Read Navajo II PETER 2 Bible Online

II PETER 2 - Navajo bible

II PETER 2

¹Íídą́ą́' t'óó ádahodil'į́įgo dahalne'ii hatahgóó nidaaskai yę́ęgi át'éego doo t'áá aaníígóó nida'nitinii nihitahgóó dahodooleeł. Éí na'nitin doo t'áá aaníinii diné bida'oodlą' yits'ą́ą́' nidayiiłchxǫǫhii t'áá nahonit'inee yił nihidookahgo, Bóhólníihii hadił bee náádziisnii' nidi doo dahoniidzin da dahodidooniił, áko éí tsxį́įłgo ábidoołdįįłii yee ák'ijį' dahodoołchįįł.

²Éí t'óó baa'ihgo naaldeehígíí lą'í yidahididookah, éí biniinaa t'áá aaníígóó honít'i'ii baa'ihgo yaa yádaałti' dooleeł.

³Áádóó adádanoolníigo hane' t'óó ádaalyaii yee nihił dahalne'go nihinahjį' da'doot'įįł. Ákódaat'ínígíí t'áá shiidą́ą'dii atídabidi'doolníiłgo bá nidahwiist'ą́ągo át'é, áádóó ádabidoołdįįłígíí doo ałhosh da.

⁴Háálá diyingo nidaal'a'í Diyin God yich'į' ádił da'asiih yę́ędą́ą́' doo yaa hą́ą́h niizį́į́'góó ts'ídá doo nihoodzą́ą́ góyaa hadah ayiistł'íidgo, a'áán ts'ídá hodiłhiłgo haz'ą́ą́ góyaa ánihwiit'aah beiníłką́ąjį' yida'aztł'ǫ́.

⁵Áádóó Diyin God, ałk'idą́ą́' nihokáá' dine'é doo dabidísingóó biniinaa doo yaa hą́ą́h niizį́į́'góó tó yee íísdįįd. Nidi Nóah éí ts'ídá t'áá ákogi é'ét'é yaa halne'ii áádóó t'áá tsosts'id jilt'éhégo bił yisdájookai.

⁶Diyin God éí Sádam índa Gomárah kin haal'áhígíí ádooldįįłgo yá haadzíí'. Áko łeeshch'iih t'éí nááda'diijoł dooleełgo kǫ' yee íísdįįd. Áko Diyin God doo dazdísingóó nijildeehígíí áhodi'doolníiłii díí bee ádéédazhdi'dootį́į́ł.

⁷Nidi Lat, diné t'áá ákogi át'éii jílíinii, Diyin God díí yits'ą́ąjį' ho'níłnii'. Lat éí diné doo yá'ádaashóonii t'áá íiyisí baa'ihgo naaldeehii doo bee asosdoos'įįd da.

⁸Éí diné t'áá ákogi át'éii jílį́įgo, diné doo yá'ádaashóonii bitahgi kééhojit'į́įgo bee haz'áanii doo yik'ehgóó ádaat'ínígíí joo'į́įgo áádóó jidiits'a'go biniinaa t'áá ákwíí jį́ hwii' sizíinii t'áá ákogi át'éhígíí bich'į' nahojiiłnáá nít'éé'.

⁹Jó, Bóhólníihii éí Diyin God deidísinii nabídahonitaahii yits'ą́ą́dóó yisdáyiiníiłgo bił bééhózin, áádóó doo t'áá ákogi ádaat'éii ánihwiit'aah beiníłką́ąjį' atíhodoolíiłgo bił bééhózin.

¹⁰Adáhonooní ni'iiłchxǫǫhii yik'ehgo naaldeehii, áádóó bee ídahólníihii doo deinízinii éí agháago atídabidi'doolnííł. Doo t'áá aaníinii yee nida'nitinii doo nídanilyéésgóó bízhą́ da'ílį́įgo aghá ádadees'áii éí aghá dahizdíízíinii doo hwéédaaldzidgóó dahódziih.

