Read Navajo HEBREWS 4 Bible Online

HEBREWS 4 - Navajo bible

HEBREWS 4

¹Éí bąą háá'áyį́į́h Diyin God yee hooł'a'ii biih dadiikahgi t'ahdii nihá ąą át'éhídą́ą́', haa'íshą' yéego ádeiit'į́įgo biih dahidiikah. Doo baa dahonohsą́ą́góó t'éí nihí ła' ch'ééh yahadaahkáahgo nihił béédahodoozįįł.

²Háálá hane' yá'át'éehii bee Ízrel dine'é bił dahóóne'ígi át'éego nihí ałdó' bee nihił dahóóne'. Nidi íídą́ą́' hane' nilíinii deidiizts'ą́'ígíí t'áadoo biniyéhígóó deidiizts'ą́ą́', háálá deidiizts'ą́'ígíí t'áadoo dayoosdląądgo nídeidiiláa da.

³Áko nihí da'iisiidląądii t'éiyá háá'áyį́į́h Diyin God yee hooł'a'ígíí biih hiikááh. Jó, t'áá bí ádííniid, T'óó báhádzidgo atí'ésh'íinii binahjį' ádee hadeesdzíi'go ádííniid, Háá'áyį́į́h bee hooł'a'ígíí ts'ídá doo biih dazhdookah da! Azhą́ nahasdzáán ałtso niiní'ą́ąjį' binaanish ła'yiyiilaa nidi ádííniid.

⁴Háálá haa'í shį́į́ éí Diyin God bizaad bee ak'e'ashchíinii ání, Diyin God binaanish ałtso áyiilaago tsosts'id jį́į́ góne' hanáályį́į́'.

⁵Jó, kwe'é ałdó' ánáádí'ní, Háá'áyį́į́h bee hooł'a'ígíí ts'ídá doo biih dazhdookah da.

⁶Jó áko, t'áá átséedi hane' yá'át'éehii deidiizts'ą́ą' nidi doo yik'eh dahół'į́į́góó biniinaa háá'áyį́į́h Diyin God yee hooł'a'ígíí t'áadoo biih dadziiskai da. Nidi ła' háá'áyį́į́h yee hooł'a'ígíí yiih dahidookahgi t'ahdii bá ashja'ósin.

⁷Háálá nízaad nihoolzhiizhgo ashja nááhoodzaa, Díí jį́, níigo t'áá íídą́ą́' kóníigo yee haadzíí' yę́ęgi át'éego David yinahjį' yee hanáánáádzíi'go ání, Díí jį́ Diyin God biinéé' dadoohts'a'go t'áadoo nihijéí dantł'izí.

⁸Jáshowa éí Ízrel dine'é háá'áyį́į́h Diyin God yee hooł'a'ígíí biih jíí'eezhgo t'áá nízaadgóó hodíína'go da'oodlánígíí háá'áyį́į́h yiih dahidookahii ashja náá'oodlíiłii doo yá yeiníst'įįd da doo nít'éé'.

⁹Éí bąą Diyin God ba'áłchíní háá'áyį́į́h t'ahdii bá hólǫ́.

¹⁰Háálá t'áá háiida háá'áyį́į́h Diyin God yee hooł'a'ígíí biih jííyáago Diyin God binaanish ałtso áyiilaago hanáályį́'ígi át'éego t'áá hó hanaanish ááhozhdoot'įįłgo háázhdoolyįh.

¹¹Áko haa'íshą' éí háá'áyį́į́h biih dahidiikahgi t'áá awołí bee ádeiit'į́į doo, ła' doo ak'eh dahół'į́į́góó biniinaa ch'ééh ádáát'įįd yę́ęgi át'éego éí dooda.

¹²Háálá Diyin God bizaad éí hiná, áádóó bidziilgo naalnish. Diltłish ałts'ą́ąjį' deeníinii bilááh át'éego deeníigo ha'áni' índa hwii' sizíinii ałts'áyiinííł, ahadadit'ą́ índa awol nidi ałts'áyiinííł. Hajéí bii' nitsáhákees índa íiznízinii há neiłkaah.

¹³Áko Diyin God ádayiilaii doo ła' bits'ąą nídót'įįh át'ée da, nidi binááł t'áá ałtsoní t'áadoo bahat'aadí índa t'áá ííshjání danilį́. T'áá bí t'éí bich'į' niha'át'e' t'áá ałtso bee ádaa nidahodiilnih.

¹⁴Jó áko, Jesus éí Diyin God biYe' ayóó át'éii nihá aláahgo náá'iiłniihii nilíinii yá'ąąshgóó anáádzá. Éí bąą haa'íshą' nihe'oodlą' bee ádee hadiidzí'ígíí yéego bee ádaniit'ée doo.

¹⁵Nihá aláahgo náá'iiłniihii doo danihidziilígíí bąą nihaa a'ááh dínóozįįłgi yíneel'ą́. Ts'ídá t'áá ałtsojį' t'áá nihígi át'éego nabíhodi'neestą́ą́', nidi doo bąąhági ádzaa da.

¹⁶Éí bąą haa'íshą' t'áadoo dasiiti'í Diyin God bibikáá'dóó nahat'áii bit'ááh dahidiikah. Áadi Diyin God bibee ajooba' hólǫ́. Áadi nihaa a'ááh hodínóodzįįł, áádóó nihide ánídahoot'įįhgo Diyin God nihaa jooba'go nihíká análwo' doo.