Read Navajo JUDGES 16 Bible Online

JUDGES 16 - Navajo bible

JUDGES 16

¹Sámson éí Géíza kin haal'áágóó jiníyáago áadi asdzání ałjiłnii léi' dziiłtsą́, áko bił jineezhtéézh.

²Sámson kwe'é níyá, daaníigo Géíza dine'é ahił dahoolne'. Áko kin haal'áago dáń'dítį́įhgi tł'éé' bíighah haa héeshjée'go yiską́. Tł'éé' bíighah hasht'edadít'éego ádaaní, Háni'dii ha'íí'ą́ąjį' dahodiyiilyééł.

³Nidi tł'é'ííłníi'jį' Sámson sitį́į́ nít'éé', áko tł'é'ííłníi'go nídii'na'go kin haal'áhígíí bidáádílkał t'áá áłah áádóó ałts'ą́ą́hjí bá íí'áhígíí índa naadasitánígíí t'áá bił hajíínilgo hawoostis dah dziznilgo Hííbran bíighahgi dah yisk'id bighą́ą'jį' hajizhjaa'.

⁴Ákódzaadóó bik'ijį' Sórek yíldzisdi asdzání ła' Diiláílah wolyéego ayóó'ájó'ní.

⁵Áko Filístiya dine'é bindanit'a'í baa yíkaigo ádabidííniid, Hach'į' baa nisi'níłdeełgo bee ayóó áhóodziilii índa haash yit'éego hak'eh dadidiidleeł, áko hoda'diitł'óołgo atídahodiilnííł. Áko t'ááłá'í niitínígo béésh łigaii ła'ts'áadahdi neeznádiingo naa dahidii'nił.

⁶Áko Diiláílah éí Sámson ábizhdííniid, Ha'át'éegoshą' ayóó ánóodziil? T'áá shǫǫdí bee shił hólne'. Índa haash yit'éego ne'astł'ǫ́ǫgo t'éí atíndi'doolnííł.

⁷Áko Sámson éí asdzání ábizhdííniid, Ałtįįtł'óól t'ah ditłée'ii tsosts'idgo bee she'astł'ǫ́ǫgo lą́ą, áko t'áá ła' diné ádaat'éhígi át'éego doo shidziil da deeshłeeł.

⁸Ákohgo Filístiya dine'é bindanit'a'í éí ał tįįtł'óól t'ah ditłée'ii tsosts'idgo asdzání yaa deiznil, áko yee hwe'aztł'ǫ́.

⁹Áko asdzání éí ná'áne'édę́ę́' diné héeshjée'go áyiilaa. Áádóó hadoolghaazhgo ání, Sámson, Filístiya dine'é nik'i dah yizhjéé'! Nidi ałtįįłtł'óól bee hwe'astł'ónígíí tł'óół yilzhólígíí kǫ' bee yideez nahalingo jiizhnizhgo náhizhdiitah. Ákohgo bee hadziilii t'áadoo bił bééhooziní da.

¹⁰Áko Diiláílah éí Sámson áyidííniid, Jó, t'óó shá nahosíníłt'i'go shinisínílo'. T'áá shǫǫdí hait'éegoshą' ni'dootł'óół bee shił hólne'.

¹¹Áko ábizhdííniid, Tł'óół ániidíii t'ah doo choo'įįhii bee she'astł'ǫ́ǫgo lą́ą, áko t'áá ła' diné ádaat'éhígi át'éego doo shidziil da deeshłeeł.

¹²Ákohgo Diiláílah éí tł'óół ániidíii ła' néidiinilgo yee hwenáá'áztł'ǫ́ǫgo hadoolghaazhgo ání, Sámson, Filístiya dine'é nik'i dah yizhjéé'! Áko diné éí ná'áne'édę́ę́' héeshjéé'. Nidi bee hwe'astł'ónígíí bee ná'álkadí nahalingo ałtso jiizhnizh.

¹³Áko Diiláílah éí Sámson ánéidoo'niid, T'ahdii yee' t'óó shá nahółt'i'go shina'ílo'. Hait'éegoshą' ni'dootł'óół bee shił hólne'. Áko ábizhdííniid, Shitsii' tsosts'id yishbizhgo dah iistł'ǫ́ bił díítł'óołgo bíighah doo.

¹⁴Áko ajiiłhaazhgo hatsii' yiztł'ǫ́ǫgo tsin niłdzilgo yá ayíítsih áádóó hadoolghaazhgo ání, Sámson, Filístiya dine'é nik'i dah yizhjéé'! Nidi ch'éédzídzidgo bik'i atł'óhí áádóó dah iistł'ónígíí t'áá bił náhizhdiitah.

¹⁵Áko asdzání áhodííniid, Ha'át'éegoshą' ayóó'áníínísh'ní shidiníi nidi nijéí bee doo shit'áhíjį' nitsíníkees da? K'ad t'óó shá nahółt'i'go táadi azlį́į́', áko bee ayóó ánóodziilii t'ah doo bee shił hólne' da.

¹⁶Áko t'áá ákwíí jį́ t'áá bizááká hach'į' yaa niséé'áłdiłgo náhookąąhgo t'óó báhádzidgo ts'ázdoos'nih.

