Read Navajo I PETER 2 Bible Online

I PETER 2 - Navajo bible

I PETER 2

¹Áko áká naat'á áts'á dahidoht'aah; t'áadoo danihiyooch'ídí, t'áadoo t'óó ádahodoł'íní, t'áadoo da'ahoołch'į́dí índa t'áadoo nichǫ́'ógo ahaa yádaałti'í.

²Awéé'chí'í abe' yídin danilínígi át'éego nihí ałdó' Diyin God bizaad abe' chin bąąh ádinii át'éego bídin danohłį́į le'. Éí bee danóohséeh doo.

³Háálá Bóhólníihii bibee ajooba' t'áá íídą́ą́' dasoolįhgo ákót'é.

⁴Bóhólníihii, éí tsé hináanii nilíinii, diné doo dabiniizį́į'ii nidi Diyin God bił nilį́įgo nibiníłtíinii baa hohkááh.

⁵Nihí ałdó' tsé hináaniigi ádanoht'éego Níłch'i Diyinii k'ehgo kin nihee ádaolne'. Diyingo nááda'iiłniihii danohłį́įgo, Níłch'i Diyinii k'ehgo náádahidoołnihii, éí Diyin God bił yá'át'éehii Jesus Christ bee Diyin God bich'į' náádahołniih.

⁶Háálá Diyin God bizaad bee ak'e'ashchíinii kóní: Jó'akon, Záíyangi tsé bee naaná'ástł'inii ílį́įgo ats'ání'áanii ninish'aah, áko hoodlą́ągo ha'ólíhígíí doo haa yánízingóó ábidi'doolnííł.

⁷Éí bąą nihí da'iinohdláanii nihich'į'go ajílį́, nidi doo da'oodlání bich'į'go t'éí: Kin ádeił'íní tsé doo deiniizį́į' da yę́ę, t'áá éí tsé bee naaná'ástł'inii dzizlį́į́'.

⁸Tsé bik'ee dahizhdidoogohii, áádóó tsé bik'ee ádił ayoolzihii át'é. Saad doo bik'eh dahojíł'į́į́góó biniinaa dahizhdigeeh. Jó, t'áá há bee nidahodiist'ą́.

⁹Nidi chahałheeł bits'ą́ąjį' ayóó ánóolningo Diyin God bibee adinídíinjį' nihíká ádííniidígíí ayóó át'éego yee ááníiłii baa dahohniih doo biniyé t'ááłá'í dine'é nohłį́įgo nánihi'diilyá, áádóó aláahgo naat'áanii danohłį́įgo nááda'iiłniihii danohłį́, áádóó dine'é diyinii índa Diyin God bíí' danohłį́.

¹⁰Nahdę́ę́' łah t'áadoo bíí' danohłíní da nít'éé', nidi k'ad Diyin God bíí' dasoolį́į́'; łah Diyin God bibee ajooba' doo nihee dahólǫ́ǫ da nít'éé', nidi k'ad bibee ajooba' nihee dahazlį́į́'.

¹¹Ayóó'ánihósh'níinii, nahasdzáán bikáá'góó t'óó tádadohnéehgo naałdeehii índa dé'éyóní danilínígi ádanoht'éego nánihooshkąąh! Nihits'íís bibee adáhonooni' bits'ą́ąjį' ádadíí'nółzin, háálá éí ii' sizíinii yik'ijį' anaa' áhósin.

¹²Doo Jew dine'é danilíinii bitahgóó niha'át'e' ádaadingo dahinohnáa le'. Áko bąąhági ádaaníiłii k'ehgo nihaa yádaałti' nidi yá'át'éehgo ádaahníłígíí yaa ákodahiniizįįhgo Diyin God bik'i hoole'go yaa dahaniih doo.

¹³Bóhólníihii bá ádaaht'į́įgo diné bi'óhólnííh t'áá ałtso bídahwíínółnííh: alą́ąjį' naat'áanii nilíinii, éí ts'ídá aláahdi nant'áii bi'óhólníihii bídahwíínółnííh,

¹⁴áádóó naat'áaniishchíín danilíinii, éí doo ákǫ́ǫ́ ádaat'íinii atídeidoolííł áádóó yá'át'ééh ádajooníiłii haa daha'niih doo biniyé nihich'į' nabidi'nilgo bídahwíínółnííh.

¹⁵Jó, Diyin God nihá íinízingo diné doo ádahalyą́ą́góó t'óó dzólníígóó yádaałti'ii éí nihí t'áá ákogi áda'oohłíłígíí dayoo'į́įgo ádaa yádadínóodzįįłgo dadidoołhił.

¹⁶Diné doo bohodiit'i'ii danohłį́įgo dahinohná, nidi doo nihidahodiit'i'ígíí t'óó bik'ijį' nisooł'ą́ągo t'áadoo bąąhági ádaaht'íní. Diyin God yá naalte' danohłį́įgo dahinohná.

¹⁷Diné t'áá ałtso nihił danilį́į le'. Christ bee ałk'isóó danidlíinii ayóó'ádeínóh'ní. Diyin God dadíínóhsin. Aláahgo naat'áanii nihił danilį́į le'.

¹⁸Naal'a'í danohłíinii, nihinanit'a'í íiyisí nihił danilį́įgo bídahwíínółnííh, dajooba'ii áádóó bá ádahwiinít'į́'íii doo éí t'éiyá da, nidi doo daats'íidii ałdó' nihił danilį́įgo bídahwíínółnííh.

¹⁹Azhą́ doo ákwii át'éégóó atího'dil'į́į nidi Diyin God hoł hólónígíí bee ádaa ákoznidzingo, éí ti'hojooníhígíí bich'į' ha'jólníigo Diyin God haa bił hózhǫ́.

²⁰Doo ákǫ́ǫ́ ájít'ínígíí biniinaa náhodi'nilghałgo ha'jólníi nidi, t'áadoo bee haa hó'niihí da, nidi ts'ídá yá'át'ééh góne' ájít'ínígíí biniinaa ti'hodi'yoolníihgo ha'jólnínígíí éí Diyin God haa bił hózhǫ́.

²¹Ti'hoo'nííh bich'į' hada'íínółní biniyé Diyin God nihíká ádííniid, háálá Christ nihá ti'hooznii'go nihá áát'įįdígíí bik'ehgo bikéé' dayínóhkáah dooleeł nihó'ní.

²²Christ t'áadoo asiihígi da, índa ts'ídá t'áadoo yooch'ííd yee haadzíi' da.

²³Bi'déédzíí' yę́ędą́ą́' t'áadoo nát'ą́ą́' ná'éédzíi' da, ti'hooznii' yę́ędą́ą́' t'áadoo ił hóółyée' da, nidi Diyin God ts'ídá t'áá ákogi át'éego ánihwii'aahii yaa ádeet'ą́.

²⁴Bąąhági át'éii bich'į' danee'náago ts'ídá t'áá ákogi ádaniit'éego dahinii'náa doo biniyé Christ t'áá bí bits'íís yee nihibąąhági át'éii ák'iidiit'ą́ągo tsin ałnáoszid bąąhjį' yił ti'hooznii'. Éí bik'i nidzisk'ą́ągo ábi'diilyaaígíí bee hadaałt'é nídasoohdlį́į́'.

²⁵Háálá dibé yóó'ahekáhígi át'éego yóó'ahohkááh nít'éé', nidi k'ad Na'niłkaadii éí nihii' naazíinii yaa áhályáanii baa nináhisoohkai.