Read Navajo HEBREWS 7 Bible Online

HEBREWS 7 - Navajo bible

HEBREWS 7

¹Melkízedek, éí Séílemgi aláahgo naat'áanii jílį́įgo, Diyin God Aláahgo Ayóó'át'éii bináá'iiłniihii jílį́. Éíbraham aláahgo naat'áanii danilíinii neistseedę́ę́' náádáałgo Melkízedek bidááh níyá áádóó bá sodoolzingo bik'ijisdli'.

²Áko Éíbraham bi'ana'í danilį́į́ nít'ée'ii binaalye'é t'áá ałtso neeznáá daníjaa'ígíí éí t'ááłá'ígo shijaa' Melkízedek yeinínil. Melkízedek éí átséhé góne' bízhi' bik'ehgo ts'ídá t'áá ákogi é'ét'ééjí aláahgo naat'áanii nilį́ jiníigo ájíní, áádóó Séílem aláahgo yinanit'a'í nilį́įgo éí hózhǫ́ǫ́jí naat'áanii jiníigo ájíní.

³Bizhé'é áádóó bimá éí t'áadoo ła' yééhósiní da, dabizhé'é yę́ę nidi t'áadoo ła' yééhósiní da, áádóó hojideezlį́į'gi índa nááho'diilyáhígíí nidi doo bééhózin da. Diyin God biYe' hool'áágóó náá'iiłniihii nahojílin.

⁴Jó áko, dooládó' ayóó át'éii jílį́į da lágo baa nitsídaahkees! Éíbraham nihizhé'é nít'ée'ii éí bi'ana'í danilį́į́ nít'ée'ii binaalye'é neeznáá daníjaa'ígíí éí t'ááłá'ígo shijaa' Melkízedek baazhdiní'ą́.

⁵Líívai dine'é ahoolchíiłii, náá'iiłniihii danilíinii éí diné bee dahólónígíí neeznáá daníjaa'ígíí éí t'ááłá'ígo shijaa' baa dahajáah doogo bee bá nahaz'ą́, éí bidine'é danilíinii ákódaadzaa, Éíbraham bits'ą́ą́dóó ahoolchíiłii nidi ákódaadzaa.

⁶Azhą́ Melkízedek éí Líívai da'ahílchíhígíí doo bits'ą́ą́dóó jílį́į da nidi, Éíbraham éí t'áadoo le'é neeznáá daníjaa'ígíí éí t'ááłá'ígo shijaa' haidiní'ą́, áko Éíbraham éí Diyin God bich'į' haadzíi'go ádee hadoodzíi'ii bik'ijisdli'.

⁷T'áadoo naaki nilíní aláahgo át'éii éí a'ohgo át'éii yik'ijidlíigo bééhózin.

⁸Líívai dine'é ahoolchíiłii, éí t'áadoo le'é neeznáá daníjaa'ígíí éí t'ááłá'ígo shijaa' bich'į' nidahalyéhígíí éí danoonééł, nidi t'áá Diyin God bizaad bee ak'e'ashchíinii ánínígi át'éego Melkízedek éí hináanii nilį́įgo bich'į' na'iilyé.

⁹Ła'da nidi kódidooniiłgo haz'ą́, éí t'áadoo le'é neeznáá daníjaa'ígíí éí t'ááłá'ígo shijaa' Líívai bich'į' nahalyéé nít'éé'. Azhą́ ákót'ée nidi Éíbraham biniit'aa Melkízedek yich'į' na'nílá.

¹⁰Háálá Éíbraham éí Melkízedek bidááh níyáádą́ą́' Líívai t'ah doo hojileeh da nidi Éíbraham bits'ą́ą́dóó hozhdooleeł.

¹¹Líívai dine'é nááda'iiłniihii danilį́įgo Diyin God yee has'áanii Ízrel dine'é yeidiní'ą́. Líívai dine'é nááda'iiłniihii bee hadaałt'é yiidleełgo ha'át'íísh biniyé náá'iiłniihii ła' doo Éran át'éé nít'é'ígi át'éii, nidi Melkízedek át'éé nít'é'ígi át'éii hánáádeiit'į́į doo?

¹²Háálá nááda'iiłniihii ła' nináhá'níiłgo bee haz'áanii ałdó' łahgo ádoonííł.

¹³Jesus, baa yádeiilti'ígíí, doo Líívai dine'é bitahdóó jílį́į da, nidi náánáła' dine'é bitahdóó jílį́, áko éí dine'é bitahdóó ła' bikáá' náá'iiniihí si'ą́ągi t'áadoo náá'dziisnii' da.

