Read Navajo I PETER 1 Bible Online

I PETER 1 - Navajo bible

I PETER 1

¹Shí Peter, Jesus Christ yá yil'aadii nishłíinii. Pántas, Galéíshiya, Kapadóshiya, Éízha, índa Bithíniyagóoda tabidi'nooskaadgo áadi dé'éyóní danilį́įgo kéédahat'íinii bich'į' naaltsoos áshłééh.

²T'áá átséedi Diyin God aTaa' nilíinii nihá yinahaz'ą́ągo, Níłch'i Diyinii bee diyingo ádanihi'diilyaago Jesus Christ bik'eh dahonoł'į́į doo, áádóó bidił nihik'ídadooltahgo nihibąąhági át'éii nihąąh ádingo íidoolííł biniyé atah nihiizláá'. Bibee ajooba' índa bibee ach'į' hózhǫ́ náhásdlį́į'ii k'ee'ąą yileełgo yee nihik'ijidlíi doo.

³NihiBóhólníihii Jesus Christ biDiyin God, t'áá éí biTaa' nilíinii baa dahwii'niih le'! Éí ayóó át'éego nihaa a'ááh niizį́į'go ił chohoo'į́ doo ninít'i'ii nihee hodooleeł biniyé Jesus Christ daaztsą́ą́dę́ę́' néidiisáhígíí bee náádanihi'dizhchį́.

⁴Áko nihíí' dadooleełii doo diłdzidii, doo yichxǫǫhii, índa doo łahgo ánáo'ne' át'éii yá'ąąshdi nihá hasht'e'niilyáhígíí nihaa doolyéełgo bíká nihił chodahoo'į́,

⁵nihí nihe'oodlą' binahjį' Diyin God bibee adziilii bee nihaa ádahayą́ągo yisdánihidoo'nilgo niiníłką́ądi yit'íní ánihidi'doolníiłgo hasht'enihi'dólzin.

⁶Azhą́ k'ad t'óó kónígháníjį' ał'ąą át'éego bee nanihídahonitaahígíí bik'ee yínííł ádanoht'ée nidi, éí nihił chodahoo'ínígíí t'áá íiyisí baa nihił dahózhǫ́ǫ le'.

⁷Nihe'oodlą' daats'í bee nihidahoníłdzilgo bééhodoozįįł biniyé nanihídahonitaah. Óola éí doo hool'áágóó hólǫ́ǫ da, nidi nihe'oodlą' hool'áágóó hólǫ́. Jó, kǫ' bee óola bąąh hadoolyį́'ígíí biláhídi át'éego nihe'oodlą' nabóhonitaahgo ílį́įgo bééhodoozįįł. Áko Jesus Christ yá'ąąshdę́ę́' yit'íní í'diilyaago nihe'oodlą' baa hodoo'nih áádóó ił nilį́į doo, índa ayóó át'éii bidi'níi doo.

⁸T'ah doo dahoołtséeh da nidi ayóó'ádahwíínóh'ní; azhą́ k'ad doo dahooh'į́į da nidi dahwiinohdlą́ągo haa dadzíínóhłíigo nihił dahózhǫ́. T'áá íiyisí ił hózhóonii doo baa yájóołti' át'éii bee nihił nidahoozhǫǫh!

⁹Háálá nihe'oodlą' ła'yiyiilaaígíí binahjį' nihii' sizíinii yisdá'iildééh shódayoost'e'.

¹⁰Diyin God bá dahojilne'ii díí yisdá'iildéhígíí hazhó'ó bínda'ízhdééłkidgo nidadziskáá', áádóó Diyin God bibee ajooba' yee nihik'izhdoodliiłígíí nee'ni'jį' baa dahojoolne'.

¹¹Christ ti'hwiidoonihígíí áádóó bik'ijį' ayóó át'éii dooleełígíí t'áá átséedi Christ biNíłch'i Diyinii hwii' dahólónígíí éí hoł éédahoosįįd, áko, Hahgo lá índa haa'í lá hoolzhishgo áhodoonííł lá, dajiníigo nidadziskáá'.

