodlą' t'áágééd éí Diyin God ts'ídá doo bił hojíshǫ́ǫ le' át'ée da. Háálá t'áá háiida Diyin God baa deeshááł jinízinígíí éí Diyin God hólǫ́ǫgo índa t'áá éí hádaat'íinii yik'ijidlí jinízingo ts'ídá joodlą́ą doo.

⁷Nóah hwe'oodlą' bee éí ádahodooníiłii t'ah doo ádahanééhdą́ą́' Diyin God ho'níłnii', áko hozdósingo ha'áłchíní yisdádookah biniyé tsinaa'eeł hasht'ejiilaa. Ákót'éego nihokáá' dine'é bá nihozhní'ą́, áádóó t'áá ákogi át'éii hwe'oodlą' bee shójoost'e'.

⁸Éíbraham hwe'oodlą' bee, Kéyah níí' dooleełii bich'į' dínááh, Diyin God hodííniid yę́ędą́ą́' bik'eh hojííł'įįd, áko jideeyáágóó doo hoł bééhózingóó dashdiiná.

⁹Hwe'oodlą' bee kéyah haa deet'áanii t'ah doo hóó' yileeh da nidi bii'góó tázhdííná. Kéyah haa deet'áanii t'áá éí Áízak índa Jéíkab ałdó' bíí' dooleełgo baa deet'ą́. Ákwii níbaal bii' bił kéédahojit'į́į́ nít'éé'.

¹⁰Háálá kin bitł'ááh nída'astł'ingo haal'áii t'áá éí Diyin God yinahaz'ą́ągo áyiilaii nijólíí nít'éé'.

¹¹Azhą́ Sarah hadzistihgo ni'iichííh hąąh nást'įįd nidi hwe'oodlą' bee azdí'nóoltsąął biniyé hadziilgo áho'diilyaa, [áádóó hwe'awéé' hazlį́į́'] háálá Diyin God yee nihoní'áanii yi'doolíiłgo baa ákozniizį́į́'.

¹²Éí bąą diné t'ááłá'í sizínígíí éí hádą́ą́' shį́į́ daaztsą́ nahalin nidi bits'ą́ą́dóó ba'áłchíní náás da'ahideeshchį́, éí yádiłhił biyi'di sǫ' t'óó ahayóigi ánéelą́ą'go índa tónteel bibąąhgóó séí doo jóołta'ígi ánéelą́ą'go ba'áłchíní náás da'ahideeshchį́.

¹³Éidíígíí t'áá ádzíłtso da'joosdląądgo Diyin God yee nihoní'áanii t'áadoo hwee dahaleehí dazneezná. Ákondi hwe'oodlą' bee hwee dahodooleełgo baa ákodazniizį́į'go baa hoł dahóózhǫǫd. Índa nihokáa'gi dé'éyóní áádóó, T'óó tádadinéehii daniidlį́, dajiníigo ádá hadadziisdzíí'.

¹⁴Diné ákót'éego yádaałti'ii kéyah yikáa'gi kéédahat'į́į dooleełii t'áadoo bahat'aadí hádaat'į́.

¹⁵Kéyah yits'ą́ą́dóó ch'íheeskaii t'áá yaa nitsídaakeesgo, éí yich'į' t'ą́ą́' nídoo'néełgi t'áá aaníí t'áá bá ashja'ósin nít'éé'.

¹⁶Nidi kwe'é kót'é, kéyah t'ah aláhídi át'éii éí yá'ąąshdiígíí deinízin. Éí bąą Diyin God haDiyin God nilį́įgo bi'dójíigo éí doo yaa yánízin da, háálá éí t'áá áłdįįd kin haal'áago há hasht'eyiilaa.

¹⁷Éíbraham hwe'oodlą' bee Diyin God hach'į' yee nihoní'áanii bik'ehgo hwe'oodlą' bééhodoozįįł biniyé haye' t'ááłá'í há yizhchínígíí Áízak náájiiłniihgo baa nízdiidzá.

¹⁸Éí kót'éego bee ha'oodzíí', Áízak bits'ą́ą́dóó na'áłchíní náás ahoolchíiłii bíká ádahodoo'niid.

¹⁹Jó, Éíbraham kwíinízingo biye' yaa nitsízkééz, Diyin God éí daneeznáanii nidi néididoołjahgo yíneel'ą́, nízin, áko daneeznáanii náábi'diiljé'ígi át'éego biye' da'aztsą́ą́dę́ę́' náábi'diilzá nahalingo bílák'e náátłizh.

²⁰Hwe'oodlą' bee Áízak éí Jéíkab índa Íísa náásgóó bik'ihozhdoodliił biniyé sozdoolzin.

²¹Jéíkab są́ ho'niiłhį́įgo hagish ádíyashniil'áago hwe'oodlą' bee Jóseph biye'ké t'áá áłah bik'ihojidlíi doo biniyé t'áá ał'ąą bá sozdoolzin.

²²Jóseph t'ah doo daatsaahgóó bi'oodlą' bee Ízrel dine'é Ííjipdóó ch'éédoo'néełgi yee haadzíí', áádóó bits'íís yóó'ádoolníiłgi yíneineestą́ą́'.

