Read Navajo HEBREWS 6 Bible Online

HEBREWS 6 - Navajo bible

HEBREWS 6

¹Éí bąą haa'íshą' Christ bína'niltinígíí átsé bee nidanihidi'neestą́'ígíí doo éí t'éiyá bee nida'ahiniitin da dooleeł, nidi diyin k'ehgo nidíníilzéełii bich'į' náás yiikah doo. Kin bitł'ááh nástł'inii hanáájítł'inígíí nahalingo átsé bee nidanihidi'neestą́'ígíí bee ninááda'ahiniitingo éí dooda. Átsé bee nidanihidi'neestą́'ígíí éí díí: t'áadoo biniyéhígóó baa nidasiikaii łahgo át'éego bąąh tsíńdahiikeesgo Diyin God deiniidlą́ągo,

²áádóó díí bee na'nitinii: tó bee alzį́į́h, índa ak'i dah adinííh, áádóó aninéédę́ę́' náá'diijeeh, índa hool'áágóó até'él'į́.

³Haa'íyee' Diyin God niha'di'ní'ą́ą́ ládą́ą́' náás náánéiikah doo.

⁴Diné ła' hane' yá'át'éehii bee hoł ch'ídadeezdláád; yá'ąąshdę́ę́' bee ak'ihojidlíii bee hak'idahodzisdli'; Níłch'i Diyinii bibee adziilii łahjį' hwee dahazlį́į́';

⁵Diyin God bizaad éí yá'át'éehii át'é dazniizį́į́', áádóó łahgo náhodeesdzáago bee adziil dooleełígíí ła' hoł béédahoozin.

⁶Éí t'ą́ą́' anídahizneezdee'go łahgo át'éego tsínáhodookosjį' ánáhodi'yoot'ishgi ts'ídá doo bohónéedzą́ą da, háálá t'áá hó hániik'eh tsin ałnáoszid bikáa'jį' Diyin God biYe' bił anááda'dziskaal nahalingo bee baa nináájíkai, índa t'áá ííshjání nilį́įgo t'óó baa yáhásinígi ánáádajííł'įįd.

⁷Kéyahgi t'áá ahą́ą́h nááháłtį́įhgo tó łeeh sinitséedii, áádóó nanise' chodao'íinii yindaalnishii bá hááhinoot'į́įłii éí bá Diyin God yik'ijidlíi łeh.

⁸Nidi bikáa'gi hosh índa ch'il deeníní hanoot'ą́ągo, éí doo ílį́į́góó baa nitsáhákees, índa doolchxǫǫłgo bá ha'doodzihgi bich'į' hoolzhish, áko t'óó kǫ' bee adidoolk'ą́ą́ł.

⁹Nidi ayóó'ádanihíínísh'níinii, azhą́ kót'éego nihich'į' ádadii'níi nidi, aají nihí nihił haz'ą́ą́jí t'áá aaníí yisdánáhisoohkaigo éí bee ak'ihojidlíii yee nihik'ijidlíigo nihił béédahózin, éí t'ah aláhígo yá'ádaat'ééh.

¹⁰Háálá baa nidasoohkaígíí áádóó Diyin God bidiyį́į́' ayóó'ádeínóh'níigo bá nidasooł'a'ígíí, k'ad Diyin God t'áá ákogi é'éł'į́įgo t'ahdii bá nidaał'a'ígíí doo yaa yoonéeh da.

¹¹Áko t'ááłá'í nootínígo t'áá nihonít'i'jį' t'áá ákót'éego bídanoohdlį́į doo danihííníi'ní, áko bíká nihił chodahoo'íinii nihá bi'doolnííł.

¹²T'áadoo ádadahodoohłáhí, nidi da'oosdląądgo hada'ólníigo Diyin God aidiní'áanii bíí' dadooleełígíí bida'oł'į́į le'.

¹³Diyin God éí Éíbraham yich'į' haadzíí' yę́ędą́ą́' náánáła' yiláahdi át'éii biniit'aa ádee hadidoodzihígíí t'áá ádingo biniinaa t'áá bí ádee hadoodzíí',

¹⁴kóníigo, Nik'ijishdlíigo éí t'áá íiyisí nik'ijishdlíi doo, áko k'ee'ąą nooht'į́įłgo éí nits'ą́ą́dóó t'áá íiyisí k'ee'ąą anoot'į́įłgo ándeeshłííł.

¹⁵Áko Éíbraham nízaadgóó ha'joosniidgo Diyin God hach'į' yee ádee hadoodzíi'ii hwee hazlį́į́'.

¹⁶T'áá háiida ádee hadidzihgo diné haláahdi át'éii biniit'aa ádee hadidzih łeh, ákót'éego doo ałgha'dit'ááh nááhódlǫ́ǫ da.

¹⁷Diyin God binahat'a' doo łahgo ánáo'ne' át'éii yee haadzíi'ii hwee dahodooleełígíí ts'ídá t'áadoo naaki nilíní hoł béédahózingo áhodeeshłííł niizį́į'go ádee hadoodzíí'.

¹⁸Áko naaki góne' haz'ą́ ts'ídá doo łahgo ánáo'ne' át'éii yee Diyin God doo biyooch'ííd wóle' át'ée da. Áko éí binahjį' nihí doo yá'át'éehii bik'ee Diyin God bich'į' adahiniichą́ą'ii yá'át'éehii nihidáahdi hólóonii bíká nihił chodahoo'íinii deidiiltsołgo yéego bee chánah daniidlį́į doo.

¹⁹Tsinaa'eeł bee dah náhátł'óohii nahalingo éí bíká nihił chodahoo'íinii bee nihii' naazíinii daniłdzil. Aláahgo náá'iiłniihii dáádiníbaal bine'góó Diyin God hólǫ́ǫdi yah anádááh yę́ęgi át'éego nihí éí bíká nihił chodahoo'íinii Diyin God baa hiikai.

²⁰Jesus éí Diyin God hólǫ́ǫdi nihilą́ąjį' yah ííyá. Éí Melkízedek náá'iiłniihii nilį́ yę́ęgi át'éego hool'áágóó aláahgo náá'iiłniihii silį́į́'.