Read Navajo JUDGES 14 Bible Online

JUDGES 14 - Navajo bible

JUDGES 14

¹Sámson éí Tímnah kin shijaa'góó jiníyáago áadi Filístiya dine'é bitsi'ké ła' dziiłtsą́.

²Áádę́ę́' nídzídzáago hazhé'é áádóó hamá bił hojoolne'go ájíní, Tímnah kin shijaa'gi Filístiya dine'é bitsi' ła' yiiłtsą́. Áko k'ad she'asdzą́ą doo biniyé shá bił nánóhkááh.

³Nidi hazhé'é áádóó hamá áhodííniid, Da' nik'éí bitsi'ké, doodaii' nihidine'é bitahgóó asdzání ádingoósh biniinaa Filístiya dine'é doo bąąh nídahineeshgizhii bitahdę́ę́' asdzání ła' ne'asdzą́ą doo? Nidi Sámson bizhé'é ánéidoo'niid, Shá bił nánít'aash, háálá t'áá íiyisí shił yá'át'ééh.

⁴Nidi díí éí Bóhólníihii bits'ą́ą́dę́ę́' át'éhígíí hazhé'é índa hamá doo bił bééhózin da, háálá Bóhólníihii éí Filístiya dine'é bíká doot'áałgi yíká déez'į́į́' nít'éé'. Ákwii hoolzhish yę́ędą́ą́' Filístiya dine'é ts'ídá ayóó át'éego Ízrel dine'é yee ádídahólnííh nít'éé'.

⁵Ákohgo Sámson éí Tímnah kin shijaa' góyaa hazhé'é áádóó hamá bił jíkai, áko Tímnahgi ch'il na'atł'o'ii k'éédílyéehgi jiníyáago, jó, náshdóítsoh yáázh bitsiijį' ditł'ooígíí bii' nahodi'ni'go haatįįh yíyá.

⁶Áko Bóhólníihii biNíłch'i Diyinii bibee adziilii hak' i hoole'go t'áadoo nijiléhígóó t'áá tł'ízí yázhí nijiiníshígi át'éego náshdóítsoh bitsiijį' ditł'ooígíí nijiizhnizh. Nidi ádziidzaaígíí bee t'áadoo hazhé'é áádóó hamá bił hojoolne' da.

⁷Áádóó Sámson dah náádiidzáago asdzání bił ahił hojoolne', áko Sámson éí t'áá íiyisí asdzání hoł yá'át'ééh.

⁸Áádóó éí bik'ijį' asdzání bił nihéézhdoot'ash biniyé náájoodááł nít'éé'; náshdóítsoh bitsiijį' ditł'ooígíí bits'íís jidínóoł'įįł biniyé naanii hajííyá. Nít'éé' jó, tsés'ná éí náshdóítsoh bitsiijį' ditł'ooígíí bits'íís yiih yínáá lá áádóó tsés'ná bitł'izh bii' hazlį́į́' lá,

⁹áko ła' nízhdiinilgo jiyą́ągo níjoodááł, áko hazhé'é áádóó hamá baa nídzídzáago ła' baazhnínilgo éí ałdó' ła' yiyííyą́ą́'. Nidi náshdóítsoh bitsiijį' ditł'ooígíí bits'íís bii'dóó tsés'ná bitł'izh nízhdiinilígíí éí t'áadoo bee bił hojoolne' da.

¹⁰Áádóó hazhé'é éí asdzání yich'į' níyá, áko áadi Sámson éí ída'azįįd ájiilaa, háálá diné ániid nidaakaii da'iiyehgo ákóda'ał'į́.

¹¹Áko ákódzaago diné dahoołtsą́ągo dabik'isóó tádiingo nídeiizh'eezhgo yił haa áłah silį́į́'.

¹²Áko Sámson éí diné áyidííniid, Tsosts'id jį́ ída'azįįd bee hoogááł biyi' saad nanil'ingo béédi'dootį́įłii ła' bee nihich'į' hadeesdzih, áko ááhyiłnínígíí nihił béédahoozingo bee shił dahodoołnih, ákohgo ééłgaii tádiingo índa éé' bee ha'dít'éhígíí ałdó' tádiingo nihaa deesh'nił,

¹³nidi t'áadoo shił dahoołne'góó nihí ééłgaii tádiingo índa éé' bee ha'dít'éhígíí shaa dadoohnił. Áko ádahodííniid, Haa'íyee', saad nanil'ingo béédi'dootį́įłii bee handziih; bíni'dii dadidiits'į́į́ł.

¹⁴Áko ábizhdííniid, Ayáanii bitsą́ą́dę́ę́' doodį́įłii hazlį́į́'. Bidziilii bits'ą́ą́dę́ę́' łikanii hazlį́į́'. Áko saad nanil'ingo béédi'dootį́įłii tágí jį́ ch'ééh béédazhdeetįįh.

¹⁵Tsosts'id yiską́ągo Sámson be'asdzą́ą́ ádeidííniid, Nahastiin bich'į' baa nisi'níłdeełgo saad nanil'ingo béédi' dootį́įłii ááhyiłnínígíí yee nihił hodoolnih, doodaii' doo íinidzaagóó t'óó adandidiilk'ą́ą́ł índa nizhé'é bighandóó danilíinii ałdó' adadidiilk'ą́ą́ł. Da' hojooba' ádaniit'ée doósh biniyé nihíká ádííníniid?

¹⁶Áko Sámson éí hwe'asdzą́ą́ yichago áháłní, Ayóogo shijiiníłxá; doo ayóó'áshííní'níi da; shikéyahdóó diné bich'į' saad nanil'ingo béédi'dootį́įłii bee bił hwíínílne', áko ááhdinínígíí doo bee shił hólne' da. Áádóó ábizhdííniid, Jó, shizhé'é áádóó shimá nidi doo bee bił hashne' da, da' ákoósh bee nił hodeeshnih lá?

¹⁷Ída'azįįd bee nihoolzhiizhjį' asdzání náhookąąhgo tsosts'id jį́ azlį́į́'. Áko tsosts'id yiską́ągo índa bee bił hojoolne', háálá t'áá bizááká hach'į' yaa niséé'áłdił. Ákohgo saad nanil'ingo béédi'dootį́įłii bidine'é yee yił náhoolne'.

¹⁸Áko tsosts'id jį́į́ góne' t'áadoo e'e'aahí kin haal'áádóó diné éí Sámson ádeidííniid, Ha'át'íishą' tsés'ná bitł'izh biláahgo łikan? Ha'át'íishą' náshdóítsoh bitsiijį' ditł'ooígíí biláahgo bidziil? Áko nít'éé' ábizhdííniid, Shibéégashiistsa'ii doo bee nidahoyołdlaadgóó saad nanil'ingo béédi'dootį́įłii shits'ą́ą́' t'áadoo nihił béédahoozin da doo nít'éé'.

¹⁹Áko Bóhólníihii biNíłch'i Diyinii bibee adziilii hak'i hoole'go Áshkelan kin haal'áágóó jiníyáago áadi diné tádiingo nidzistseed, áko bindaalye'é nízhdiinilgo saad nanil'ingo béédi'dootį́įłii yaa dahoolne'ígíí éé' bee ha'dít'éhígíí bitaadziznii'. Áko hoł hazhchxihgo t'óó hazhé'é bighangóó dah nízdiidzá.

²⁰Sámson éí diné ła' bił ałch'ojónéego chojooł'íinii hwe'asdzą́ą́ baa yíltį́.