Read Navajo JUDGES 18 Bible Online

JUDGES 18 - Navajo bible

JUDGES 18

¹Éí yoołkááł yę́ędą́ą́' Ízrel dine'é bitahgi aláahgo naat'áanii doo hólǫ́ǫ da nít'éé'. Áko íídą́ą́' Dan dine'é éí kéyah yikáá' kéédahat'į́į dooleełígíí hadeintá, háálá íídą́ą́' Ízrel dine'é bitahgóó kéyah íí' dooleełii doo ła' hach'į' kódaalnéeh da.

²Áko Dan dine'é danilíinii t'áá bí bidine'é bitahdóó diné doo nídanilyéesii ashdla' yilt'éego Zórah kin shijaa'dóó índa Éshteiyal kin shijaa'dóó naalchi'í danilį́įgo éí kéyahgóó hazhó'ó hada'doohsił biniyé dah dazhdiił'a', áko ádeidííniid, Nílááh, kéyah hazhó'ó hadaohsííd. Áko Dził Íífreiyimgi yíkaigo Máíkah bikingi daneezhjéé'.

³Áko Máíkah bikingi nidaháaztą́ą́ nít'éé'; Líívai dinééh biinéé' yéédahoosįįdgo yich'į' niikaigo ádeidííniid, Háishą' kwe'é nił ní'áázh? Díí kéyahgishą' ha'át'íí baa naniná? Kwe'ésh ha'át'íí nee hólǫ́?

⁴Áko ábizhdííniid, Kót'éego Máíkah shá ádzaago bik'é shich'į' ni'iiléego bináá'iiłniihii sélį́į́'.

⁵Áko ádahodííniid, Haash yit'éego dooleeł Diyin God nihá nabídíłkid baa nídaniikąąh. Áko díí nihił béédahodoozįįł: dadiikaigóó yá'át'éehgo nihá áhooníiłgo deíníikáah doo.

⁶Áko náá'iiłniihii áhodííniid, Nílááh, hózhǫ́ǫgo wohkah; Bóhólníihii nihił hólǫ́ǫgo deínóhkáah doo.

⁷Ákohgo diné ashdlalt'éhígíí dah náádiikaigo Léíyish kin haal'áadi yíkai. Áko t'áadoo yąąh dabíni'ígóó ákwii kéédahat'ínígíí Sáídan dine'é bił hasht'ehodít'é áádóó hasih dahodiil'aahgo kéédahat'ínígi át'éego dziiłtsą́. Éí kéyah biyi' naat'áanii doo hólǫ́ǫ dago doo baa yáhásinígi ádabi'dilnéeh da. Sáídan dine'é bits'ą́ądi nízaadi kéédahojit'į́įgo bąą dadine'é náánáła' doo bił ahaa nida'jiilniih da.

⁸Áádóó ashdlajilt'éhígíí Zórah kin shijaa'gi áádóó Éshteiyal kin shijaa'gi hak'isóó baa níjíkaigo ádahałní, Haa dahoot'éé lá?

⁹Áko ádaaní, Sołtį', bich'į' hidiikah; jó, kéyah hadasiilzidígíí t'áá íiyisí hózhóní. Doósh baa nidaahkaí da? T'áadoo nida'áhodołdziidí, ákǫ́ǫ́ dah doohkáahgo kéyah nihíí' ádaohłééh.

¹⁰Ákǫ́ǫ́ dahisidoohkaigo hasih dahodiil'aahgo kéédahat'ínígíí baa doohkah. Kéyah ayóó áhoníłtsxooígíí Diyin God nihílák'eidíí'ą́. Éí bikáa'gi ts'ídá t'áadoo bídin hóyé'ígóó t'áá ałtsoní dahólǫ́ǫgo haz'ą́.

¹¹Zórah áádóó Éshteiyal kin naazhjaa'dóó Dan dine'é hastą́ądi neeznádiingo naagé bee nida'abaahii yee hasht'e'ádadiilyaaígíí ch'íníná.

¹²Ákǫ́ǫ́ nínáago Júdah kéyah biyi' Kírjath-jíyarim kin haal'áadi ákwii dah yinééł nít'éé'. Díí jį́į́góó éí haz'ą́ągi Méíhaneh-dan yee dahóózhi', éí Kírjath-jíyarim e'e'aahjígo áhoolyé, jó'akon.

¹³Áádę́ę́' ch'ínínáago Dził Íífreiyimgi Máíkah bighandi yíkai.

¹⁴Áko ashdlalt'éego Léíyish kin haal'áágóó naalchi'í daazlį́'ígíí bik'isóó ádeidííniid, Nihiłísh béédahózin? Díí daakin biyi' góne' íífad wolyéii áádóó térafim wolyéii índa ła' bik'i na'ashk'aazhgo, ła' éí nídoolyį́į'go eda'alyaii dahólǫ́. Éí bąą k'ad ádadoohłíiłgi hazhó'ó baa nitsídaahkees.