¹⁷Áko bee nitsídzíkeesii t'áá át'é bee bił hojoolne'go ájíní, Ts'ídá doo shitsii' shá yilzhéeh da, háálá t'áá shimá shi'niiltsąądę́ę́' Diyin God bich'į' Názarait nishłį́. Shá oolzhée'go bee shidziilii shits'áhodooleeł, áko t'áá ła' diné ádaat'éhígi át'éego doo shidziil da deeshłeeł.

¹⁸Áko bee nitsídzíkeesii t'áá át'é Diiláílah bee bił hojoolne'go bił bééhoozingo Filístiya dine'é binanit'a'í yich'į' i'ííł'a'go ání, T'áá díí t'éiyá náádoohkah, háálá bintsíkees t'áá át'é yee shił hoolne'. Ákohgo Filístiya dine'é binanit'a'í éí asdzání yaa yíkaigo béeso yílák'ee deiznil.

¹⁹Áko bitsoosk'id bikáa'jį' hwi'iiłhaazhgo diné ła' hágo yidííniidgo hatsii' tsosts'idgo yishbizhígíí yiyiizhgizh. Ákohgo asdzání atíhóół'įįdgo bee hadziilii hats'áldoh.

²⁰Áko hadoolghaazhgo ání, Sámson, aadę́ę́' Filístiya dine'é nik'i dah yizhjéé'! Áko ajiłhoshdę́ę́' nízhdiina'go ájíní, T'áá ánéisht'įįhígi át'éego ch'ídeeshááł áádóó ádíshgáád dooleeł. Áko Bóhólníihii hats'ą́ą́' dahodiile'ígíí doo hoł bééhózin da.

²¹Áko Filístiya dine'é dahasiłgo hoda'aztł'ǫ́ índa hanáá' hayída'ashiizhgo Géíza kin haal'áá góyaa adahazlóóz. Áko béésh łitsoii béésh da'ahólzha'ígíí yee hweda'aztł'ǫ́, índa awáalyaa góne' ajik'áago ádahoolaa.

²²Nidi há'oolzhéé'dóó bik'ijį' hatsii' nídíneesą́.

²³Filístiya dine'é binanit'a'í danilíinii éí t'áá ła' bizhi'ee áłah silį́į'go ayóó át'é nááhániihígíí bidiyin bidi'níinii Déígan wolyéii yich'į' náádeidiyoołnihgo bił dahózhǫ́ǫgo ádaaní, Nihidiyin éí Sámson nihi'ana'í nilíinii nihílák'eidíí'ą́.

²⁴Áko diné dahoołtsą́ągo bidiyin yaa dahaniihgo ádaaní, Nihikéyahgi nihi'ana'í náhoodǫ́ǫsgo lą'í niilt'éego nanihistseedígíí nihidiyin nihílák'ee hodíí'ą́.

²⁵Áko bijéí bił dahózhǫ́ǫgo ádaaní, Sámson baa dloh nihighą́ą doo biniyé hágo bidohní. Ákohgo awáalyaagóó Sámson yíká ada'as'a' áádóó haa dloh bighą́, áko kin bíyah nii'áii bita'gi nidahazlóóz.

²⁶Áko Sámson éí ashkii nabilózígíí áyidííniid, Haa'íyee' díí kin bíyah nii'áhígíí kin dego yótą'ígíí bíniishtį́į doo biniyé bidinishnííh.

²⁷Wóne'é éí diné áádóó asdzání hazdeezbin; Filístiya dine'é binanit'a'í t'áá ałtso ákóne' áłah nilį́. Áko dah nidahaz'ánídóó diné áádóó asdzání táadi mííl yilt'éego Sámson yaa dloh dabighą́.

²⁸Ákohgo Sámson éí Bóhólníihii yich'į' sodoolzingo ání, Bóhólníihii Diyin God nílíinii, shéénílnííh baa nánooshkąąh; Diyin God nílíinii, shidziilgo ánáshídlééh, áko Filístiya dine'é shináá' hadeiznilii t'ááłáhídiígíí ałtso k'éédideeshdlííł.

²⁹Áádóó Sámson éí kin bíyah nii'áii naakigo ałníi'giígíí bíighahgi dziizį'go hála' nish'náájí áádóó hála' nishtł'ahjí bee kin bíyah nii'áii kin dego yótą'ígíí ałts'ą́ą́hjí bizhdeelnii'.

³⁰Áko Sámson ázhdííniid, Shíni'dii Filístiya dine'é bił dínéeshnééł. Ákohgo yaa ádziidzaago t'áá bizááká dzideesdzil. Nít'éé' naat'áanii danilíinii índa diné ákwii yíl'áhígíí bik'ijį' kin ahiih nááłdááz. Áko jiiná yę́ędą́ą́' nijistseedígíí bilááh ánéelą́ą'go dadziztsánígi daneezná.

³¹Áko hak'isóó índa hazhé'é bighandóó danilíinii t'áá ałtso ákwii nidahaaskaigo nídahodiiłtį́įgo nídahastį́ áádóó Zórah kin shijaa' índa Éshteiyal kin shijaa' bita'gi hazhé'é yę́ę Manówah bitséní'ootséél góne' yóó'ádahoolaa. Ízrel dine'é bá nihozhdiyii'aahgo naadiin nááhai.