Read Navajo I John 4 Bible Online

I John 4 - Navajo bible

I John 4

¹Ayóó'ánihósh'níinii, Níłch'i Diyinii shii' hólǫ́, daanínígíí t'áadoo t'áá ałtso deinohdlání, nidi éí t'áá ałtso nidaałkaah, t'áá daats'í aaníí Diyin God biNíłch'i Diyinii bii' dahólǫ́. Háálá t'óó ádahodil'į́įgo dahalne'ii nihokáá'góó t'óó ahayóí deíkááh.

²Díí bee Diyin God biNíłch'i Diyinii bii' dahólónígíí nihił béédahózin doo, jó éí, Jesus Christ diné silį́į'go bi'dizhchį́, daanínígíí Diyin God biNíłch'i Diyinii bii' hólǫ́.

³Nidi t'áá háiida, Jesus Christ doo diné silį́į'go bi'dizhchį́į da, dajinínígíí, éí Diyin God biNíłch'i Diyinii hwii' ádin. Nidi Christ bi'ana'í nilíinii biníłch'i t'éí hwii' hólǫ́. Christ bi'ana'í biníłch'i doogááł ha'níigo dasidoots'ą́'ígíí k'ad t'áá íídą́ą́' nihokáa'gi hólǫ́.

⁴Sha'áłchíní, nihí Diyin God bíí' danohłį́, áko doo t'áá aaníí át'éégóó nida'nitinii bik'eh dasidoohdlį́į́', háálá nihiyi' hojílónígíí éí nihokáá' dine'é bitahdi hólónígíí biláahgo áhóodziil.

⁵Éí nihokáá' yits'ą́ą́dóó ádaat'į́, éí bąą nihokáá' dine'é k'ehgo yádaałti', áádóó nihokáá' dine'é dabidiits'a'.

⁶Nidi nihí éí Diyin God bíí' daniidlį́. T'áá háiida Diyin God yééhósinígíí danihidiits'a', nidi Diyin God doo bíí' danilíinii doo danihidiits'a' da. Díí bee t'áadoo bahat'aadí Níłch'i t'áá aaníinii índa níłch'i bina'adlo'ii nihił béédahózin.

⁷Ayóó'ánihósh'níinii, haa'íshą' ayóó'áda'áhííníi'níi doo, háálá ayóó'ó'ó'ní éí Diyin God bits'ą́ą́dę́ę́', áádóó ayóó'ó'ó'níinii éí Diyin God bits'ą́ą́dóó bi'dizhchį́, áko Diyin God yééhósin.

⁸T'áá háiida doo ayóó'á'jó'níinii éí Diyin God doo bééhodzísin da, háálá Diyin God ayóó'ó'ó'níinii nilį́.

⁹Jó, Diyin God biYe' t'ááłá'í bá yizhchínígíí bee dahinii'náa doo biniyé nihokáá' dine'é yitahjį' yiníł'a'. Díí bee Diyin God ayóó'ánihó'nínígíí nihił béédahoozin.

¹⁰Díí éí ayóó'ó'ó'ní bee bééhózinii: nihídóogo Diyin God ayóó'ádeíníi'nínígíí éí dooda, nidi bídę́ę'go ayóó'ánihó'níigo biYe' nihá dadootsaał biniyé yiníł'a'go nihibąąhági át'éii ałtso nihá yóó'iidíí'ą́.

¹¹Ayóó'ánihósh'níinii, díigi át'éego Diyin God ayóó'ánihó'níigo, haa'íshą' nihí ałdó' ayóó'áda'ahííníi'níi doo.

¹²Diné ts'ídá doo ła' Diyin God yiyiiłtsą́ą da, ayóó'áda'ahííníi'níigo, Diyin God nihiyi' hólǫ́, áko Diyin God bee ayóó'ó'ó'ni' nihiyi' hadaałt'éego hasht'eelyaa.

¹³Diyin God haNíłch'i Diyinii nihaazhníł'a'ígíí bee Diyin God hwii' dahoniidlǫ́ áádóó nihii' hojílǫ́ǫgo nihił béédahózin.

¹⁴Áádóó aYe' nihokáá' dine'é yisdáyiinííł dooleełgo aTaa' biníł'a'ígíí daníil'į́į́', áko éí baa ch'ídahoyiit'aah.

¹⁵T'áá háiida Jesus éí Diyin God biYe' nilį́įgo bee hadziidziihígíí éí Diyin God hayi' hólǫ́, áádóó Diyin God biyi' hojílǫ́.

¹⁶Áko Diyin God ayóó'ánihó'níigo nihił béédahózin áádóó deisiidląąd. Diyin God ayóó'ó'ó'ní át'é, áko ayóó'ó'ó'ní biyi' hojílónígíí, éí Diyin God biyi' hojílǫ́, áádóó Diyin God hayi' hólǫ́.

¹⁷Éí lá bee ayóó'ó'ó'ní nihiyi' hadaałt'éego hasht'eelyaa ni, áko ánihwiit'aah beiníłką́ądi doo nitsideiidáa da dooleeł, háálá nihokáa'gi nihí ałdó' t'áá bí át'éhígi ádaniit'é.

¹⁸Ayóó'ó'ó'ní, yéé' bąąh ádin, nidi ayóó'ó'ó'ní hadaałt'éii yéé' baa yóó'ahijeeh. Háálá yéé' atí'él'į́ bił naat'i', áko bił yéé' hólóonii doo hadaałt'éego ayóó'ó'ó'níi da.

¹⁹Diyin God átsé ayóó'ánihó'níigo bąą ayóó'ádeíníi'ní.

²⁰Diné ła'da, Diyin God ayóó'óósh'ní, jiníi nidi hak'is jijoołáago, biyooch'íidii jílį́, háálá éí hak'is t'áá joo'į́į nidi doo ayóó'ájó'níígóó, ha'át'éegoshą' Diyin God doo joo'į́į da nidi ayóó'ájó'níi dooleeł?

²¹Áádóó díí bik'eh ó'oo'níiłii Diyin God bits'ą́ą́dę́ę́' nihee dahazlį́į́', éí t'áá háiida Diyin God ayóó'ájó'nínígíí hak'is ałdó' ayóó'ájó'níi dooleeł.