Read Navajo I PETER 3 Bible Online

I PETER 3 - Navajo bible

I PETER 3

¹T'áá ákót'éego, e'asdzą́ą́ danohłíinii, nihadahastiin bídahwíínółnííh. Ła' Diyin God bizaad doo yik'eh dahół'į́į da nidi be'asdzą́ą́ yá'át'éehgo dahinánígíí binahjį' da'iidoodląął. Azhą́ ts'ídá doo ha'át'íhída dabidohníi da nidi,

²t'áadoo bee nihik'ídahót'ahígóó áádóó dahodíínóhsingo dahinohnánígíí dayoo'į́įgo bí ałdó' da'iidoodląął.

³T'áadoo nihikáá'dóó át'éii dadíínóhshóní. Nihitsii' t'áadoo ayóogo nidaahch'ąąhí, áádóó óola bee na'ádích'ąąhii, índa éé' nidaashch'ąą'ii bee ádadíínółzhóní biniyé t'áadoo bee háádadooht'įįhí.

⁴Nidi t'áá aaníí nihiyi'di át'éii dadíínóhshóní. A'ohgo áda'díínółzin, áádóó t'áadoo ádił nídahodołchiłí. Ákódanoht'éego Diyin God t'áá íiyisí bił nilį́.

⁵Ałk'idą́ą́' sáanii dahodísinii Diyin God yaa dadzólíhígíí ákót'éego ádadílzhóní nít'éé', badahastiin yídahółnííh nít'éé',

⁶Sarah éí Éíbraham bóhonishníihii yiłníigo yik'eh hół'į́ yę́ęgi át'éego. Áko nihí ałdó', yá'át'éehgo ádaahníiłgo, áádóó t'áadoo nihił yéé' ádahóle'ígóó Sarah bik'ehgo ádaaht'į́į doo.

⁷T'áá ákót'éego, ahastiin danohłíinii, nihida'asdzą́ą́ hazhó'ó baa nitsídaahkeesígíí bik'ehgo bił dahinohná, háálá asdzání wolyéii nihi'ohgo bidziilígíí bąą nihił danilį́, háálá t'áá aheełt'éego iiná bee nihaa hojoosba'ígíí bee dahinohná. Kót'éego dahinohnáago sodołzingo nihisodizin doo dínóotł'ah da.

⁸Áko ánihidishní, Aheełt'éego nitsídaahkees, ahaa a'ááh danohsin, ałk'isóó danohłį́įgo ayóó'áda'ahíínóh'ní, nihá ádahwiinít'į́'ígo, índa a'ohgo ádaa nitsídaahkees.

⁹Nihich'į' doo yá'át'ééhgóó ádaat'íinii t'áadoo bich'į' doo yá'át'ééhgóó ánídaaht'íní, áádóó danihódziihgo t'áadoo nídeínóhdziihí, nidi bidiníná t'óó bá sodadołzin, háálá bee ak'ihojidlíii Diyin God yee nihik'izhdoodliił biniyé nihíká ádííniid.

¹⁰Háálá iiná bee ní'deeshdįįł índa yá'át'éehgo shíyoołkáał dooleeł jinízinígíí, saad doo adaaníinii t'áadoo bee yájíłti'í, índa t'áadoo na'adlo'go yájíłti'í doo.

¹¹Doo yá'ádaat'éehii bits'ázhdoogáałgo yá'át'éehii baa nijigháa doo; bee ach'į' hózhǫ́ náhásdlį́į'ii hájít'į́įgo, dziilí bee bíká ájít'į́į doo.

¹²Háálá ts'ídá t'áá ákogi ádajít'éii Bóhólníihii hak'idéez'į́į́', áádóó bich'į' sodazdilzingo hwíists'ą́ą́'. Nidi doo yá'át'ééhgóó ádajooníiłii éí Bóhólníihii honíł'į́įgo hak'ijį' nilį́.

¹³Ts'ídá yá'ádaat'éehii t'éiyá baa naasháa dooleeł danohsinígíí, háishą' yiniinaa atínihidoolííł?

¹⁴Azhą́ ts'ídá t'áá ákogi ádaaht'ínígíí biniinaa ti'dahoohníih nidi, nihik'idahojidlíigo át'é. Áádóó yee ił dahółhée'ii t'áadoo bik'ee nihił daayé'í, índa t'áadoo ádił dahonohdlání.

¹⁵Nidi nihijéí tł'ááhdę́ę́' Christ nihiBóhólníihii nilį́įgo nihił dadiyin doo. Biniyé nihił chodahoo'ínígíí éí diné ła'da yíndanihídíłkidgo bee bił nídahodoołnihígíí áłahjį' bee hasht'e'áda'díínółzin, ákondi a'ohgo ída'díínółzingo índa Diyin God dadíínóhsingo bił dahołne'.

¹⁶Doo yá'át'ééh ádaat'į́į da danihiłníi nidi, doo ádaaht'į́į́góó baa ákodanohsin le', áko Christ bee yá'át'éehgo dahinohnánígíí nihąąh dei'į́įgo nichǫ́'ógo nihaa yádaałti'ii ádaa yádadínóodzįįł.

¹⁷Háálá Diyin God íinízingo yá'át'éehgi ádaaht'į́įgo biniinaa ti'dahoohníhígíí éí yá'át'ééh, nidi doo yá'át'éehgi ádaaht'į́į́góó biniinaa ti'dahoohníhígíí éí doo yá'át'éeh da.

¹⁸Christ t'ááłáhídi ałtso nihá łazh'doolíiłgo t'áá hó hwee Diyin God baa náhidiikah biniyé ts'ídá t'áá ákogi ájít'éii éí doo t'áá ákwii ádaat'íinii bá dadziztsą́. Hats'íís seesyį́, nidi Níłch'i Diyinii bee jiináago áho'diilyaa.

¹⁹T'áá éí bee ałdó' daneeznáanii biníłch'i dabi'dótą'ii baa hozhníle'go bił nahojisne'.

²⁰T'áá átséedi Nóah tsinaa'eeł ííléehgo yoołkááł yę́ędą́ą́' Diyin God doo yik'eh dahół'į́į́góó bił nahojisne'. Íídą́ą́' Diyin God ch'ééh biba' ha'ólníigo hoolzhiizh. Diné t'áá díkwíí tsinaa'eeł biih jookai, t'áá tseebíjílt'éhégo tó bee yisdájookai.

²¹T'áá éigi át'éego k'ad tó bee alzį́hígíí éí Jesus Christ daaztsą́ą́dę́ę́' náábi'diilzáii bee yisdájiikáhígíí yaa halne', t'óó tó bee hats'íís chin bąąh táádaagisgo éí dooda, nidi, T'áá ákogi ááshníiłgo bee ádaa ákonisdzingo áshílééh, dajiníigo Diyin God baa nídajookąąh.

²²Jó, Christ yá'ąąshgóó anáádzáago Diyin God yinish'náájí dah sidá, áadi diyingo nidaal'a'í áádóó bídahólníihii índa ayóó ádabóodziilii bídahółnííh.