Read Navajo JAMES 2 Bible Online

JAMES 2 - Navajo bible

JAMES 2

¹Shik'isóó, Jesus Christ nihiBóhólníihii, éí Bóhólníihii ayóó át'éii deinohdlą́ągo t'áadoo diné ał'ohgo baa nitsídaahkeesí.

²Jó, diné ła' óola yoostsah bąąh si'ą́ągo áádóó éé' t'áá íiyisí nizhónígíí yee hadít'éego áłah nohłį́į́ góne' nihił yah ííyáago, áádóó nít'éé' diné ła' bahojoobá'íii anilí yee hadít'éego nihił yah anáánáádzáago,

³nít'éé' diné t'áá íiyisí nizhónígo hadít'éii t'éiyá nihił nilį́įgo, Kwe'é dah nídaah, bidooniidgo índa diné bahojoobá'ígíí, T'áá aadi sínízį́, doodaii', Shijátahdóó nídaah, bidooniidgo,

⁴da' doósh ał'ohgo ahaa nitsídaakeesii dasoolį́į' da? Da' doósh nichxǫ́'ógo aa nitsídaahkeesgo aa nídaat'íinii dasoolį́į' da?

⁵Da'íísółts'ą́ą́', shik'isóó ayóó'ánihósh'níinii, jó, nihokáa'gi badahojoobá'íii oodlą' deidoot'įįłgo índa Diyin God bee bóhólníihgo bił haz'áanii bíí' dadooleełgo ts'ídá nábiizláá'. Éí ayóó'ádabó'níinii bíí' dooleełgo yee nihoní'ą́.

⁶Nidi diné bahojoobá'íii doo nihił dáálįįd da. Jó, da'at'íinii ts'ídá nihide ádahósin ya'? Jó, aa nídahat'į́įjį' ts'ídá adanihii'éésh ya'?

⁷Hó lá yízhí ílíinii bee danihi'dójíhígíí ts'ídá nichxǫ́'ógo bá hadadziidziih.

⁸Diyin God bizaad bee ak'e'ashchíinii bik'ehgo Diyin God éí Aláahgo Naat'áanii yee has'áanii kóní, T'áá ni ádííní'nínígi át'éego bił kééhót'íinii ayóó'ííní'ní. Éí bee haz'ánígíí bik'eh dahonoł'į́įgo yá'át'éhígi ádaaht'į́į doo.

⁹Nidi diné ał'ohgo baa nitsídaahkeesgo éí nida'iyohsííh, áko bee haz'áanii yilááh nidahidiltaałii danohłį́įgo bee haz'áanii nihainít'į́.

¹⁰Háálá t'áá háiida bee haz'áanii t'áá át'é bik'eh hojíł'į́į nidi, t'ááłáhígo haz'ą́ dzisiihgo, t'áá át'é bee ádihozhdiilt'i'go át'é.

¹¹Háálá, Ts'ídá doo azhdilée da, nínígíí ałdó', Diné ts'ídá doo diyííłhéeł da, ní. Áko doo adílée da nidi diné síníłhį́įgo bee haz'áanii yilááh nideeltáalii sínílį́į́'.

¹²Áko Diyin God yee has'áanii diné yéé'iiłníihii bik'ehgo nihá nihwiit'aah dooleełii danohłį́įgo éí bik'ehgo hadahohdziih áádóó ádaahníił le'.

¹³Háálá doo aa a'ááh jiniizį́'ígíí éí Diyin God doo haa a'ááh nízingóó há nihodoo'ááł; aa a'ááh hasin éí aa hwiinít'į́ yik'eh didlį́.

¹⁴Shik'isóó, diné ła', Ooshdlą́, níigo, nidi bi'oodlą' doo yik'eh át'éégóó, ha'át'íísh bá nídoodleeł? Oodlą' ákót'éii daats'í yisdábidoołtééł? Dooda lą́ą!

¹⁵Ak'is, doodaléi' alah nilíinii ła' bik'i ni'iizt'óodgo áádóó ch'iyáán bee ádingo,

¹⁶yídin nilíinii t'áadoo ła' baa nołéhé, T'óó nílááh, nił hózhǫ́ǫgo t'áadoo nidlóhí índa hwiih nílį́įgo yínááł, bidooniidgo, éishą' ha'át'íí nídoodleeł?

¹⁷T'áá ákót'éego hwe'oodlą' t'áá bízhánígo, ó'oo'níiłii bąąh ádingo, t'áadoo nánídlíní da.

¹⁸Nidi diné ła'da ádidooniił, Ni éí iinídlą́, nidi shí t'éí yá'át'éehgo ááshnííł. Haa'íshą' ááníiłii t'áágééd ne'oodlą' shił ííshjání ánílééh, áko shí ałdó' ááshníłígíí bik'ehgo she'oodlą' nił ííshjání ádeeshłííł.

¹⁹Diyin God t'ááłá'í hólǫ́ǫgo yinídlánígíí éí yá'át'ééh. Jó, níłch'i bida'iiníziinii ákót'éego da'oodlą́ą nidi yik'ee bił daayée'go bitah dahoditłid.

²⁰Dooládó' diné doo hóyáanii nílíinii, ájooníiłii t'áágééd hwe'oodlą' t'áadoo nánídlíní daígíísh shił bééhodoozįįł nínízin?

²¹Éíbraham yę́ę, nihizhé'é nilíinii, bikáá' náá'iiniihí bikáa'gi biye' Áízak niiníłtį́ yę́ędą́ą́' t'áá bí ádzaaígíí bee ts'ídá t'áá ákogi át'éego bá ha'oodzíí'.

²²Jó, Éíbraham bi'oodlą' áádóó ááníłígíí t'áá yił yoołt'ihgo ááníłígíí bee bi'oodlą' ła'yiyiilaaígíí k'ad nił bééhoozin.

²³Áko Diyin God bizaad bee ak'e'ashchíinii kónínígíí bohoolyaa, Éíbraham éí Diyin God joosdląąd, áko ts'ídá t'áá ákogi ájít'éego há haadzíí'. Áko Diyin God bik'is jílį́įgo há ha'oodzíí'.

²⁴Jó, kót'éego nihił béédahoozin, diné ájooníłígíí bee Diyin God bił t'áá ákogi ájít'é jileeh, hwe'oodlą'ígíí ájooníiłii doo bił joołt'ihgóó éí doo bíighah da.

²⁵T'áá ákót'éego ałdó' Réíhab, ałjiłnii nilíinii, éí hane' neii'áhí yah ayíí'eezh yę́ędą́ą́', áádóó nák'ee'ąągo ch'ínéiníł'a' yę́ędą́ą́'; ádziidzaaígíí bee Diyin God bił ts'ídá t'áá ákogi ájít'é dzizlį́į́'.

²⁶Háálá hwii' sizíinii t'áágéedgo hats'íís doo hináa da, t'áá ákót'éego ałdó' ájooníłígíí hwe'oodlą' doo bił joołt'ihgóó t'áadoo nánídlíní da.