Read Navajo JAMES 4 Bible Online

JAMES 4 - Navajo bible

JAMES 4

¹Nihitahgi ahigą́ índa ahinídiiltłáadshą' háádę́ę́' nihwiileeh? Da' doósh nihe'adáhonooni' nihiyi'di naalnishígíí bits'ą́ą́dę́ę́' nihwiileeh da?

²Laanaa danohsin nidi doo nihee dahaleeh da; nida'ołtseed, áádóó nihił adááh dahaníi nidi doo shódeinołt'eeh dago, t'óó ahináádoohjah áádóó da'ahohgą́. Bídin danohłínígíí doo Diyin God bídeínóhkeedgóó biniinaa doo nihee dahaleeh da.

³Dayínóhkeed nidi doo nihee dahaleeh da, háálá biniyé dayínóhkeedígíí doo yá'át'éeh da, nihił dahoneełni t'éí biniyé dayínóhkeed.

⁴Nihí adiléhí danohłíinii, nihokáá' bił nidahazt'i'ii nihił bidáádahaníigo Diyin God bi'ana'í danohłínígíísh doo nihił béédahózin da? Éí bąą t'áá háiida nihokáá' bił nidahazt'i'ii hoł bidááhánínígíí Diyin God bi'ana'í íz'dólzingo át'é.

⁵Diyin God bizaad bee ak'e'ashchínígíí doo t'áadoo biniyéhígóó kóníigo bee ak'e'ashchį́, Níłch'i nihii' naazį́įgo áyiilaii éí laanaa nízingo oołch'į́į́d.

⁶Nidi t'ah aláhídi át'éego Diyin God aa jooba', éí bąą bizaad bee ak'e'ashchíinii kóní, Diyin God éí diné ádaa daha'niihii yik'ijį' nilį́, nidi diné a'ohgo ádaa nitsídaakeesii yaa jooba'.

⁷Éí bąą Diyin God baa ádadiyoht'aah. Níłch'i bida'iiníziinii binanit'a'í bich'į' nidaałdzilgo nihits'ádoolwoł.

⁸Diyin God baa hohkááh, áko bí ałdó' nihaa doogááł. Bąąhági ádaahníiłii, nihíla' táádaahgis. T'áá naaki nilį́įgo nitsídaahkeesii, nihijéí chin bąąh ádaadingo ádaahłééh.

⁹Yínííł bik'ee ti'dahoohnííh, áádóó atínidadinohdleeh, índa daahcha. Bíni'dii nihidloh hasinii atínáhodinidleeh náádleeł, áádóó bíni'dii nihił dahózhónígíí éí yínííł náádleeł.

¹⁰Bóhólníihii binááł a'ohgo ádaa nitsídaahkees, áko ayóó át'éii danohłį́įgo ánihidoolííł.

¹¹Shik'isóó, t'áadoo nichxǫ́'ógo ahaa yádaałti'í. T'áá háiida Christ bee ak'is nilį́įgo nichxǫ́'ógo baa yájíłti'ígíí, doodaii' baa níjít'ínígíí éí Diyin God yee has'áanii nichxǫ́'ógo baa yájíłti' áádóó baa níjít'į́įgo át'é. Jó, bee haz'áanii baa níjít'į́įgo bee haz'áanii doo yik'ehgóó ááníiłii jileeh, bee haz'áanii yik'i hodii'aahii jileeh.

¹²Diyin God t'éiyá bee haz'áanii ííł'íinii áádóó ánihwii'aahii nilį́. T'áá bí t'éiyá yisdá'iinííł, áádóó ałdó' í'doołdįįłgo yíneel'ą́. Áko nishą' ha'át'íí nishłį́ nínízingo bił kééhót'íinii baa nánít'į́?

¹³Haa'íyee', kódadoh'níinii, Díí jį́, yiską́ągoda kin haal'áajį' diikah, ákwii nihaa nida'iiniihgo nídoohah, áko béeso nihee dahodooleeł.

¹⁴Éí azhą́ yiską́ągo áhodooníłígíí doo nihił béédahózin da nidi ádadohní. Jó, nihe'iina'shą' ha'át'íí át'é? Áhí t'óó kónígháníjį' haleehgo ádįįhígíí nahalinii át'é.

¹⁵Kódadohníi dooleeł yę́ę, Bóhólníihii íinízin ládą́ą́' dahinii'náa doo, díidída, doodaii' níléidída baa nidiikah.

¹⁶Nidi ádaa dadzíínóhdlíigo ádaa dahohniih. Ákót'éego ádaa ha'niih t'áá ałtso doo yá'át'éeh da.

¹⁷Éí bąą t'áá háiida ha'át'íhída yá'át'éehgo ádoolníłígíí hoł bééhózin nidi doo ájoonííłgóó éí bee ádił ni'dziilzííh.