Read Navajo JUDGES 1 Bible Online

JUDGES 1 - Navajo bible

JUDGES 1

¹Jáshowa daaztsą́ą́dóó bik'ijį' Ízrel dine'é éí Bóhólníihii nideídééłkidgo ádaaní, Háishą' nihá alą́ąjį' Kéínan dine'é yich'į' anaa' ádahodoolíiłgo yił da'ahidoogą́ą́ł?

²Bóhólníihii ádííniid, Júdah dine'é anaa' ádahodoolííł; jó, éí kéyah bílák'edíí'ą́.

³Áko Júdah dine'é éí hak'is Símiyan dine'é ádabizhdííniid, Haa'íshą' kéyah nihaa deet'ánígíí bich'į' nihił doohkahgo Kéínan dine'é bił da'ahidiigą́ą́ł. Índa nihí ałdó' t'áá ákót'éego kéyah nihaa deet'ánígíí bich'į' nihił dadiibah. Áko Símiyan dine'é hodiikaigo hoł dah diikai.

⁴Áádóó Júdah dine'é dashdiiná, áko Bóhólníihii éí Kéínan dine'é índa Píírez dine'é hálák'eidíí'ą́ągo Bíízek kin haal'áagi neeznáadi mííl nidadzistseed.

⁵Áádóó Bíízek kin haal'áhígi Adónai-bíízek wolyéii bik'ídazneeztą́ą'go bił da'ahijoogą́ą́', áko Kéínan dine'é índa Píírez dine'é bits'ą́ą́' nidzistseed.

⁶Nidi Adónai-bíízek éí dah díníichą́ą́', áko yikéé' nídiijée'go yił dadeezdéél, índa bílátsoh áádóó bikétsoh yits'ą́ą́' dayiizhgizh.

⁷Adónai-bíízek ání, Tsosts'idiingo aláahgo naat'áanii bílátsoh índa bikétsoh dahágizh; éí shibikáá' adání bikáá'dę́ę́' ch'iyáán hadahineezdee'ígíí deiyą́ą́ nít'éé'. Ákódeishłaaígi át'éego Diyin God k'ééshidiidlaa. Áko Jerúsalem kin haal'áágóó dahazyį́įgo áadi dadziztsą́.

⁸Áádóó Júdah dine'é éí Jerúsalem dine'é yik'iijée'go deisná índa diltłish yee ałtso nideistseedgo kin haal'áii yiih dahodeeznil.

⁹Éí bik'ijį' Júdah dine'é éí Kéínan dine'é dził bąąhgóó áádóó shádi'ááhjí haz'ánígóó índa halgaijigo kéédahat'ínígíí yik'iijéé'.

¹⁰Áádóó Júdah dine'é éí Kéínan dine'é Hííbran kin haal'áagi kéédahat'ínígíí yik'iijée'go deisná; (Hííbran hoolyéhígi átséédą́ą́' Kírjath-árba hoolyéé nít'éé'); áadi Shííshai áádóó Aháíman índa Tálmai nideistseed.

¹¹Áádóó dah náádiikaigo Dííber kin haal'áagi kéédahat'íinii yik'iijée'go deisná. (Dííber hoolyéegi átséédą́ą́' Kírjath-síífer hoolyéé nít'éé'.)

¹²Áko Kéíleb ání, T'áá háiida Kírjath-síífer baatįįh jííyáago bik'eh dzideesdlį́'ígíí éí shitsi' Áksa hwe'asdzą́ą doo biniyé haa deeshtééł.

¹³Áko Kéíleb bitsilí Kíínez biye' Áthniyel wolyéii éí ak'eh deesdlį́į'go Kéíleb bitsi' Áksa éí Áthniyel be'asdzą́ą dooleełgo yeiníłtį́.

¹⁴Ákódzaago Áksa éí Áthniyel bił ahizhdii'áazhgo níjookąąhgo ábijiní, Shizhé'é kéyah ła' bíídííkił. Áádóó Áksa éí hatélii bik'i nijííyáago Kéíleb áhodííniid, Ha'át'íí lá haniná?

¹⁵Áko ábizhdííniid, Shik'ijiinídliih; jó, shádi'ááhjí kéyah hóółtseii shaa dííní'ą́; kéyah tó hadaazlį́įgi ałdó' łahgo shaa nááhodidíí'ááł. Áko Kéíleb éí wódahdi áádóó wóyahdi tó hadaazlį́į́góóígíí haidiní'ą́.

¹⁶Mózes yaadaaní nilíní ba'áłchíní, Kííni dine'é jílíinii, éí Mózes haadaaní nilį́į́ nít'ée'go ha'áłchíní ahoolchíiłii, éí tsin páam kin haal'á hoolyéhídóó dashdiináago Éírad kin haal'áii shádi'ááhjígo Júdah honoojíidi Júdah dine'é bił jíkaigo áadi bił kéédahojit'į́į́ nít'éé'.

¹⁷Júdah dine'é éí bik'is Símiyan dine'é yił dah diináago Kéínan dine'é Zíífath kin haal'áadi kéédahat'ínígíí nideistseedgo ałtso ádeisdįįd. Áko éí kin haal'áii Hórmah hoolyée doo, dadííniid.

