Read Navajo II PETER 1 Bible Online

II PETER 1 - Navajo bible

II PETER 1

¹Shí Sáíman Peter, Jesus Christ yá naal'a'í áádóó yá yil'aadii nishłíinii, NihiDiyin God áádóó Yisdánihiiníiłii Jesus Christ yee ts'ídá t'áá ákogi át'éii bee, t'áá nihí da'iiniidlánígi át'éego oodlą' bee aa hodzódlí ílíinii shódayoost'e'ii bich'į' naaltsoos áshłééh.

²Diyin God índa Jesus nihiBóhólníihii béédahonohsinígíí bee bibee ajooba' índa bibee ach'į' hózhǫ́ náhásdlį́į'ii k'ee'ąą yileełgo yee nihik'ijidlíi doo.

³T'áá hó bee ayóó ájít'éii índa bee aláahgo yá'ájít'éehii hoł ałts'ą́ą́' da'niilk'iiz doo biniyé nihíká ázhdííniidii hwéédahosiilzįįd. Áko hodílzingo iiná bee dahinii'náa dooleełígíí Diyin God bibee adziilii bee nihee dahazlį́į́'.

⁴Éí bee nihodziiz'áanii ayóó ádaat'éii áádóó ílíinii bee nihá hadzoodzíí', áko nihokáá' dine'é bitahgóó adáhonooní ni'iiłchxǫǫhii bits'ą́ąjį' nihá yisdáhóót'i'go bąą, diyingo bee ájít'éii hoł ałts'ą́ą́' da'nołk'iiz.

⁵Éí bąą t'áá awołí bee da'iinohdląąh, áádóó doo éí t'éiyá da nidi ts'ídá yá'át'éehgo ádaahníił doo, áádóó nihił éédahodoozįįł,

⁶áádóó ádaa ádahołyą́ą doo, áádóó nízaadgóó hada'íínółníi doo, áádóó ałdó' diyin k'ehgo dahinohnáa doo;

⁷doo éí t'éiyá da nidi t'áá ła' ha'oojéé' k'ehgo ahaa a'ááh danohdzin doo, áádóó ayóó'áda'ahíínóh'níi dooleeł.

⁸Áyąądą́ą́' díí dziilí bee ádaaht'į́įgo nihiBóhólníihii Jesus Christ béédahonohsinígíí bąą doo t'óó bił ádahodíínółzée' da doo, nidi Diyin God bá chodaoh'į́įgo aneest'ą' nihee dahodooleeł.

⁹T'áá háiida doo ákójít'ínígíí doo nízaadgóó ajoo'į́į dago doo oo'íinii nahojílin, áádóó habąąhági át'éii hąąh tánásgiz yę́ę baa jiyooznah.

¹⁰Éí bąą shik'isóó, t'áadoo nihił naaki danilínígóó Diyin God nihíká ádííniidígíí áádóó yitah nihiizlá'ígíí t'áá aaníí nihił béédahózin doo, háálá díí t'áá ałtso bida'oł'į́įgo ts'ídá doo t'ą́ą́' anídínóohdah da.

¹¹Áko nihiBóhólníihii Jesus Christ Yisdánihiiníiłii hool'áágóó bee bóhólníihgo bił haz'áanii t'áá íiyisí wózhǫ́ nihá ąą ádoolnííł.

¹²Éí bąą díidíígíí t'áá áłahjį' béédanihiyiishníih doo, azháánee' t'áá íídą́ą́' nihił béédahózin nidi, áádóó t'áá aaníinii bik'ida'dootą́ągo bee danołdzil nidi.

¹³T'ah hinishnánídą́ą́' díí béédanihiyiishníhígíí bee ch'éédanihiisíid dooleełgo nihá shił yá'át'ééh nisin.

¹⁴Háálá nihiBóhólníihii Jesus Christ t'áá yee áshidííniid yę́ęgi át'éego doo nízaadgóó nááhinishnáa da doogo shił bééhózin.

¹⁵Áko díí bee nanihinítą́'ígíí dasétsą́ą́dóó bik'ijį' t'áá ooleełgi bik'ehgo nibéédahołníihgo nihá áshłééh nihósh'ní.

¹⁶Háálá nihiBóhólníihii Jesus Christ bibee adziilii yił yígháhígíí bee nihił nidahosiilne' yę́ędą́ą́' hane' doo t'óó ádaalyaii nihił béédahózingo ádanihiilyaa da. Nidi yee ayóó át'éii bee bi'oh adidilyéehii t'áá nihí nihináá' bee daníil'į́į́',

¹⁷háálá ts'ídá aláahdi át'éego bi'oh adidilyééhdę́ę́' Diyin God aTaa' jílíinii Christ bił jílį́įgo baa hodziznihgo hwiinéé' diists'ą́ą́' yę́ędą́ą́' ájíní, Díí shiYe' ayóó'óósh'níinii jílį́, éí t'áá íiyisí haa shił hózhǫ́!

¹⁸Dził diyinii bighą́ą'di hoł neiikai yę́ędą́ą́' Diyin God biinéé' yá'ąąshdę́ę́' dasidiits'ą́ą́'.

¹⁹Áko Diyin God yá dahalne'ii Diyin God bizaad yaa dahoolne'ii ts'ídá t'áádóo nídí t'áá aaníí át'éego nihił ííshjání ályaa. Éí bąą hazhó'ó baa nitsídaahkeesgo yá'át'ééh. Jó, chahałheeł góne' bee hool'iní bee i'díídíín nahalingo nihijéí biyi'di hayííłką́ągo índa sǫ'tsoh hááyáajį' hazhó'ó baa nitsídaahkees.

²⁰Díí ts'ídá nihił béédahózin le': Diyin God bizaad biyi'dóó nee'ni'jį' ádahodooníiłii bee ak'eda'ashchínígíí doo diné ła' t'áá bí bíniik'ehgo yik'i'diitáanii át'ée da.

²¹Háálá Diyin God bizaad baa hane'ígíí éí diné ła' doo t'áá bí íinízinígíí bik'ehgo yaa hoolne'ii át'ée da, nidi diné bił dahodiyinii éí Níłch'i Diyinii yádabiiłti'go Diyin God yá dahoolne'.