²³Mózes yizhchį́ yę́ędą́ą́' bishchíinii bi'oodlą' bee táá' nídeezidjį' be'awéé' néidees'į́į́'. Háálá awéé' t'áá íiyisí nizhónígo yiyiiłtsą́, áádóó aláahgo naat'áanii yee has'áanii doo bik'ee bił yée' da.

²⁴Mózes tsíłkę́ę́h dzizlį́į'go hwe'oodlą' bee Féro bitsi' biyáázh ho'di'níi dooleełgi doo jiniizį́į' da.

²⁵Diyin God bidine'é doo ákǫ́ǫ́ ádabi'dil'ínígíí bitahjí jílį́į dooleełgo nizhdiní'ą́, Féro bighandi t'óó kónígháníjį' nidi bąąhági át'éii ił honeełniígíí éí doo yiniizį́į' da.

²⁶Christ biniinaa ódziih bik'ee ti'hoo'nííhjígo nizhdiní'ą́, éí Ííjipdóó naalye'é da'ílíinii biláahgo át'éego ílį́įgo baa tsízdeezkééz, háálá náasdi hwee hodooleełii bíká jidéez'į́į́'.

²⁷Mózes hwe'oodlą' bee aláahgo naat'áanii báháchį'ii doo bik'ee hoł yée' da, áko Diyin God doo yit'íinii joo'į́ nahalingo ha'jólníigo Ííjipdóó dashdiiyá.

²⁸Hwe'oodlą' bee atis'adeesdzá bee hozdeesá áádóó ch'é'étiingi tsin ałch'ishjí nihidii'áhígíí dił bik'íjíłtahgo bee nahodzisá. Alą́ąjį' nidahaazhchíinii neidoołtsiłii éí Ízrel dine'é biye'ké doo neidoołtsił da biniyé éí bee nahodzisá.

²⁹Ízrel dine'é bida'oodlą' bee t'áá hóółtseigóó ádaat'į́ nahalingo Tónteel Łichíí' wolyéego siyínígíí tsé'naajį' ha'naa niheezná, nidi Ííjip dine'é t'áá ákót'éego yídaneeztą́ą́' nít'éé' t'óó tó ábísdįįd.

³⁰Ízrel dine'é bida'oodlą' bee tsosts'id jį́ Jériko kin haal'á ditą́ągo binaa ahéé'ítł'inii binínájí'néehgo naa'ahineezkaad.

³¹Réíhab, ałjiłnii nilíinii, bi'oodlą' bik'ehgo doo ak'eh dahół'íinii t'áadoo yitah daaztsą́ą da, háálá k'é nídzingo naalchi'í yah ayíí'eezh.

³²Ha'át'íishą' baa nááháshne' doo? Gídiyan, Bérak, Sámson, Jéfthah, David, Sámuel, áádóó Diyin God yá dahalne'ii baa anááho'niishne'go t'áá bi'oh i'doo'ááł.

³³Éí bida'oodlą' bee aláahgo naat'áanii bił nahaz'ą́ yik'eh dadeesdlį́į́', t'áá ákogi át'éego nidaashnish, yee nihwiiz'áanii bee dahazlį́į́', náshdóítsoh bitsiijį' daditł'ooígíí t'áadoo dabooldéel da,

³⁴kǫ' bits'áhonigahii t'áadoo adabideesk'ą́ą' da, tsiidétáán deeníinii nidi t'áadoo bídahidéé'náa' da, doo dabidziilii t'óó dabidziil daazlį́į́', anaa' náhoodleełgi ayóó át'éii daazlį́į́', índa da'ana'í bisiláo baa yóó'adahaazhjéé'.

³⁵Bida'oodlą' bee sáanii danilíinii bits'ą́ą́' ádaasdįįdii náádabi'diiljée'go baa nídahaas'nil. Náádaała' éí yá'ąąshdi iiná t'ah aláhígo yá'át'éehii bee dahinii'náa dooleełgo náádidiijah danízingo, níík'eh nihe'oodlą' bee nisiidzį́ danízingo biniinaa béédahididoochiłę́ę t'óó bił nidadziisghaal.

³⁶Ła' éí ánahat'i' áádóó ná'níltsxis, ła' béésh da'ahólzha'í bee dah dabi'diistł'ǫ́ǫgo awáalyaa góne' ti'dahooznii'.

³⁷Ła' bił nidadziisne', ła' ahádabidiishch'iizh, [ła' nabídahodi'neestą́ą́',] ła' diltłish bee nidaaztseed, ła' t'áá íiyisí badahojoobá'ígo bąą dibékágí índa tł'ízíkágí dabi'ée'go, atídabi'dil'į́įgo, doo ákǫ́ǫ́ ádabi'dil'į́į́góó tádadookai.

³⁸Nihokáá' dine'é éí kódabi'diilyaaígíí bił kéédahojit'į́įgo doo bą́ą́h da'jílį́į da! Dahalgaigóó áádóó daadziłgóó nidaakaigo tsé daa'áán góne' índa da'a'áán góne' kéédahat'į́į́ nít'éé'.

³⁹T'áá ádzíłtso hweda'oodlą' bee yá'át'éehgo hwéédahoozin. Nidi Diyin God yee nihoní'áanii t'áadoo hwíí' daazlį́į' da,

⁴⁰háálá Diyin God wónáasdi nihá yá'át'éehii yinahaz'ą́ągo bąą, éí t'áá nihídingo doo hadaałt'é ádahodi'doolníił da lá.