Read Navajo I John 2 Bible Online

I John 2 - Navajo bible

I John 2

¹Sha'áłchíní, doo bąąhági ádaaht'į́į da doo, nihósh'níigo díí bee nihich'į' ak'e'ashchí, nidi nihí ła' bąąhági íit'į́įgo ííshją́ą́ Jesus Christ ts'ídá t'áá ákogi át'éii jílíinii, éí Diyin God aTaa' bich'į' nihá na'ak'íyájíłti'.

²Jó, hó nihá dadziztsánígíí bee nihibąąhági át'éii nihá yóó'azhdíí'ą́. Doo t'áá nihí t'éiyá nihá dadziztsą́ą da, nidi nihokáá' dine'é t'áá ałtso bibąąhági át'éii bá dadziztsą́.

³Diyin God bibik'eh ó'oo'níiłii bik'eh dahoniil'į́įgo, éí bee t'áá aaníí béédahoniilzingo nihił béédahózin.

⁴Bééhasin, jiníigo ákondi bibik'eh ó'oo'níiłii doo bik'eh hojíł'į́į́góó, éí biyooch'íidii jílį́, índa t'áá aaníinii doo hwii' hólǫ́ǫ da.

⁵Nidi t'áá háiida Diyin God bizaad bik'eh hojíł'ínígíí éí ts'ídá hadaałt'éego Diyin God ayóó'ájó'ní. Díí bee t'áá aaníí nihił béédahózingo Diyin God bii' dahoniidlǫ́.

⁶Diyin God bii' honishłǫ́, jinínígíí, Jesus Christ naayá yę́ęgi át'éego joogáał doo.

⁷Shik'isóó ayóó'ánihósh'níinii, bik'eh ó'oo'níiłii ániidíii doo bee nihich'į' ak'e'ashchíi da, nidi díí t'áá ałk'idą́ą́' bik'eh ó'oo'níiłii, bik'eh ó'oo'níiłii saad bee hodeeshzhiizhii, t'áá íídą́ą́' dasidoots'ą́ą'ii t'áá éí át'é.

⁸Náá'áłdó' bik'eh ó'oo'níiłii ániidíii bee nihich'į' ak'e'ashchíigo át'é, éí t'áá aaníinii hwii' hólǫ́ǫgo nihí ałdó' nihii' hólǫ́. Háálá chahałheeł yóó'eeldoh áádóó adinídíín t'áá aaníinii k'ad bee hool'in.

⁹T'áá háiida hool'ingi naashá, jinínígíí, ákondi hak'is bik'eezhdiniihgo éí t'ahdii chahałheeł bii' joogáałgo át'é.

¹⁰Hak'is ayóó'ájó'nínígíí éí t'áá áłahjį' hool'ingi hojílǫ́, áko ła'da doo haniinaa didoogoh da.

¹¹Nidi hak'is bik'eezhdiniihii éí chahałheeł bii' hojílǫ́, áádóó chahałheeł bii' joogááł, áko joogááłgóó doo hoł bééhózin da, háálá chahałheeł hanáá' íísdįįd.

¹²Sha'áłchíní, nihich'į' ak'e'ashchí, háálá Christ bee nihibąąhági ádaat'éii nihá yóó'ahideest'ą́.

¹³Azhé'é danohłíinii, nihí ałdó' nihich'į' ak'e'ashchí, háálá hodeeyáádę́ę́' hojílóonii hwéédahonohsin. Tsíłkéí danohłíinii, nihich'į' ak'e'ashchí, háálá bąąhági át'éii nilínígíí bik'eh dasidoohdlį́į́'. Áłchíní danohłíinii, nihich'į' ak'e'ashchí, háálá Diyin God aTaa' béédahonohsin.

¹⁴Azhé'é danohłíinii, nihich'į' ak'eshéłchį́, háálá hodeeyáádę́ę́' hojílóonii hwéédahonohsin. Tsíłkéí danohłíinii, nihich'į' ak'eshéłchį́, háálá danihidziil, áádóó Diyin God bizaad nihii' dahólǫ́, áko bąąhági át'éii nilínígíí bik'eh dasidoohdlį́į́'.

