Read Navajo I PETER 4 Bible Online

I PETER 4 - Navajo bible

I PETER 4

¹Christ bits'íís yee ti'hooznii'go nihí ałdó' t'áá ákót'éego ti'hoo'niih bídanołdzilgo nitsídaahkees, háálá t'áá háiida hats'íís ti'bidi'yoolníhígíí bąąhági át'éii doo bił ahízhdéét'i' da silį́į́'.

²Áko nizh'níłdįįd bijį́įjį' ts'ísee k'ehgo iiná bee adááháníinii doo bik'ehgo náájii'náa da doo, nidi Diyin God íinízinii bik'ehgo jiináa doo.

³Háálá nihí łah doo Jew dine'é danilíinii ádaat'ínígi ádaaht'į́į́ nít'éé', baa'ihgo tsi'nidaahkai nít'éé', adádanoołníí nít'éé', wáin daahdlą́ą́ nít'éé', adlą́ nihił dahoneełni nít'éé', t'áá na'níle'dii nida'soohdlą', índa e'elyaii doo daaldinii bich'į' nidahohłáá nít'éé'.

⁴Áko doo da'oodlání k'ad t'áá íiyisí tsi'naaldeehgi doo éédadoohjahgóó yik'ee t'óó bił adahayóí, áádóó danihi'į́įgo yádaałti'.

⁵Ákódajiníigo ádajíít'įįdii éí diné dahinánígíí índa daneeznánígíí yá nihodiyoo'áałgo yiba' át'éii bich'į' ádaa nidahozhdoolnih.

⁶Áko dazneeznáanii, nihokáá' dine'é t'áá ałtso baa nídahódóot'įįłígi át'éego haa dahwiiníst'įįd nidi, da'joosdląądgo t'áá Diyin God hinánígi át'éego dajiináa doo biniyé hane' yá'át'éehii bee hoł dahane' nít'éé'.

⁷K'adę́ę nihodoogáałjį' ahalzhíísh. Éí bąą ádaa dahonohsą́ áádóó hada'ísídół'į́į'go sodadołzin.

⁸Íiyisí agháagoígíí éí t'áá aaníí ayóó'áda'ahíínóh'ní, háálá ayóó'áhi'jó'níigo éí bee t'óó ahayóígóó ni'jiisíih nidi bik'i hwiizdooził.

⁹Niha'ałk'ee nídaakahígíí t'áadoo doo sohdadooł'įįłí, nidi nihił danilį́.

¹⁰T'ááłá'í nootínígo t'áá da'níł'ąą Diyin God nihaa jooba'go nihaidiní'áanii nizhónígo bá chodaoł'į́įgo bee ahíłká anídaahjah le'.

¹¹T'áá ałtsojį' Jesus Christ biniit'aa Diyin God baa ha'niih doo biniyé t'áá háiida hadziidziihígíí t'áá Diyin God t'éí báhadziidziih doo; t'áá háiida áká aníjílwo'ígíí t'áá Diyin God bee adziilii hainíláhígíí bíighahgo bee áká aníjílwo' doo. Jesus Christ éí hool'áágóó ahóyéel'áágóó baa ha'niih índa bóhólníih doo. T'áá ákót'ée doo.

¹²Ayóó'ánihósh'níinii, kǫ' nahalingo na'íhonitaah bee nihéédahodoozįįł biniyé bee nihich'į' áhooníłígíí t'áadoo bik'ee t'óó nihił adahayóí. T'áadoo áho'dólne'gi la' át'éégóó nashóhonitaah t'áadoo danohsiní.

¹³Nidi Christ yik'ee ti'hooznii'ii bił ałts'ą́ą́' da'nołk'iizígíí baa nihił dahózhǫ́ǫ le'. Áko Christ bee bi'oh adidilyéehii nihich'į' yit'íní silį́į'go t'áá íiyisí baa nihił dahózhǫ́ǫ dooleeł.

¹⁴Christ bíí' danohłínígíí biniinaa nihił nida'í'įįh nidi baa nihił dahózhǫ́, háálá Níłch'i Diyinii ayóó át'éii, Diyin God biNíłch'i Diyinii, nihik'i hoole'. Danihódziih nidi Diyin God éí íiyisí dayódziih, nihíjígo nihee Diyin God baa ha'niih.

¹⁵Diné neiłtseedii, da'ni'įįhii, baa'ihii yaa nidaakaii áádóó diné binaanish yits'ą́ą́' deiníłtł'aii ti'dahooníhígi át'éego t'áadoo ákót'éego ti'dahoohníhí.

¹⁶Nihí Christ deinohdlą́ągo biniinaa ti'dahooh'níihgo t'áadoo baa yádanohsiní, nidi Christ bízhi' bee danihi'dójíhígíí bee Diyin God baa dahohniih.

¹⁷Diyin God éí t'áá bí ba'áłchíní danilíinii baa dahwiidínóot'įįłjį' ahoolzhiizh. Áko nihí áłtsé nihaa dahwiidínóot'įįłgo, ákodashą' Diyin God baa hane' yá'át'éehii doo yik'eh dahół'ínígíí t'ah aláhídi át'éego haadashą' yit'éhégo há nidahodiyoot'ááł!

¹⁸Áádóó diné ts'ídá t'áá ákogi ádajít'éii t'áá íiyisí hojoobá'ígo yisdájookaigo, Diyin God doo dazdísingóó bąąhági ádajooníłígíí haadashą' hodi'doolnííł.

¹⁹Éí bąą Diyin God íinízinii bik'ehgo ti'dahojooníhígíí éí yá'át'éehgo ádajooníiłgo Í'iilaii ba'ahódlíii baa ádahizhdidoot'ááł.