Read Navajo JUDGES 15 Bible Online

JUDGES 15 - Navajo bible

JUDGES 15

¹Ákódaadzaadóó bik'ijį' da'agizhjį' ahoolzhiizhgo Sámson éí tł'ízí yázhí joołtéełgo hwe'asdzą́ą́ nít'é'ígíí baazhníyáago ázhdííniid, Da'njah góne' she'asdzą́ą́ bił yah adeeshááł nisin. Nidi asdzání bizhé'é doo yah azhdoogááłgóó yee há hooł'a'.

²Asdzání bizhé'é áhodííniid, Baa nitsískeesgo t'áá íiyisí doo bił ni'níłdįįh da nisingo biniinaa diné bił ałch'oni'níigo choiníł'íinii baa níłtį́. Da' bideezhíísh doo biláahgo nizhóní da? Éiigo nídiiłteeh, baa nánooshkąąh.

³Áko Sámson ánááhodoo'niid, K'ad Filístiya dine'é atésh'į́įgo éí t'áadoo bee shik'íhót'ahí da doo.

⁴Áko Sámson dah diiyáago mą'ii dootł'izhí táadi neeznádiingo bił nidziizdéelgo bitsee' ahidiníłnáago ahídaastł'ǫ́ǫgo honooyééł bídajiistł'ǫ́.

⁵Áko honooyééł dazhdiiłtłahgo mą'ii dootł'izhí Filístiya dine'é bidá'ák'ehgóó bidazhdeezhchid, áko t ł'oh naadą́ą́' daaldee'go ahandahaashjoolígíí índa t'ah doo daaldéhígíí ałdó' áádóó ch'il na'atł'o'ii deíl'áhígíí índa áliv tsin nidant'ą'ii ałtso adahideezk'ą́ą́'.

⁶Ákohgo Filístiya dine'é ádaaní, Díísh háí át'į́? Nít'éé' ła' ádaaní, Tímnah dine'é nilíinii baadaaní Sámson át'į́, háálá diné ła' bił ałch'ojí'níinii hwe'asdzą́ą́ baa yíltį́. Áko Filístiya dine'é ákóde yíkaigo asdzání áádóó bizhé'é bighandóó danilíinii t'áá bóóltą'go adeideesk'ą́ą́'.

⁷Áko Sámson áhodííniid, Kódaahdzaaígíí bąą ts'ídá k'éénihidiishdlaago índa ááhodeesht'įįłgo ádee hadeesdzíí'.

⁸Áko ts'ídá ayóó át'éego nabídzísdįįd áádóó dashdiiyáago Íítam kin shijaa'gi tségiizh góne' haghan nít'éé'.

⁹Ákohgo Filístiya dine'é dah diikaigo Júdahgi nidahaazná índa Lííhai haz'ání bóhoneel'ą́ągo nidahaazná.

¹⁰Áko Júdah dine'é ádaaní, Ha'át'íishą' biniyé nihik'iidoohjahgo nihí niikánoohkai? Nít'éé' ádahodííniid, Sámson bida'diitł'óół biniyé niikai; t'áá ánihijiilaaígi áńdahodiilnííł.

¹¹Áko Júdah dine'é táadi míilgo Íítam kin shijaa'gi tségiizhdi Sámson yaa yíkaigo ádaaní, Filístiya dine'é nihindant'áhígíísh doo nił bééhózin da? Díísh haa nihiinilaa? Áko ábizhdííniid, T'áá hó shich'į' ákódajit'į́įgo biniinaa ákódahooshłaa.

¹²Áko ádahodííniid, Nida'diitł'óołgo Filístiya dine'é bílák'ee dandidiit'ááł biniyé naa niikai. Áko Sámson éí diné áyidííniid, T'áá nihí doo dashidiyoołhééłgóó bee shich'į' ádee hadahididoohdzih.

¹³Nít'éé' ádahodííniid, Aoo', t'óó nida'diitł'óołgo bílák'ee dandidiit'ááł. Doo dandiyiilyéeł da. Ákohgo tł'óół ániidígíí naakigo yee hweda'aztł'ǫ́ǫgo tségiizhdę́ę́' ch'ídahazlóóz.

¹⁴Áko Lííhai haz'ánígi jiníyá. Nít'éé' Filístiya dine'é dadilwoshgo hadááh yíkai. Áko Bóhólníihii biNíłch'i Diyinii bibee adziilii hak'i hoole'go tł'óół bee hagaan be'estł'ónígíí azhííh diiltłah nahalingo nijiiníishgo haa diiłdááz.

¹⁵Áko télii biyaats'iin t'ah ditłéé' léi' bił hajíídéelgo éí bee diné míilgo nidzistseed.

¹⁶Áko Sámson ázhdííniid, Télii biyaats'iin bee míilgo diné nisíłtsxeedgo ałk'i dadeesk'idgo áshłaa.

¹⁷Ałtso niyázhníłti'go télii biyaats'iin nahgóó ajiyííłxan. Áko ákwe'é Réímath-lííhai hoolyée doo, jidííniid.

¹⁸Áko nít'éé' t'áá íiyisí dibáá' dzizlį́į'go Bóhólníihii bich'į' sozdoolzingo ájíní, Díí ayóó át'éego ná naal'a'í bíla' bee yisdá'íínínil. Ákoósh k'ad t'óó dibáá' shidiyoołhéełgo doo bąąh nídahineeshgizhii bílák'ee deeshtłish?

¹⁹Áko Lííhai haz'ánígi hooldzis léi'gi Diyin God ąą áhoolaago áádę́ę́' tó háána'go éí joodlą́ą́'; nít'éé' hwiih náhwiisdogo hasht'e'ninádzídzá. Éí bąą Enhákorii hoolyée doo, jidííniid. Díí jį́į́góó t'ahdii Lííhai haz'ánídi hólǫ́.

²⁰Áko Filístiya dine'é bidziilgo naaldeehdą́ą́' Sámson éí Ízrel dine'é bá nihozhdiyii'aahgo naadiin nááhai.