¹⁴Háálá nihiBóhólníihii t'áadoo bahat'aadí Júdah bits'ą́ą́dóó oochíiłii nilį́įgo bééhózin, áko éí dine'é danilínígíí bitahdóó náá'iiłniihii danilį́į dooleełgi Mózes t'áadoo yeiníst'įįd da.

¹⁵Áko díidíígíí ts'ídá wózhǫ́ t'áadoo bahat'aadí nihileeh: Melkízedek náá'iiłniihii át'éé nít'é'ígi át'éii dzizlį́į́'.

¹⁶Éí doo diné bibee haz'áanii bik'ehgo náá'iiłniihii dzizlį́į' da, nidi iiná doo óodįįh át'éii bibee adziilii bik'ehgo náá'iiłniihii dzizlį́į́'.

¹⁷Háálá kót'éego baa hóóne', Melkízedek náá'iiłniihii nilíinii bik'ehgo hool'áágóó náá'iiłniihii nílį́.

¹⁸Jó, átséédą́ą́' bee haz'áanii doo bidziil da áádóó doo choo'ínígíí biniinaa nahjį' kólyaa.

¹⁹Bee haz'áanii t'áadoo ha'át'íhída hadaałt'éego áyiilaa da. Áko k'ad bee haz'áanii biláahgo át'éii bíká nihił chohoo'íinii yee nihá haadzíí'. Éí bee Diyin God baa hiikááh.

²⁰Diyin God ádee hadoodzíi'ii bee Jesus náá'iiłniihii nilį́įgo baa ákohwiiniidzį́į́'.

²¹Nahdę́ę́' náá'iiłniihii danilį́į́ nít'ée'ii éí doo Diyin God yee ádee hadoodzíi'ii bee náá'iiłniihii dadzizlį́į' da. Nidi Diyin God éí ádee hadoodzí'ę́ę biniit'aa Jesus náá'iiłniihii dzizlį́į́'. Háálá áháłní, Bóhólníihii ádee hadoodzíí', áádóó doo łahgo át'éego tsíńdookos da, Melkízedek náá'iiłniihii nilį́į́ nít'ée'ii bik'ehgo hool'áágóó náá'iiłniihii nílį́, bi'doo'niid.

²²Áko éí biniyé Jesus biniit'aa bee aha'deet'áanii aláahgo át'éii nihá ályaa.

²³Nahdę́ę́' nááda'iiłniihii t'áá aaníí t'óó adahayóí nít'éé', háálá daninéego biniinaa binaanish doo t'áá náás deít'éeh da nít'éé'.

²⁴Nidi Jesus t'éiyá t'áá áłahjį' náá'iiłniihii jílį́, háálá t'áadoo ła' hatsásk'ehjį' ooya'ígóó jiináago ahool'á.

²⁵Éí bąą hó hwee Diyin God yaa hakáhígíí t'áá nihonít'i'jį' yisdájiiníiłgo bízhneel'ą́, háálá bá na'ak'íyájíłti' doo biniyé t'áá áłahjį' jiiná.

²⁶Jesus éí aláahgo náá'iiłniihii nilį́įgo nihá yá'át'ééh. Éí diyin, áádóó doo bik'íhát'áah da, bąąhági át'éii bąąh ádin, bąąhági ádaaníiłii bits'áltį́, áádóó aghánáhóó'áadi dah bidi'neesdá.

²⁷Jesus éí nahdę́ę́' aláahgo nááda'iiłniihii ádaat'į́ yę́ęgi át'éego t'áadoo ádzaa da. Nahdę́ę́' aláahgo nááda'iiłniihii t'áá ákwíí jį́ bibąąhági ádaat'éii biniyé nááda'iiłniih nít'éé', áádóó índa diné ałdó' bibąąhági ádaat'éii biniyé nááda'iiłniih nít'éé'. Nidi Jesus t'áá bí náá'ádiisnii' yę́ędą́ą́' t'ááłáhídiígíí ałtso náá'ádiisnii'.

²⁸Aláahgo nááda'iiłniihii doo t'áá ákwii ádaat'éii bee haz'áanii bik'ehgo ninábidi'nił nít'éé', nidi éí bee haz'áanii bikéé'dóó Diyin God saad yee ádee hadoodzíi'ii bik'ehgo biYe' aláahgo náá'iiłniihii nilį́į doogo niiníłtį́. Éí hool'áágóó t'áá sahdii ats'áyiiníłtį́.