Read Navajo JUDGES 11 Bible Online

JUDGES 11 - Navajo bible

JUDGES 11

¹Jéfthah éí Gíliyad kéyahdóó diné jílį́įgo anaa' ííł'íinii doo nánílyéesii jílį́, áádóó asdzání ałjiłnii biyáázh jílį́. Gíliyad éí Jéfthah bizhé'é jílį́.

²Áko Gíliyad hwe'asdzą́ą́ haye' há niyiishchį́, índa hwe'asdzą́ą́ biyáázhké daneeyą́ągo Jéfthah ch'ídeineeshchxą́ą'go ádeidííniid, Nihizhé'é ba'áłchíní bitahdóó nihíí' dadooleełígíí doo ła' níí' dooleeł da, háálá asdzání dé'éyóní nilíinii biyáázh nílį́.

³Ákohgo Jéfthah éí hak'isóó bits'ąą yóó'ajoolwodgo Tob kéyahgi kééhojit'į́į́ nít'éé' índa diné doo yá'ádaat'éehii Jéfthah yił ahínéikahgo yił naanáájah nít'éé'.

⁴Éí ákwe'é hoolzhish yę́ędą́ą́' Áman dine'é éí Ízrel dine'é yich'į' anaa' dahasłį́į́'.

⁵Áko Áman dine'é éí Ízrel dine'é yich'į' anaa' ánáádahoodlaago Gíliyad kéyahdóó dine'é aląąjį' naazíinii Tob kéyahdę́ę́' Jéfthah yił nídadookah yiniyé eekai.

⁶Áko Jéfthah ádeidííniid, Nihaa díínáałgo nihinanít'áago Áman dine'é bił da'ahidiigą́ą́ł.

⁷Nidi Jéfthah éí Gíliyad kéyahdóó dine'é aląąjį' naazíinii áyidííniid, Shą́ą́' dashijiinohłáa ni', áádóó shizhé'é bighandę́ę́' ch'ídashinoołchą́ą' ni'. Ha'át'íísh biniyé áłt'ąą nihich'į' dahodiiznáa'go shaa noohkai?

⁸Áko Gíliyad kéyahdóó diné aląąjį' naazíinii éí Jéfthah ádeidííniid, K'ad nich'į' nináániikai ni: Áman dine'é bił da'ahidiigą́ą́ł biniyé bich'į' nihił dadííbah. Áko Gíliyad kéyahgi kééhwiit'íinii t'áá áníiltso nihinanít'áa doo.

⁹Áádóó Jéfthah éí Gíliyadóó dine'é aląąjį' naazíinii áyidííniid, Áman dine'é bił da'ahidiigą́ą́ł biniyé hooghangóó shił nánoohkaigo índa Bóhólníihii shílák'ee hodíí'ą́ągo, ákódzaagoósh t'áá aaníí nihinanisht'áa doo?

¹⁰Áko Gíliyad kéyahdóó diné á naazíinii éí Jéfthah ádeidííniid, Bóhólníihii nihita'gi oo'íinii nilį́įgo t'áá aaníí t'áá ádínínígi ádadii'nííł.

¹¹Ákohgo Jéfthah éí Gíliyadóó dine'é aląąjį' naazíinii yił dah diikaigo bóhólníihgo nant'áago ádayiilaa. Áko Bóhólníihii binááł Mízpeh kin haal'áagi Jéfthah hazaad t'áá át'é bee yájííłti'.

¹²Áko Jéfthah éí Áman dine'é aláahgo binanit'a'í bich'į' naal'a'í adziis'a'go ábizhdííniid, Haa dashohłéehgo shikéyah bii' hoł da'ahidiigą́ą́ł dashíínóh'níigo shaatįįh wooná?

¹³Áko Áman dine'é binanit'a'í éí Jéfthah binaal'a'í áyidííniid, Jó, Ízrel dine'é éí Ííjip kéyahdę́ę́' náá'nééł yę́ędą́ą́' Árnan tooh nílínídóó Jábak tooh nílíníjį' índa Jórdan toohjį' shikéyah shighadeideest'ą́. Éí bąą k'ad éí kédaayahígíí hasht'ehodít'é bił nihaa náhididíí'ááł.