¹⁵Áko Máíkah bighanjigo dah diikaigo Líívai dinééh bighandi yaa yíkaigo, Yá'át'ééh, deidííniid.

¹⁶Áko Dan dine'é hastą́ądi neeznádiingo naagé bee nida'abaahii yee hasht'e'ádadiilyaaígíí dáń'dítį́įhgi naazį́.

¹⁷Áko ashdlalt'éego kéyahgóó naalchi'í daazlį́'ígíí yah eekaigo bik'i na'ashk'aazhgo e'elyaii áádóó íífad wolyéii índa nídoolyį́į'go eda'alyaii nídeidiinil. Áko náá'iiłniihii éí tł'óo'di dáń'dítį́įhgi diné hastą́ądi neeznádiingo naagé bee nida'abaahii yee hasht'e'ádadiilyaaígíí yił naazį́.

¹⁸Áko díí Máíkah bighan góne' yah aakaigo bik'i na'ashk'aazhgo e'elyaii áádóó íífad wolyéii áádóó térafim wolyéii índa nídoolyį́į'go eda'alyaii nídazhdiinilgo náá'iiłniihii áháłní, Ha'át'íishą' baa naahkai?

¹⁹Áko ádahodííniid, Ge', nizéé' dádíínílnii'go nihił yíkah, áko azhé'é áádóó náá'iiłniihii nihá nílį́į doo. Da' diné t'ááłá'í bighandóó danilíinii bá náá'iiłniihii nílį́įgo daats'í aláahgo ná yá'át'ééh, doodaii' Ízrel dine'é áádóó bighandóó danilíinii bá náá'iiłniihii nílį́įgo daats'í aláahgo ná yá'át'ééh?

²⁰Áko náá'iiłniihii bił hóózhǫǫdgo íífad wolyéii áádóó térafim wolyéii índa bik'i na'ashk'aazhgo e'elyaii néidiinilgo diné bitahgóó ííyá.

²¹Ákohgo bada'áłchíní áádóó dabilį́į́' índa dabiyéél bilą́ąjį' yééda'asnii'go dah nídiikai.

²²Áko Máíkah bighandóó nízaadgóó ajookaigo Máíkah bikin bíighahgóó t'áá áyídígi dabighanígíí áł ah silį́į'go Dan dine'é hóníjéé'.

²³Áko Dan dine'é yich'į' dadilwosh. Nít'éé' Máíkah bich'į'go nídadzizyizgo ádabijiní, Haa lá yinidzaago diné t'óó ahayóí nikéé' nooyééł?

²⁴Áko ájíní, Shidiyin danilį́įgo íishłaaígíí índa náá'iiłniihii shits'ą́ą́' bił yóó'oohkááh lá, áko ha'át'íishą' t'éí yisdzíí'? Ákohgo ha'át'éegoshą' ádashidohní, Haa lá yinidzaa?

²⁵Áko Dan dine'é ádahodííniid, T'áadoo nihitahgóó niinéé' diits'a'í, áko doo ła'da bá dahodoochįįłgo nik'iidoojah da, áádóó ne'iina' índa na'áłchíní doo bił ádíídįįł da.

²⁶Ákohgo Dan dine'é dah dadiikaigo haláahgo ádabóodziilígíí Máíkah hoł bééhoozingo t'ą́ą́' dah nízdiidzáago haghangóó anídzoodzá.

²⁷Áko Dan dine'é éí Máíkah ádayiilaaígíí hanáá'iiłniihii yił nídeidiinilgo Léíyish kin haal'áajį' yíkaigo diné ádahodéeszée'go áádóó hasih dahodiil'aah nít'éé' yę́ę diltłish yee nideistseed, áko kin haal'áii ádeideesk'ą́ą́'.

²⁸T'áadoo háká aalwodí da, háálá Sáídan éí doo deeghání da índa doo ła' bił ahaa nida'jiilniihí da. Beth-rííhob nahós'a' góyaa nidi ákódahóót'įįd. Ákondi kin haal'áago áńdayiidlaa áádóó ákwii kéédahat'į́.

²⁹Dan éí Ízrel ba'áłchíní bitahgi ho'dizhchį́įgo dabizhé'é yę́ę jílį́į́ nít'éé' kin haal'áago ádayiilaaígíí házhi' yee dahóózhi'. Nidi áłtséédą́ą́' kin haal'áii éí Léíyish hoolyéé nít'éé'.

³⁰Áko Dan dine'é éí e'elyaii t'áá bí ádá dah dayiyiisį'. Manáseh biye' Gérsham nilíinii éí haye' Jánathan áádóó biye'ké éí kéyah nahós'a'gi yisnááh dadzizlį́į'jį' Dan dine'é bá nááda'iiłniihii dajílį́į́ nít'éé'.

³¹Ákohgo Máíkah bi'e'elyaii áyiilaaígíí Dan kin haal'áagi dah sizį́įgo ádayiilaa; Diyin God biníbaal bii' hodílzinii Sháíloh haz'ą́ągi si'ą́ yę́ędą́ą́' ákódayósin nít'éé'.