Read Navajo HEBREWS 13 Bible Online

HEBREWS 13 - Navajo bible

HEBREWS 13

¹Christ bee t'áá ła' haoojée'go ayóó'áda'ahíínóh'níi doo.

²Dé'éyóní danilíinii nihaa nídaakahígíí bich'į' nihá ádahwiinít'į́'ígo nihił danilį́į dooleełígíí béédaałniih, háálá ła' ákódaat'į́įgo diyingo nidaal'a'í ádaat'į́įgo doo bił béédahózingóó yaa dajoozba'.

³Awáalyaaí danilínígíí t'áá bił awáalyaaí danohłį́ nahalingo baa nitsídaahkees, áádóó ti'dahooníhígíí ałdó' bił ti'dahoohnííh nahalingo baa nitsídaahkees, háálá nihí ałdó' ats'íís bee dahinohná.

⁴Bíni'dii t'áá ádzíłtso agééh hoł danilį́į le', áádóó ahé'áské dílzin le'. Na'ageh bee tsi'nidajikaii, índa dazh'diléii éí Diyin God há nihodiyoo'ááł.

⁵Béeso t'áadoo bíchą́deídółni'go dahinohnání, áádóó nihee dahólónígíí nihił daasih le'. Háálá Diyin God ání, Ts'ídá doo nihik'i dínéeshchéeł da; ts'ídá doo yóó'anihidideesh'áał da.

⁶Éí bąą t'áadoo yé'í ádadii'níi doo, Bóhólníihii shíká análwo'í nilį́, doo násdzid da doo! Dinéshą' haa dashizhdoolííł?

⁷Diné nihá naazį́į́ nít'ée'ii béédaałniih. Éí Diyin God bizaad yee nihił dahoolne'. Haash yit'éego dahináá nít'éé' índa haash yit'éego nida'iisdįįd éí nabik'ítsídaałkees, áko bida'oodlą' yę́ę bida'oł'į́į le'.

⁸Jesus Christ éí adą́ą́dą́ą́' áádóó díí jį́ índa hool'áágóó t'ááłáhígi áyéet'éego ahool'á.

⁹Ał'ąą át'éego índa doo bééhózingóó na'nitin danilíinii t'áadoo yóó'adanihinii'áhí. Diyin God bee ajooba' hwe'oodlą' bitsxe'go áyiił'įįhjí yá'át'ééh, t'áadoo le'é daadą́ągo bee nida'nitinii t'áadoo yá'át'éehgo hodahideezyįįd da.

¹⁰Jew dine'é yá nááda'iiłniihii níbaal bii' hodílzinii biyi' nidaal'a'ígíí éí bikáá' náá'iiniihí nihee hólónígíí bikáa'gi nááhaaznii'ii deidooyį́įłgo doo bee bá haz'ą́ą da.

¹¹Naaldlooshii dabidił éí aláahgo náá'iiłniihii ádił ni'iidzííhjí nááhániihii át'éego aláahgo hodiyingo haz'ą́ą́ góne' yah iikáah łeh, nidi dabitsį' níbaal haal'áhídóó bits'áhwiiní'ą́ądi dadidlid łeh.

¹²Éí bąą Jesus ałdó' t'áá bí bidił yee diné dadiyingo áyoolíił doo biniyé Jerúsalem kin haal'áhígíí bits'áhwiiní'ą́ądi ti'hooznii'go daaztsą́.

¹³Jesus baa yáhásingo nihá tibidi'yoosnii', áko nihí ałdó' baa yáhásingo bá ti'hwiidii'nihgo níbaal haal'áhídóó bits'áhwiiní'ą́ą́góó bich'į' deíníikáah doo.

¹⁴Háálá kwe'é hool'áágóó kin haal'áii doo bii' kéédahwiit'į́į da, nidi hool'áágóó kin haal'áii bii' kéédahwiit'į́į dooleełígíí bíká dadéet'į́į́'.

¹⁵Éí bąą haa'íshą' Jesus bee Diyin God baa dahwii'niihígíí t'áá áłahjį' bich'į' náádahiilniih doo. Bízhi' deíníijíigo bee bich'į' ahééh daniidzingo ádee hadahidiidziihii bineest'ą' át'é.

¹⁶Yá'át'éehgo ádadoohníłígíí índa nihee dahólóonii náádaała' bił ałts'ą́ą́' da'nołk'iiz dooleełígíí baa dayoohnééh lágo, háálá ákójít'ínígíí éí nááhániihii Diyin God yaa bił hózhónígíí át'é.

¹⁷Nihá aląąjį' naazíinii bik'eh dahonoł'į́ áádóó bídahwíínółnííh. Háálá éí nihii' naazíinii t'áá áłahjį' nihá yik'i hada'ídées'į́į'go yee nihindaalnishígíí Diyin God yee yił nídahalne'. Bik'eh dahonoł'į́įgo bił dahózhǫ́ǫgo nihindaalnishgo yá'át'ééh, doodaii' doo bik'eh dahonoł'į́į́góó éí yínííł danilį́įgo t'áadoo nihá nídoodleełí da.

¹⁸Nihá sodadołzin. T'áá ákwii ádeiit'ínígíí baa ákodaniidzingo, t'áá ałtsojį' yá'át'éehgo dahinii'náa dooleełgo laanaa daniidzin.

¹⁹T'áá tsį́įłgo Diyin God nihich'į' nihééshidooł'aałígíí bíká sodadołzin doogo baa nánihooshkąąh.

²⁰Diyin God, bits'ą́ą́dóó ach'į' hózhǫ́ náhásdlį́į'ii', éí nihiBóhólníihii Jesus daaztsą́ą́dę́ę́' néidiisá. Jesus, dibé yaa áhályáanii ayóó át'éii, bidił bee aha'deet'ą́ doo ninít'i'ii ályaa.

²¹Diyin God íinízinii bik'ehgo ádaahníił doo biniyé hadaałt'é ánihidoolííł. Éí Jesus Christ biniit'aa nihii' naalnishgo bił hóshǫ́ǫ doo. Hool'áágóó ahóyéel'áágóó baa ha'niih doo. T'áá ákót'ée doo.

²²Shik'isóó, hada'íínółní, saad bee chánah ádanihishłe'ígíí deídóołts'įįłgo baa nánihooshkąąh, háálá t'áá áłts'íísígo nihich'į' ak'e'shéłchį́.

²³Nihik'is Timothy bá hóóshdlee'ígo béédoochidígíí nihił ch'ínísh'aah. Éí t'áá tsį́įłgo shaa níyáá ládą́ą́' akǫ́ǫ́ bił deesh'ashgo danihiidiiltsééł.

²⁴Nihá aląąjį' naazíinii t'áá ałtso áádóó Diyin God bidiyį́į́' t'áá ałtso shá k'é dabijiniih. Ítalidę́ę́' danilíinii k'é danihiłní.

²⁵T'áá ánółtso Diyin God bibee ajooba' yee nihik'ijidlíi doo. T'áá ákót'ée doo.