¹⁴Áádóó Jéfthah éí Áman dine'é aláahgo binanit'a'í bich'į' naal'a'í anáádziis'a'go

¹⁵ábizhdííniid, Jéfthah ání, Ízrel dine'é éí Mó'ab kéyahígíí índa Áman dine'é bikéyahígíí t'áadoo bighadeit'ą́ą da,

¹⁶nidi Ííjip kéyahdę́ę́' ch'íníná yę́ędą́ą́' honoojíígóó Tónteel Łichíí' tsé'naa niikaigo Kéídesh haz'áníjį' yíkai.

¹⁷Ákohgo Ízrel dine'é éí Íídam dine'é aláahgo binanit'a'í yich'į' nidaal'a'í adayiis'a'go ádaaní, Nikéyah biyi'góó ch'ídii'néełgo baa nídaniikąąh. Nidi Íídam dine'é aláahgo binanit'a'í doo hwíists'ą́ą da nít'éé'. T'áá ákót'éego ałdó' Mó'ab dine'é aláahgo binanit'a'í yich'į' anááda'as'a', nidi doo t'áá k'ad ha'di'ní'ą́ą da. Ákohgo Ízrel dine'é éí t'áá Kéídesh haz'ánígi dah yinééł nít'éé'.

¹⁸Ákohgo honoojíígóó ch'íkaigo Íídam kéyah áádóó Mó'ab kéyah yik'ee'ąą ahéná'ná. Áádóó Mó'ab kéyah ha'a'aahjígo Árnan tooh nílíní wónaaníjígo niníná, nidi Mó'ab kéyah t'áadoo biih jíínáa da, háálá Árnan tooh nílíní éí Mó'ab kéyah bee ałts'áhoodzo.

¹⁹Áádóó Ízrel dine'é éí Héshban kin haal'áádóó aláahgo naat'áanii Ámor dine'é binanit'a'í Sáíhan yich'į' naal'a'í adeis'a', áko Ízrel dine'é ádahałní, Niha'di'ní'aah, t'áá shǫǫdí nikéyah biyi'góó ch'ídii'néełgo nihikéyahjį' nidii'nééł.

²⁰Nidi Sáíhan éí hakéyah bibąąhgóó Ízrel dine'é ch'ídoonéłígíí doo beijólíi da, nidi hadine'é áłah ájiilaago Jéíhaz kin haal'áagi nizhnínáago Ízrel dine'é bił da'ahijoogą́ą́'.

²¹Áko Ízrel dine'é biBóhólníihii Diyin God éí Sáíhan áádóó bidine'é t'áá ałtso Ízrel dine'é yílák'eidíí'ą́ągo hak'eh dadeesdlį́į́'. Áko Ámor dine'é bikéyah t'áá át'é Ízrel dine'é bíí' daazlį́į́'.

²²Áko Ámor dine'é bił haz'áanii Árnan tooh nílíní áádóó Jábak tooh nílíní bita'gi índa honoojíídóó Jórdan toohjį' t'áá át'é bíí' daazlį́į́'.

²³Áko Ízrel dine'é biBóhólníihii Diyin God éí bidine'é Ízrel wolyéii binááł Ámor dine'é bikéyahdóó Ámor dine'é nahjį' hainííłkaadgo, ákoósh éí kéyah danihíí' dooleeł?

²⁴Da' doósh nihidiyin bidi'níinii Kíímash wolyéii nihaa yiiníłígíí t'éí nihíí' nidahaleeh da? T'áá ákót'éego nihí Bóhólníihii nihiDiyin God nihinááł kéyah bits'ą́ąjį' ch'íhoniiłkaadígíí éí nihíí' nidahaleeh doo.

²⁵Da' Zípor biye' Béílak Mó'ab dine'é aláahgo binanit'a'í biláahgoósh yá'ádanoht'ééh? Da' łahgoósh Ízrel dine'é yich'į' ana' ndzin, doodaii' daats'í łahgo yił ałk'i néijah?

²⁶Ízrel dine'é éí Héshban kin haal'áii binaagóó kin dah naazhjaa'ígíí t'áá bił, áádóó Aró'er kin haal'áii binaagóó kin dah naazhjaa'ígíí t'áá bił, índa Árnan tooh nílíní bibąąhgóó kin hadaas'áhígóó t'áá át'é kéédahat'į́įgo táadi neeznádiin nááhai. Ha'át'éegoshą' t'áadoo bighanídasidooht'ą́ą da?

