Read Navajo HEBREWS 12 Bible Online

HEBREWS 12 - Navajo bible

HEBREWS 12

¹Jó, da'oo'íinii t'áadoo bee néelą́'ígóó nihinás'áhígíí biniinaa, haa'íshą' nihí nidanihiníłtł'aii áádóó t'áá ha'át'íhída haneetehee bee bąąhági ádeiit'į́įgo ánánihoodlíłígíí nahjį' kódadiilnííł. Áko haa'íshą' jáák'eh nihá hasht'ehoolyaaígi ts'ídá t'ááłáhígi ádeiit'į́įgo ha'ahóní bee deidiiltih.

²Jesus nihe'oodlą' yinaayáii áádóó hasht'eyoolíiłii bich'į' dadíníit'į́į'go deidiiltih. Jesus éí bił hózhǫ́ǫ dooleełígíí biniyé yáhásin nilíinii doo yaa ná'áhodílt'į́į́góó tsin ałnáoszid bąąhjį' ha'ólníigo ti'hoo'nííh yik'óoyá, índa Diyin God bibikáá'dóó nahat'áii binish'náájígo dah neezdá.

³Doo dadínóołnah da, índa doo nihąąh nidahodiyookałígíí biniyé Jesus baa nitsídaahkees. Éí bąąhági ádaaníiłii bináádiijahgo t'óó yich'į' ha'ólníí nít'éé'!

⁴Bąąhági át'éii lá bich'į' nidaałdzil ni, nidi t'ah doo biniinaa nihidił dadinéeh da.

⁵Azhé'é ba'áłchíní neinitinígi át'éego Diyin God nanihineeztą́ą'ii daats'í baa deisoonah. Shą́ą́', Diyin God kóní: Shiye' nílíinii, Bóhólníihii t'áá hashkée yína'niłtinii t'áadoo doo níníziní. Índa nándiiteehgo t'áadoo nąąh nááháka'í.

⁶Háálá Bóhólníihii éí ayóó'áyó'níinii t'áá hashkée neinitin, áádóó t'ááłá'í nítínígo biye' nidahaleehii néiniłtsxis.

⁷Azhé'é nilíinii t'áá hashkée ba'áłchíní neinitinígi át'éego Diyin God éí yínanihiniłtin, áko éí bich'į' hada'íínółní. Háí a'áłchíní shį́įshą' bizhé'é doo t'áá hashkée nabinitin da?

⁸Azhé'é danilíinii biye'ké t'áá ałtso t'áá hashkée nideinitin, áko nihí Diyin God doo t'áá hashkée yínanihinitingóogo doo t'áá aaníí ba'áłchíní danohłį́į da, nidi t'óó wótashki'gi ádanoht'é.

⁹Nihizhé'é danilíinii t'áá hashkée nidanihineeztą́ą́', áko nihił danilį́į́ nít'éé'. Ákót'é bąą níłch'i k'ehgo aTaa' nilíinii ts'ídá agháago bik'eh dahoniil'į́įgo iiná t'áá aaníinii nihee hólǫ́ǫ doo.

¹⁰Nihizhé'é dajílíinii t'óó kónígháníjį' t'áá hó daznízinígi át'éego t'áá hashkéego nidanihizneeztą́ą́', nidi Diyin God diyingo yee át'éii bił ałts'ą́ą́' da'niilk'iiz doo biniyé t'áá bí t'éiyá nihá yá'át'éehii biniyé t'áá hashkée nanihinitin.

¹¹T'áá háiida t'áá hashkéego nahodi'nitinígíí bik'ee jishch'íi'go doo baa hoł hózhǫ́ǫ da łeh, nidi binahjį' óhojiił'ą́ą́' ládą́ą́', wónáasdi t'áá ákogi ájít'éego hoł hózhǫ́ǫgo jiináa doo.

¹²Éí bąą nihigaan t'óó nihąąh nidahaaznilii áádóó nihigodta' doo daniłdzil da daazlį́į'ii bidziilgo ánídaahdle'!

¹³Áádóó k'éhézdongo deínóhkáahgo áda'dołne', áko na'nilwodii doo t'óó tsé'édin ádooníił da, nidi yá'át'ééh nídadoodleeł.

¹⁴Diné t'áá ałtso bił k'é da'ahidoh'níi dooleełígíí, áádóó diyingo dahinohnáa dooleełígíí bidadoołkaal. T'áá háiida doo ákójít'į́į́góó éí Bóhólníihii doo yizdoołtséeł da.