¹⁸Júdah dine'é éí Géíza kin haal'áii bikéyah t'áá bił áádóó Áshkelan kin haal'áii bikéyah t'áá bił índa Ékran kin haal'áii bikéyah t'áá bił ałdó' deisná.

¹⁹Júdah dine'é éí Bóhólníihii bił hólǫ́ǫgo dziłgo nahaz'ánígóó kéédahat'íinii ch'ídeineeskaad, nidi halgaigóó kéédahat'íinii t'áadoo ch'ídeineeskaad da, háálá tsindaabąąs bijáád naakiígíí béésh nitł'izii bee ádaalyaii bee bits'ádahazyéé'.

²⁰Áko Hííbran kin haal'áii éí Kéíleb yaa deideez'ą́; Mózes ádííniidígi ída'iilaa. Éínak biye'ké tált'éego baa ch'íníjéé'.

²¹Nidi Bénjamin dine'é éí Jííbas dine'é Jerúsalemgi kéédahat'ínígíí t'áadoo baa ch'ídahaazhjée' da. Jííbas dine'é éí Bénjamin dine'é Jerúsalem kin haal'áagi t'ahdii díí jį́į́góó ahił kéédahat'į́.

²²Áko Jóseph dine'é ałdó' Béthel kin haal'áii baatįįh jookai; jó, Bóhólníihii hoł hólǫ́ǫgo ákóda'jiilaa.

²³Jóseph dine'é bits'ą́ą́dóó naalchi'í Béthel kin haal'áágóó adayiis'a'; éí ákwii átséédą́ą́' Luz hoolyéé nít'éé'.

²⁴Áko naalchi'í éí kin haal'áhídóó diné ła' ch'íníyáago dayiiłtsą́ągo ádeidííniid, Nihił hólne', baa nídaniikąąh, kintah góne' yah e'etiinígi nihił ííshją́ą́ áhólééh, áko naa a'ááh daniidzin doo.

²⁵Áko kintah góne' yah e'etiinígíí hach'į' ííshjání áyiilaago kin haal'áagi kéédahat'íinii diltłish bee nidadzistseed, nidi diné hoł hoolne'ígíí índa ba'áłchíní éí t'áá ałtso t'óó bida'jiis'nii'.

²⁶Áádóó éí diné dah diináago Het dine'é bikéyahgóó ííná; áadi kin haal'áago áhoolaago Luz hoolyée doo, dííniid; díí jį́į́góó ákóhoolyé.

²⁷Manáseh dine'é ałdó' díí kin hadaas'áágóó índa binaagóó kin dah naazhjaa'ígi kéédahat'ínígíí t'áadoo ch'ídahizneeskaad da; éí kódahoolyéego kin hadaas'á: Beth-shíyan, Téíyanak, Dóor, Íbliyam índa Megído dahoolyé, nidi Kéínan dine'é éí t'áá ákǫ́ǫ́ kéédahat'į́.

²⁸Ákódzaago Ízrel dine'é bidziil daazlį́į'go Kéínan dine'é bá nidaalnishgo ádayiilaa, áko t'áadoo ałtso ch'ídeineeskaad da.

²⁹Íífreiyim dine'é ałdó' Kéínan dine'é Gíízer kin haal'áagi kéédahat'ínígíí t'áadoo ch'ídeineeskaad da, nidi Kéínan dine'é éí t'áá Gíízergi hatahgóó kéédahat'į́.

³⁰Zébyulan dine'é ałdó' Kítran kin shijaa'gi índa Néíhalal kin shijaa'gi kéédahat'ínígíí t'áadoo ch'ídeineeskaad da, nidi Kéínan dine'é t'áá ákǫ́ǫ́ hatahgóó kéédahat'į́įgo hanaalte' ádajiilaa.

³¹Ásher dine'é ałdó' éí díí kin hadaas'áhígi kéédahat'ínígíí t'áadoo ch'ídeineeskaad da; éí kódahoolyéego kin hadaas'á: Éko, Sáídan, Álab, Ákzib, Hélba índa Rííhob dahoolyé.

³²Nidi Ásher dine'é éí Kéínan dine'é yitahgóó kéédahat'į́, háálá éí kéyahdóó t'áadoo ch'ídeineeskaad da.

³³Náftalai dine'é ałdó' Beth-shíímesh kin haal'áagi áádóó Beth-éínath kin haal'áagi kéédahat'íinii t'áadoo ch'ídahizneeskaad da, nidi Kéínan dine'é bitahgóó éí kéyahgi bił kéédahojit'į́. Azhą́ ákót'ée nidi Beth-shíímesh kin haal'áagi áádóó Beth-éínath kin haal'áagi kéédahat'íinii handaalte' danilį́įgo ádajiilaa.

³⁴Ámor dine'é t'áá bizááká Dan dine'é dziłghą́ą́'góó anídeiniłka'go halgaijį' dadookahgo doo yada'di'aah da.

³⁵Nidi Ámor dine'é éí Dził Hérezdi Éíjalan kin haal'áagi índa Sheiyálbim kin shijaa'gi kéédahat'į́; ákót'ée nidi Jóseph dine'é hak'eh deesdlį́į'go binaalte' dajílį́įgo ádahoolaa.

³⁶Áko Ámor dine'é bikéyah bá hoodzooígíí éí Akrábim báhátis áádóó tsékooh hoolyéédóó náhookǫsjigo hoodzo.