Read Navajo HEBREWS 3 Bible Online

HEBREWS 3 - Navajo bible

HEBREWS 3

¹Éí bąą shik'isóó, Diyin God bidiyį́į́' danohłíinii, yá'ąąshdę́ę́' atah nihíká áhodoo'niidii, Christ Jesus hazhó'ó baa nitsídaahkees, éí na'nitin woodláanii bihidiikaígíí yiniyé yil'aadii índa yá aláahgo náá'iiłniihii nilį́.

²Ízrel dine'é dajílíinii éí Mózes baa hodzódlíigo hwee ádíhólníihgo Diyin God bá honaalnish nít'é'ígi át'éego Jesus éí Diyin God nihoníłtį́įgo haa hodzódlíigo Diyin God bá nijilnish.

³Diné kin ájíł'íinii éí kin biláahgo diné bił jílį́. T'áá ákót'éego Jesus éí Mózes yiláahgo aa ha'niih yą́ą́h nilį́.

⁴Jó, kin t'ááłá'í ní'ánígo diné ła' ádayiilaa, nidi Diyin God éí t'áá ałtsoní áyiilaa.

⁵Mózes éí Ízrel dine'é binjilnishgo haa hodzódlíí nít'éé'. Naal'a'í jílį́įgo náásgóó Diyin God yee hahidoodzihii baa hojilne' nít'éé'.

⁶Nidi Christ, éí haa hodzódlíigo Diyin God biYe' jílį́įgo, Diyin God ba'áłchíní bee hóhólnííh. Jó, nihí t'áá nihoolzhiizhjį' Diyin God hwee nihił chodahoo'į́įgo haa dadzííníidlíigo bee chánah daniidlį́įgo ha'áłchíní daniidlį́.

⁷Háálá t'áá Níłch'i Diyinii ánínígi át'éego bik'ehgo ádanoht'é, Díí jį́ Diyin God biinéé' dadoohts'a'go,

⁸shą́ą́', honoojíidi ałghadazhdit'ááh yę́ędą́ą́' áádóó Diyin God nabídazhnitaahgo yoołkááł yę́ędą́ą́' t'ą́ą́zh'neezhjéé' yę́ęgi át'éego t'áadoo nihijéí dantł'izí. Doo ak'eh dahojíł'į́į́góó biniinaa t'ą́ą́zh'neezhjéé'.

⁹Áadi azhą́ dízdiin nááhaijį' shinaanish dayoo'į́į́ nít'éé' nidi danihizhé'é yę́ę shíkada'iisxilgo nashídaneeztą́ą́'.

¹⁰Éí bąą éí oochíiłii bich'į' doo shił hóózhǫǫdgóó ádííniid, Diné t'áá bí t'áá áłahjį' bijéí yee ádił nida'ílzííh, ánísht'éii doo bił béédahózin da nít'éé'.

¹¹Áko t'óó báhádzidgo até'ésh'íinii binahjį' ádee hadeesdzíi'go ádííniid, Háá'áyį́į́h bee hooł'a'ígíí ts'ídá doo biih dazhdookah da.

¹²Ádaa ádahołyą́, shik'isóó, doo ádaa ádahołyą́ą́góó nihijéí bii' doo yá'át'ééhgóó nitsídaahkees doo, índa doo da'iinohdlą́ą́góó biniinaa Diyin God hináanii bits'áhidoohkah.

¹³Nidi bąąhági át'éii yee anó'áahii doo ła' nihidoołtł'isgo jé'áhodołkałgo ánihidoolíłígíí biniyé t'ah jį́ ha'nínídą́ą́' t'áá ákwíí jį́ ahidiniłnáago chánah áda'ahíínółzin.

¹⁴Háálá átséedi da'iisiidląądgo t'áá nidasiildįįdjį' baa da'iisiidlí'ígíí yéego dayíníitą'go Christ bił da'ahííníitą' doo.

¹⁵Diyin God bizaad bee ak'e'ashchíinii kóní: Díí jį́ Diyin God biinéé' dadoohts'a'go shą́ą́' diné doo ak'eh dahojíł'į́į́góó biniinaa t'ą́ą́zh'neezhjéé' yę́ęgi át'éego t'áadoo nihijéí dantł'izí.

¹⁶Ła' éí Diyin God bizaad deidiizts'ą́ą' nidi doo yik'eh dahół'į́į́góó t'ą́ą́' neezhjéé'. Ííjipdę́ę́' Mózes ch'íiní'eezhii doo t'áá ałtso t'ą́ą́' neezhjée' da.

¹⁷Háishą' dízdiin nááhaijį' Diyin God hach'į' doo bił hóózhǫǫd da? Honoojíidi bąąhági ádajit'į́įgo biniinaa nahózdįįdii lą́ą!

¹⁸Áádóó, Háá'áyį́į́h bee hooł'a'ígíí ts'ídá doo biih dazhdookah da, níigo háishą' Diyin God hach'į' ádee haadzíí'? Doo bik'eh dahojííł'įįdii lą́ą ni!

¹⁹Doo da'joodlánígíí biniinaa háá'áyį́į́h Diyin God yee hooł'a'ígíí biih dahizhdookahgo ts'ídá doo bídajíighahgóó nihił béédahoozin.