Read Navajo I John 3 Bible Online

I John 3 - Navajo bible

I John 3

¹Dooládó' ayóó át'éego aTaa' ayóó'ánihó'níi da lá! Jó, Diyin God ba'áłchíní danihidi'ní, áko t'áá aaníí éí daniidlį́. Nihokáá' dine'é t'áadoo hwéédahoosįįdgóó biniinaa nihí ałdó' doo nihéédahósin da.

²Ayóó'ánihósh'níinii, k'ad Diyin God ba'áłchíní daniidlį́. Ádaniit'ée dooleełii t'ah doo bééhózin da nidi, Christ nádzáago t'áá bí át'éhígi ádaniit'é dadiidleełgo nihił béédahózin, háálá ázhnoolninígíí nihił béédahodoozįįł.

³Áko Christ t'áá hó ájít'éhígi át'éego diné t'ááłá'í nítínígo ákót'éego hwee bił chodahoo'íinii bąąhági át'éii bijéí bąąh ádaadingo áda'dólzin.

⁴T'ááłá'í jinítínígo bąąhági ádajit'íinii éí bee haz'áanii dayiitíihii dajílį́; bąąhági át'éii éí bee haz'áanii hitíihii óolyé.

⁵Jesus Christ éí nihibąąhági ádaat'éii nihits'ázhdidoo'ááł biniyé jiníyá áádóó bąąhági át'éii doo hwii' hólǫ́ǫ daígíí nihił béédahózin.

⁶T'áá háiida Christ bii' hojílónígíí bąąhági át'éii doo t'áá náás joołt'ih da doo; t'áá háiida bąąhági át'éii t'áá náás joołt'ihígíí Christ t'ah doo jiiłtséeh da, doo nidi bééhojísin da.

⁷Sha'áłchíní, t'ááká ła'da nihi'dóleeh lágo! Ts'ídá t'áá ákogi ájooníiłii éí Christ ts'ídá t'áá ákogi át'éii nilínígi át'éego ts'ídá t'áá ákogi át'éii jílį́.

⁸Bąąhági ájít'ínígíí éí níłch'i bida'iiníziinii binanit'a'í bits'ą́ą́dę́ę́' hojílǫ́, háálá níłch'i bida'iiníziinii binanit'a'í éí t'áá hodeeyáádę́ę́' bąąhági áánííł. Diyin God biYe' éí níłch'i bida'iiníziinii binanit'a'í binaanish íidoołdįįł yiniyé níyá.

⁹T'áá háiida Diyin God bits'ą́ą́dóó bi'dizhchínígíí bąąhági át'éii doo t'áá náás yoołt'ih da doo, háálá Diyin God yee át'éii bii' hólǫ́, áko bąąhági át'éii doo t'áá náás joołt'ih le' át'ée da, Diyin God bits'ą́ą́dóó bi'dizhchį́, éí bąą.

¹⁰Díí bee Diyin God ba'áłchíní índa níłch'i bida'iiníziinii binanit'a'í ba'áłchíní ał'ąą át'éego bee bééhózin: t'áá háiida doo ts'ídá t'áá ákogi ájooníłígíí éí doo Diyin God bits'ą́ą́dóó hojílǫ́ǫ da, áádóó Christ bee hak'is nilíinii doo ayóó'ájó'níinii éí doo Diyin God bits'ą́ą́dóó hojílǫ́ǫ da.

¹¹Háálá, Ayóó'áda'ahíínóh'ní, ha'níigo ts'ídá átséedi hane' dasidoots'ą́ą́'.

¹²Kéin áát'įįd yę́ęgi doo ádeiit'į́į da doo. Jó, Kéin éí níłch'i bida'iiníziinii binanit'a'í bíí' jílį́įgo biniinaa hatsilí jiisxį́. Ákoshą' ha'át'íí biniinaa hatsilí jiisxį́? Jó, t'áá hó doo ákogi ájoonííłgóó biniinaa, áádóó hatsilí éí t'áá ákogi ááníiłgo biniinaa jiisxį́.

¹³Shik'isóó, nihokáá' dine'é danihijoołáhígíí t'áadoo bik'ee nihił adahayóí.

¹⁴Aniné bii'dóó iiná bii'jį' ahiikaigo nihił béédahózin, háálá Christ bee nihik'isóó danilíinii ayóó'ádeíníi'ní. Hak'is doo ayóó'ájó'níinii éí t'ahdii aniné bii' hojílǫ́.

¹⁵T'áá háiida hak'is bik'eezhdiniihígíí éí diné neiłtseedii jílį́, áko nihił béédahózingo diné neiłtseedii éí iiná doo ninít'i'ii bee ádin.

¹⁶Christ be'iina' nihá ninéidiní'ánígíí bąą Diyin God bibee ayóó'ó'ó'ni' baa ákodaniidzį́į́', áko nihí ałdó' Christ bee nihik'isóó danilíinii bá nihe'iina' ninádahidiit'aah doo.

¹⁷T'áá háiida bee iináanii t'áá hwee hólǫ́ǫgo, éí Christ bee hak'is nilíinii yídin nilíinii hoł bééhózin nidi, t'áadoo le'é doo bee baa jijoobaahgóó, ákoshą' haa yit'éego Diyin God bibee ayóó'ó'ó'ni' hwii' hólǫ́ǫ doo.

¹⁸Sha'áłchíní, Ayóó'áda'ííníi'ní, dadii'níigo t'áadoo t'óó ádadii'níní doo, nidi t'áá aaníinii bee ayóó'áda'ahííníi'níigo ałk'i nideiildzil doo.

¹⁹Díí kót'éego t'áá aaníinii bíí' daniidlį́įgo nihił béédahózin, índa Diyin God bidááhdóó t'áadoo nitsideiikaií doo.

²⁰Háálá nihijéí, Bąąhági ánít'é, nihiłníigo Diyin God éí nihijéí biláahdi ayóó át'éii nilį́įgo nihił béédahodoozįįł, háálá t'áá ałtsoní bił bééhózin.

²¹Ayóó'ánihósh'níinii, nihijéí ná nihoot'ą́ doo nihiłníígóó, Diyin God binááł doo nitsideiidáa da doo.

²²T'áá ha'át'íhída bídayíníikeedgo bits'ą́ą́dóó nihee nidahwiileeh, háálá yee has'áanii bik'eh dahoniil'į́įgo bił hóshóonii baa nideiikai.

²³Áko díí yee has'áanii át'é, t'áá bí biYe' Jesus Christ bízhi' nihił danilį́įgo deinohdlą́ą doo, áádóó t'áá yee nihá haadzí'ígi át'éego, ayóó'áda'ahííníi'níi doo.

²⁴Diyin God yee has'áanii bik'eh hojíł'į́įgo Diyin God bii' hojílǫ́, áádóó Diyin God hwii' hólǫ́. Diyin God éí Níłch'i Diyinii nihaazhníł'a'ígíí bee Diyin God nihiyi' hojílǫ́ǫgo nihił béédahózin.