Read Navajo I John 5 Bible Online

I John 5 - Navajo bible

I John 5

¹T'áá háiida Jesus éí Christ nilį́įgo joodlánígíí Diyin God bits'ą́ą́dóó bi'dizhchíinii jílį́. T'áá háiida azhé'é ayóó'ájó'nínígíí ba'áłchíní ałdó' ayóó'ájó'níi doo.

²Diyin God ayóó'ádeíníi'nínígíí índa yee has'áanii bik'eh dahoniil'ínígíí bąą Diyin God ba'áłchíní ayóó'ádeíníi'níigo nihił béédahózin.

³Háálá yee has'áanii bik'eh hól'ínígíí éí Diyin God ayóó'óó'ní át'é. Áádóó yee has'áanii doo ade át'ée da,

⁴háálá Diyin God bits'ą́ą́dóó nidabi'diizhchíinii nihokáá' bił nidahazt'i'ii yik'eh dadidlį́įgo át'é. Jó, nihe'oodlą' bee nihokáá' bił nidahazt'i'ii bik'eh dadiniidlį́.

⁵Háishą' nihokáá' bił nidahazt'i'ii yik'eh didlį́? Jó, Jesus éí Diyin God biYe' nilį́įgo yoodláanii lą́ą.

⁶Jesus Christ tó áádóó dił yee níyá. Doo tó t'éiyá bee da, nidi tó áádóó dił bee jiníyá. Áádóó Níłch'i Diyinii oo'íinii nilį́įgo éí yee nihił halne', háálá Níłch'i Diyinii t'áá aaníinii nilį́.

⁷Jó, yá'ąąshdi díí táa'go [oo'íinii danilį́įgo ch'ídahwii'aah, éí aTaa' áádóó Saad índa Níłch'i Diyinii, áko díí táa'go danilínígíí t'ááłá'í nilį́.

⁸Áko díí táa'go nahasdzáán bikáa'gi oo'íinii danilį́įgo ch'ídahwii'aah,] éí Níłch'i Diyinii áádóó tó índa dił, díí táa'go t'áá aheełt'éego ch'ídahwii'aah.

⁹Diné éí Jesus baa dahojilne'ígíí deiniidlą́, nidi Diyin God t'áá bí biYe' yaa halne'jígo agháago bidziil, háálá Diyin God éí Jesus biTaa' jílį́įgo oo'íinii jílį́įgo baa hojilne'.

¹⁰T'áá háiida Diyin God biYe' joodlą́ągo baijólíii Diyin God t'áá bí biYe' yaa halne'ígíí hoł bééhózin doo. Nidi t'áá háiida Diyin God doo joodláanii éí Diyin God biyooch'íidii nilį́ jinízin, háálá Diyin God t'áá bí biYe' yaa halne'ígíí t'áadoo joosdląąd da.

¹¹Jó, kót'éego baa hane', Diyin God iiná doo ninít'i'ii nihaidiní'ą́, éí iinánígíí haYe' bii' hólǫ́.

¹²Diyin God biYe' hwee hólóonii iiná hwee hólǫ́, nidi Diyin God biYe' doo hwee hólóonii iiná hwee ádin.

¹³Diyin God biYe' bízhi' deinohdlą́ągo baa dadzíínóhłíii iiná doo ninít'i'ii nihee dahólónígíí nihił béédahózin doo [áádóó Diyin God biYe' bízhi' deinohdlą́ągo baa dadzíínóhłíhígíí bee náás wohkah doo ałdó' biniyé] díidí bee nihich'į' ak'e'ashchí.

¹⁴Diyin God t'áá bí íinízinii bik'ehgo ha'át'íhída bídayíníikeedgo nihididoots'į́łígíí nihił béédahózin, áko baa dadzííníidlíigo bich'į' sodadiilzin.

¹⁵Áko t'áá ha'át'íhída bídayíníikeedii yidiits'a'go nihił béédahózingo, bídin daniidlíinii bídayíníikeedgo bits'ą́ą́dóó nishódahiilt'eehgo nihił béédahózin.

¹⁶Diné ła' hak'is nilíinii bąąhági át'éii biniinaa doo da'dootsaałii áyoolíiłgo joo'į́įgo bá sozdilzin doo, áko Diyin God hinááh ánábidoodlííł. Bąąhági át'éii biniinaa doo da'dootsaałii hólǫ́ǫgo iiná haa didoot'ááł. Nidi bąąhági át'éii biniinaa da'dootsaałii hólǫ́; éí yee bąąhági ádzaii bá sodołzin, doo dishníigo ádíshníi da.

¹⁷Doo t'áá ákogi áhooníiłii t'áá ałtso bąąhági át'éii ádaat'é, nidi bąąhági át'éii doo biniinaa da'dootsaałii ła' hólǫ́.

¹⁸T'áá háiida Diyin God bits'ą́ą́dóó bi'dizhchíinii bąąhági át'éii doo t'áá náás yoołt'ihgóó nihił béédahózin, háálá Diyin God biYe' haa áhályą́, áko doo yá'áshǫ́ǫ́góó naagháii doo haada hóle' át'ée da.

¹⁹Diyin God bits'ą́ą́dóó dahoniidlǫ́ǫgo nihił béédahózin, áádóó doo yá'áshǫ́ǫ́góó naagháii nihokáa'gi t'áá át'éé nít'éé' bee bóhólníihgo ałdó' nihił béédahózin.

²⁰Diyin God biYe' níyáhígíí nihił béédahózin, áádóó Diyin God t'áá aaníinii nilį́įgo béédahoniilzin doo biniyé ak'idi'yiitįįh nihaidiní'ą́. Áko Diyin God t'áá aaníinii nilíinii bii' dahoniidlǫ́, haYe' Jesus Christ bii' dahoniidlǫ́. Díí éí Diyin God t'áá aaníinii índa iiná doo ninít'i'ii nilį́.

²¹Sha'áłchíní, eda'alyaii bich'į' nahadláii bits'ąą ádaa ádahołyą́. [T'áá ákót'ée doo.]