²⁷Éí bąą doo nich'į' ádił asísiih da, nidi shich'į' nídinibaa'ígíí bee doo yá'át'éhígi áshiinilaa. Bóhólníihii éí ánihwii'aahii nilį́įgo Ízrel dine'é índa Áman dine'é bita'gi díí jį́ ánihodoo'ááł.

²⁸Nidi Áman dine'é aláahgo binanit'a'í éí Jéfthah bizaad hach'į' yił i'ííł'a'ígíí doo dzíists'ą́ą' da nít'éé'.

²⁹Ákohgo Bóhólníihii biNíłch'i éí Jéfthah bik'i hoole'go, Gíliyad kéyahgóó áádóó Manáseh kéyahgóó ch'ízhníyá áádóó Gíliyad kéyahgi Mízpeh kin haal'áadi jiníyá índa Gíliyad kéyahgi Mízpehdóó Áman dine'é bich'į' ajííyá.

³⁰Áko Jéfthah éí Bóhólníihii yich'į' ádee haadzíi'go ání, T'áá aaníí Áman dine'é shílák'edííní'ą́ągo,

³¹Áman dine'é hasht'edadíít'e'go, hooghanjį' nááshdáałgo shighan bich'é'étiindóó t'áá ha'át'íhída shaa níyáhígíí éí Bóhólníihii bíí' át'é. Áko éí didlidgo nááhániihii nááhideeshnih.

³²Áko Jéfthah éí ha'naajígo Áman dine'é bił da'ahizhdoogą́ą́ł biniyé bich'į' ha'naa nizhníbaa'go Bóhólníihii éí Áman dine'é hálák'eidíí'ą́.

³³Áko Aró'er kin haal'áádóó Mínith kin haal'áajį' ałtso nidzistseed; éí naadiingo kin haal'áá nít'éé'; t'áá Éíbel-kéramim haz'áníjį' ts'ídá ayóó át'éego nabídzísdįįd. Ákohgo kót'éego Ízrel dine'é dabinááł Áman dine'é bik'eh dahodeesdlį́į́'.

³⁴Ákohgo Mízpeh kin haal'áagi Jéfthah bighanjį' náádáałgo, jó, hatsi' éí ásaa' yilghaałígíí bik'ehgo hach'į' chí'ílzhiizhgo haa ílzhiizh; t'áá éí t'éiyá hwe'awéé' nilį́; haye' índa hatsi' doo ła' nááhódlǫ́ǫ da.

³⁵Áko hatsi' dziiłtsą́ągo ha'éé' ák'i nijooldláadgo ájíní, Héi', shitsi' nílíinii, ayáhígo áshiinilaago biniinaa t'áá íiyisí shich'į' hodiiznáá', háálá Bóhólníihii bich'į' ádee hadeesdzíi'go k'ad doo łahgo ánáoshdle' át'ée da.

³⁶Áko hatsi' áhodííniid, Shizhé'é, Bóhólníihii bich'į' ádee hadíínídzíi'go shí ałdó' bik'ehgo háínídzí'ígíí shich'į' ádoonííł, háálá Bóhólníihii éí Áman dine'é ni'ana'í nilíinii ná k'éidiidlaa.

³⁷Áko éí hazhé'é ábizhdííniid, Háni'dii díí t'áadoo le'égóó shá áhodoonííł nisin: shíni'dii naaki nídeezidjį' t'áá sáhí dziłghą́ą́'góó adeesháałgo bizháán naasháhígíí shí áádóó shik'is ałdó' bik'édí hódlǫ́ǫ dooleeł.

³⁸Áko ázhdííniid, Nílááh yínááł. Áko naaki nídeezidjį' yóó'ahojííł'a'go hatsi' áádóó bik'is yił dah diikaigo bizháán nijigháhígíí bik'édí jílį́įgo dziłghą́ą'di nijikai nít'éé'.

³⁹Áko naaki hwee nídeezidgo hazhé'é bich'į' nídzídzá; éí ádee haadzí'ígíí bik'ehgo ádzaa. Jó, t'ah doo diné ła' bił jiniteesh da. Áko Ízrel dine'é bibee é'él'į' bik'ehgo ákóda'ał'į́;

⁴⁰t'áá nináháhááh bik'eh Ízrel dine'é bitsi'ké danilíinii Jéfthah éí Gíliyad dine'é nilį́įgo bitsi' baa nídajichahgo dį́'í jį́ ná'ádleehgo nínáhah nít'éé'.