¹⁵Nahasdzáán bikáá'góó dahólóonii t'áadoo ayóó'ádeínóh'níní, nihokáá' bił nidahazt'i'ii nidi dooda. T'áá háiida nihokáá' bił nidahazt'i'ii ayóó'ájó'nínígíí éí aTaa' bibee ayóó'ó'ó'níinii doo hwii' hólǫ́ǫ da.

¹⁶Háálá nihokáá' bił nidahazt'i'ii t'áá ałtso, ats'íís yidánoolníinii, áádóó anáá' yidánoolníinii áádóó iiná bee ádaa hodzódlíii éí doo aTaa' bits'ą́ą́dę́ę́' ádaat'ée da, nidi nihokáá'dóó ádaat'é.

¹⁷Índa nihokáa'gi dahólóonii áádóó ił bidádahonooníinii t'áá bił yóó'ahodoogááł, nidi Diyin God íinízinii bik'ehgo ájooníiłii éí hool'áágóó hojílǫ́.

¹⁸Sha'áłchíní, k'adę́ę nihoolzhíísh, Christ bi'ana'í nilíinii doogááł ha'níigo dasidoots'ą́ą́' yę́ęgi át'éego, k'ad nidi Christ bi'ana'í danilíinii lą'í nidahaaskai; díí bee k'adę́ę nihoolzhíshígíí nihił béédahózin.

¹⁹Nihits'ą́ą́dóó aheeskai, nidi éí doo t'áá aaníí nihíí' danilį́į da, háálá nihíí' danilį́įgo, t'ah nihił naakai doo nít'éé', nidi éí t'áadoo bahat'aadí doo nihits'ą́ą́dóó danilínígíí béédahodoozįįł biniyé nihits'ą́ą́dóó aheeskai.

²⁰Nidi Diyin God jílíinii ats'ánihizhnínil áádóó t'áá ałtsojį' nihił ééhodzísin.

²¹T'áá aaníinii doo nihił béédahózin daígíí doo biniyé nihich'į' ak'e'ashchíi da, nidi nihił béédahózinígíí biniyé, áádóó t'áá aaníinii wooch'ííd bąąh ádingo nihił béédahózin.

²²Háishą' biyooch'íidii nilį́? Jesus éí doo Christ át'į́į da, jinínígíí lą́ą. ATaa' índa biYe' doo ádízhdéélt'i'góó hadziidziihígíí éí lá Christ bi'ana'í jílį́.

²³T'áá háiida aYe' doo ádízhdéélt'i'góó hadziidziihígíí éí aTaa' doo hwee hólǫ́ǫ da, nidi aYe' ádízhdéélt'i'go hadziidziihígíí éí aTaa' nilíinii hwee hólǫ́.

²⁴Áko da'iisoohdląąd yę́ędóó dasidoots'ą́ą'ii t'áá áłahjį' bíni'dii nihii' dahólǫ́ǫgo ádeínóhsin. Bitł'áahdidą́ą́' dasidoots'ą́ą'ii t'áá áłahjį' nihii' dahólǫ́ǫgo aYe' índa aTaa' t'áá áłahjį' bii' dahonohłǫ́ǫ doo.

²⁵Áko díí bee nihá nihozhní'ą́ągo bee hadzoodzíi'ii éí iiná doo ninít'i'ii.

²⁶Nihida'doolohii beinísht'į́įgo díí bee nihich'į' ak'e'ashchí.

²⁷Nidi nihí Christ bee Níłch'i Diyinii nihii' hazlį́į'go ła'da nanihizhnitin dooleełígíí doo bee nihich'į' anídahazt'i' da, háálá Níłch'i Diyinii t'áá ałtsoní yínanihiniłtin. T'áá aaníinii, éí doo wooch'ííd át'éégóó yínanihiniłtin. Áko éí bik'eh dahonoł'į́įgo t'áá áłahjį' Christ bii' dahonohłǫ́.

²⁸Sha'áłchíní danohłíinii, t'áá ałtsojį' bii' dahonohłǫ́, áko Christ yit'íní í'diilyaago doo nitsideiidáa da doo, áádóó náánádzáago bidááhdóó deiidzį'go doo ádaa yádaniidzin da doo.

²⁹Christ ts'ídá t'áá ákogi át'éii nilį́įgo nihił béédahózin. Áko t'ááłá'í jinítínígo ts'ídá t'áá ákogi ádajit'íinii Diyin God bits'ą́ą́dóó náádaho'dizhchį́įgo ałdó' nihił béédahózin.