¹⁵Áyąądą́ą́' diné t'áá háiida t'ááká Diyin God bibee ajooba' t'áadoo shóyoołt'eeh da lágo, baa dahonohsą́ą le', índa ayi' nahodik'ǫǫsh bihétł'óól nihich'į' hodiyółnáałgo nohłą́'í nihółchǫǫh lágo.

¹⁶Ła'da na'ageh doo yee tsi'naagháa da dooleeł, doodaii' Íísa doo hodísin da yę́ęgi át'éego t'ááká doo ádá dahodíínółzin da yíila'. Jó, éí átsé yizhchíinii jílį́įgo bee hóhólníih dooleeł yę́ę t'ááłáhídi oodą́'ígíí bee haa nahaaznii'.

¹⁷Áádóó bik'ijį' bee ak'ihojidlíii shíí' nídoodleeł jiniizį́į'go jichago bíká ájíít'įįd nidi, t'áadoo hwíí' silį́į' dago nihił béédahózin. Háálá łahgo ánízhdoodlíiłii doo bohónéedzą́ą da.

¹⁸Ha'át'íhída ts'íseego baa ákohwiinidzinii doo baa dahisoohkai da. Ízrel dine'é Dził Sáínai wolyéii yiyaajį' eekai yę́ędą́ą́' dził kǫ' bił shizhóodgo áádóó łid bee chahałheeł, índa t'óó báhádzidgo níyol,

¹⁹áádóó dilní ayóó íits'a'go diits'a', índa iinéé' diists'ą́ą'go éí bizaad doo yee hanáádoodzihgóó Ízrel dine'é nída'ookąąh,

²⁰háálá, Azhą́ naaldlooshii nidi dził yit'áahjį' iigháahgo bił nizdoolniił, níigo yee haadzíi'ii doo bídazhneel'ą́ą da.

²¹Éí níl'į́įgo t'óó báhádzidígi át'éego bik'ee hóyée'go Mózes ání, T'áá íiyisí bik'ee shił yée'go shitah hoditłid.

²²Nidi nihí, Dził Záíyan wolyéii, áádóó Diyin God hináanii bikin haal'áii, éí yá'ąąshdi Jerúsalem hoolyéhígíí baa dahisoohkai. Áadi diyingo nidaal'a'í doo jóołta' ánéelą́ą' da.

²³Áádóó átsé nidahaazhchíinii yá'ąąshdi bízhi' ádaalyaago bił dahózhǫ́ǫgo áłah nilínígíí, áádóó Diyin God éí diné t'áá ałtso yaa nídóot'įįłii, índa diné ts'ídá t'áá ákogi ádaat'éii biníłch'i hadaałt'éii baa dahisoohkai.

²⁴Áádóó Jesus, bee aha'deet'áanii ániidíii yee ata' sizíinii, índa bidił ak'éstahii éí Éíbel bidił biláahdi át'éego ílį́įgo baa hane'ii baa dahisoohkai.

²⁵Nihich'į' yáłti'ii ts'ídá hazhó'ó deísínółts'ą́ą́'. Háálá nahasdzáán bikáa'gi Ízrel dine'é yich'į' yáłti' nít'ée'ii doo deiniizį́į́'góó bąą doo daadzíí'góogo, jó áko, nihí ałdó' yá'ąąshdę́ę́' nihich'į' yáłti'ii doo daniidzingóó éí t'ah yówehígo doo dadiidzih da!

²⁶Íídą́ą́' Diyin God haadzíi'go nahasdzáán nahaasnáá', nidi k'ad kóníigo nihoní'ą́, Náá'áłdó' ts'ídá t'ááłáhídi doo nahasdzáán t'éiyá da, nidi yádiłhił ałdó' nahideesh'náałgo dadeeshhał.

²⁷Díí saad, Ts'ídá t'áá náánáłáhídi, hodoo'niidígíí, jó, éí nahaasná'ígíí éí ádaalyaii t'éiyá nahjį' kódoolníiłgo ááhyiłní, doo hidólnááł ádaat'éhígíí t'éiyá t'áá dahólǫ́ǫ doo.

²⁸Éí bąą haa'íshą' aláahgo bee óhólníihgo bił haz'áanii niłdzilgo doo hizhdół'nááł át'éii nihee dahazlį́'ígíí baa ahééh daniidzin doo, áko haa'íshą' baa hasti'go dílzingo baa bił hózhǫ́ǫgo Diyin God bich'į' nidahwiidláa doo,

²⁹háálá nihiDiyin God éí kǫ' ó'oołdįįłígi át'éii nilį́.