¹²Yá'ąąshdę́ę́' Níłch'i Diyinii hadaal'a'ígíí bibee adziilii bee hane' yá'át'éehii yaa dahalne'ii díí yee nihił dahoolne'. Éidí diyingo nidaal'a'í nidi hoł béédahoozį́į́' laanaa ch'ééh danízin. Diyin God yá dahalne'ii díí t'áá bítséedi yaa dahalne'go doo t'áá bí ádá ádáát'įįd da, nidi nihí nihá nidaal'a'go Diyin God bił ííshją́ą́ áyiilaa.

¹³Áko hasht'e'nitsídanohkees, ádaa ádahołyą́, áádóó Jesus Christ yit'íní í'diilyaadi Diyin God bibee ajooba' yee nihik'izhdoodliiłígíí nideínóhłíigo bíká nihił chodahoo'į́į le'.

¹⁴Áłchíní ak'eh hół'ínígi át'éego Diyin God bik'eh dahonoł'į́. Jesus t'ah doo béédahonohsįįh yę́ędą́ą́' nihił adáádahaníí nít'ée'ii t'áadoo bik'ehgo dahinohnání.

¹⁵Nidi Diyin God nihíká ádííniidígíí diyin nilínígi át'éego nihí ałdó' t'áá ałtsojį' diyingo dahinohnáa doo.

¹⁶Háálá Diyin God bizaad bee ak'e'ashchíinii kóní, Dadinohyin, háálá shí dinishyin.

¹⁷Diyin God éí, aTaa' nílíinii, dabidohníigo, nahasdzáán bikáa'gi t'ah dahinohnáago dahodíínóhsingo bá dahinohná. Diyin God doo ał'ohgo aa nitsíkeesii éí t'ááłá'í jinítínígo ádajíít'įįdii bik'ehgo haa nídóot'įįł.

¹⁸Háálá nihił béédahózingo danihizhé'é yę́ę bi'é'él'į' t'áadoo nánídlínígóó yee nidanihineestą́'ígíí bits'ą́ąjį' náádanihi'diiznii'. T'áadoo le'é áádįįłii, béésh łigaii, doodaii' óolada éí doo bee náádanihi'diiznii' da,

¹⁹nidi dibé yázhí hadaałt'éii, doo bąąh dahaz'áaniigi át'éii, Christ bidił ílíinii bee náádanihi'diiznii'.

²⁰Éí nahasdzáán t'ah doo álnééhdą́ą́' Diyin God hak'i diilnii', áádóó nihoolzhíísh t'ah doo baa yíłkaahgóó nihá yit'íní áho'diilyaa.

²¹Honiit'aa Diyin God baa dadzíínóhłí, éí dadziztsą́ą́dę́ę́' nááhodiisá áádóó ayóó át'éii áhoolaa. Áko Diyin God deisoohdląądgo biniiłt'aa nihił chodahooz'įįd.

²²Saad t'áá aaníinii bik'eh dahonoł'ínígíí bee nihii' sizíinii bąąhági át'éii bąąh ádingo ádanihi'diilyaa, áádóó Níłch'i Diyinii bee nihik'isóó danilíinii t'áá aaníí ayóó'ádeínóh'ní dasoolį́į́'. Áyąądą́ą́' ts'ídá haleebee ayóó'áda'ahíínóh'níi le'.

²³Háálá náádanihi'dizhchį́, álástsii' diłdzidii bee éí dooda, nidi doo diłdzidii, éí Diyin God bizaad hináanii, doo bá nihonít'i'ii bee náádanihi'dizhchį́.

²⁴Háálá nihokáá' dine'é t'áá ádzíłtso ch'ilgi ádajít'é, áádóó bee ayóó ádajít'éii ch'ilátah hózhóonii nidahalin. Ch'il dahiniiłnééh, áádóó ch'ilátah hózhóonii nidahindéeh łeh.

²⁵Nidi Bóhólníihii bizaad éí hool'áágóó hólǫ́. Éí saadígíí hane' yá'át'éehii át'éego bee nidanihidi'neestą́ą́'.