¹¹Azhą́ diyingo nidaal'a'í éí doo t'áá aaníinii yee nida'nitinii biláahgo ádabóodziil áádóó bídahólníih nidi, doo t'áá k'ad Bóhólníihii binááł yik'ídaha'áahgo nídayíídzíi' da.

¹²Naaldlooshii doo nitsídaakeesii éí bił nidahadeełgo nidabidi'tseed t'éiyá yiniyé nidahachíhígi át'éego, díí doo t'áá aaníinii yee nida'nitinii t'áadoo ak'ida'diitįįhí t'óó dzólníígóó da'ódziih. Éí baa'ihii yaa nidaakaii atínábidoodlíiłgo ábidoołdįįł.

¹³T'áá ha'át'éegoda atída'jił'į́įgo bik'édígi atínídahodi'doolnííł. T'áá jį́įgo nidi badaa'ihii bee tsi'ndajikaígíí hoł nidahooshǫǫh. Baa yáhásinii índa bąą doo dahats'íidii dajílį́įgo áádóó baa bił dahoneenigo yooch'ííd yee danihinó'áahgo nihitah nída'adį́į́h.

¹⁴Adilyé t'éiyá binádaazhiin, bąąhági át'éii doo yee hwiih daaleeh da. Diné t'áá ałtsojį' doo hada'ólníinii yóó'adeinii'ááh. Adáhonooní yí'ádadiyiil'ą́ą́'. Hóyée'jį' atíbidi'doolníiłgo bá ha'oodzíi'ii danilį́.

¹⁵Ts'ídá t'áá ákogi át'éego honít'i'ii yóó'adeideez'ą́ągo yóó'aheeskai. Bíyor biye', Béílam, áát'įįdígíí yikék'eh dookai. Jó, éí doo ákwii ó'oo'nííł bee a'ídeeł bił ayóó áhoot'éé nít'éé',

¹⁶nidi doo ákǫ́ǫ́ át'íinii biniinaa bi'deesteh. Télii doo hadoodzihii saad yee hach'į' haadzíi'go doo áhojoohyąądgóó ájínéehii yineestł'ah.

¹⁷Díí doo t'áá aaníinii bee nidazh'nitinii éí tó hadaazlį́į́ nít'éé' yę́ęgóó bił nídahóółtseii nidahojílin, níyol bee k'os bił yóó'adahayóołii nidahojílin. Éí ts'ídá hodiłhiłgo chahałheeł bił haz'ą́ądi há hasht'edahoolyaa.

¹⁸Háálá ádaa dahoji'niihgo saad t'áadoo nánídlíinii bee yádajiłti'. Diné nida'iisíihgo dahinánígíí bitahdóó hojoobá'ígo yisdádahinichéhígíí baa'ihgo bidádazhnoolníinii bee dazhnó'áahgo yóó'adazhnii'ááh.

¹⁹Azhą́ doo yá'ádaat'éehii bits'ą́ą́dóó nihéédadidoochił, dahałníi nidi, t'áá bí ni'iilchxǫǫh yinaalte' danilį́įgo ádaaní, háálá t'áá hak'eh didleehígíí binaalte' jileeh.

²⁰Háálá nihiBóhólníihii Jesus Christ Yisdánihiiníiłii t'áá aaníí yéédahoosįįdgo, nahasdzáán bikáá' bąąhági át'éii yits'ádahaazhjéé'dóó bik'ijį' bąąhági át'éii bik'eh náádadeesdlį́į'go, átséédą́ą́' ádaat'éé nít'ée'ii yiláahdi t'óó yówehda ádaat'é daaleeh.

²¹Háálá bił béédahoozindóó bik'ijį' diyingo bee haz'áanii baa dadeest'ánę́ę yits'ą́ąjį' nídaazyizjí éí t'áá ákogi át'éego honít'i'ii ts'ídá t'áadoo bił béédahoozįįdjí agháago bá yá'át'éeh doo nít'éé'.

²²T'áá aaníí saad bee hódzą́ bik'ehgo bich'į' ádahóót'įįd, éí kóníigo yaa halne', Łééchąą'í bikwi néídį́į́h. Áádóó, Bisóodi tánásgiz yę́ę hashtł'ish yénínááná'nah.