Read Navajo HEBREWS 5 Bible Online

HEBREWS 5 - Navajo bible

HEBREWS 5

¹Aláahgo nááda'iiłniihii t'ááłá'í nítínígo diné bitahdę́ę́' Diyin God náhwiizláá'. Éí bąąhági át'éii bee ádił ni'iilzííh biniyé aa dahalyéii índa náádahaniihii Diyin God bich'į' náádajiiłniih. Éí diné bá náádajiiłniih.

²Diné doo hózhǫ́ bił éédahózinii índa doo ákwii ádaat'éii hoł baa hojoobá'ígo binjilnishgo hoł bééhózin, háálá t'áá hó ałdó' doo hadziil da.

³Doo hadziil daígíí biniinaa diné bibąąhági ádaat'éii biniyé bá náá'jiiłniihígi át'éego t'áá hó ałdó' habąąhági át'éii biniyé náázh'diyoołnihgo haz'ą́.

⁴Diné ła'da náá'iiłniihii jidooleełgo doo t'áá hó ádá nizhdee'aah da, nidi Diyin God t'áá Éran yíká ádííniid yę́ęgi át'éego háká ádííniidgo t'éiyá aláahgo náá'iiłniihii jidooleeł.

⁵T'áá ákót'éego ałdó' Christ aláahgo náá'iiłniihii ábidi'doolnííł biniyé doo t'áá bí ayóó át'éego í'diilyaa da, nidi Diyin God kóbidííniidgo nibiníłtį́, ShiYe' nílį́, díí jį́ nishchíinii sélį́į́'.

⁶Łahgo ałdó' ánáádí'ní, Melkízedek náá'iiłniihii nilíinii bik'ehgo hool'áágóó náá'iiłniihii nílį́.

⁷Nahasdzáán bikáa'gi Jesus hiná yę́ędą́ą́' Diyin God éí Jesus dadootsaałígíí bits'ą́ąjį' yisdábidoołtéełgo yíneel'áanii yich'į' yéego áníigo áádóó binák'eeshto' náálį́įgo sodoolzin índa ná'ooskan, áko yidísinígíí bąą Diyin God bidiizts'ą́ą́'.

⁸Azhą́ Diyin God biYe' nilį́į nidi ti'hooznii'ígíí bee ak'eh hól'į́ yíhooł'ą́ą́'.

⁹Éí bee ałtso ła'yilyaago, bik'eh dahół'íinii t'áá ałtso bá hool'áágóó yisdá'iildééh yinaayáii silį́į́'.

¹⁰Melkízedek náá'iiłniihii nilíinii bik'ehgo aláahgo náá'iiłniihii jílį́, Diyin God hodííniid.

¹¹Díí lą'ígóó bee nihił dahodiilnih nidi doo da'doohts'a' da dasoolį́'ígíí biniinaa hazhó'ó baa dahodiilnihígi nantł'a.

¹²K'ad na'nitiní danohłį́į dooleeł nít'é'ígi, jó, nihída Diyin God bina'nitin bee dadeezt'i'ii ła'da yee nináádanihinitin dooleeł góne' anánoodee', áłchíní abe' yidláanii nidahonohłin nídasoohdlį́į́', ch'iyáán daniłdzilii deiyánígi doo ádanoht'ée da.

¹³T'ááłá'í jinítínígo abe' jidláanii éí ts'ídá t'áá ákogi é'ét'é bee na'nitin doo jiichįįh da, háálá éí t'ahdii awéé' jílį́.

¹⁴Nidi ch'iyáán daniłdzilii éí nidahineesáanii bá át'é, jó, éí háidísh yá'át'ééh índa háidísh doo yá'át'éeh daígíí bił béédahózin doo biniyé yaa nitsídaakeesii na'íhonitaah yee yídahooł'ą́ą́'.