Read Navajo JUDGES 19 Bible Online

JUDGES 19 - Navajo bible

JUDGES 19

¹Éí yoołkááł yę́ędą́ą́' Ízrel dine'é bitahgi aláahgo naat'áanii doo hólǫ́ǫ da nít'ée'go Líívai diné léi' Dził Íífreiyimdę́ę́' níyáago Júdah kéyah nahós'a'gi Béthlehem kin shijaa'dóó asdzání nilį́įgo hwe'asdzą́ą́ jíł'íní ájiilaa.

²Áko hwe'asdzą́ą́ jíł'íní ałjiłgo hats'ą́ą́' dah yilwo' silį́į́'; Júdah nahós'a' Béthlehem kin shijaa'gi bizhé'é bighango ákǫ́ǫ́ eelwod. Áko dį́į́' nídeezidjį' áadi sidáá nít'éé'.

³Ákohgo hahastiin nídii'na'go hakéé' dah diiyá índa bá áhwiinít'į́'ígo hach'į' yáłti'go áádę́ę́' hoł nídoot'ash yiniyé dah diiyá. Bá naal'a'í yił dah dii'áázh índa télii ałdó' naakigo. Áko asdzání t'áá bí bizhé'é bighan góne' hoł yah íí'áazhgo bizhé'é hoołtsą́ągo haa bił nihoozhǫǫhgo haa níyá.

⁴Áko baadaaní jílíní, éí ch'ikę́ę́h bizhé'é t'áá ákwii dzizdáa doo hó'níigo bił dzizkéego táá' hwiiską́; t'óó ajiyą́ągo áádóó doodlį́įłii jidlą́ągo bighangi hwiiłkááh nít'éé'.

⁵Áko dį́į́' yiską́ągo t'ah abíínídą́ą́' nídiijée'go dashdidoogááł biniyé hasht'e'ázhdílnééh nít'éé'. Áko ch'ikę́ę́h bizhé'é éí baadaaní áyidííniid, Átsé, bááh ła' niyą́ągo índa bikiin nidziilgo náádáał doo.

⁶Ákohgo t'áá ájíłah t'ááłáhígi dzizkéego ajííyą́ą́' áádóó doodlį́įłii joodlą́ą́'; jó, íídą́ą́' ch'ikę́ę́h bizhé'é éí diné áyidííniid, Nił hózhǫ́ǫgo t'áá kǫ́ǫ́ náániyólka' baa nánooshkąąh, áko nijéí bee nił nihoozhǫǫh doo.

⁷Áko diné nídii'na'go niheeghááh nít'éé'; t'áá ákwii nááhwiidoolkáałgo baadaaní jílíní yaa náhooskan. Áádóó t'áá ákwii nááhwiiską́.

⁸Áko ashdla' hwiiską́ągo t'ah abínídą́ą́' nízhdii'na'go dashdiighááh nít'éé'; ch'ikę́ę́h bizhé'é ání, Nik'i hata' dooígíí baa nánooshkąąh, áko t'áá ákǫ́ǫ́ dzizkéego hidideeshch'į'go t'áá ájíłah ajííyą́ą́'.

⁹Áko diné nízhdii'na' áádóó hwe'asdzą́ą́ jíł'íní índa há naal'a'í ałdó' bił dashdiikáahgo baadaaní jílíní ch'ikę́ę́h bizhé'é nilíinii áhodííniid, Jó, k'ad t'áá íídą́ą́' e'e'aah. Nánooshkąąh, t'áá akǫ́ǫ́ náániyółkááł. Jó, ayáhíjį' ináá'oot'ą́; t'áá kǫ́ǫ́ náániyółkááł, áko nijéí bił hózhǫ́ǫgo yiską́ągo t'ah abínídą́ą́' nídidoohjahgo hooghangóó nihéédoohkah.

¹⁰Nidi doo ákwii náánihiidoolkáał da nízingo diné nídii'na'go dah diiyá. Áko Jííbas kin haal'áajį' jiníyá; ákwii Jerúsalem hoolyé. Télii naaki bik'i dah aznilgo joolóós áádóó hwe'asdzą́ą́ jíł'íní ałdó' hoł yi'ash.

¹¹Jííbas kin haal'á bíighahgi jookahgo k'adę́ę e'e'aah, áko naal'a'í binanit'a'í áyidííniid, Tį', díí Jííbas dine'é bikin haal'áhíjį' diikahgo t'áá ákwii danihiidoołkááł.

¹²Áko honanit'a'í áhodííniid, Dooda, díí dé'éyóní bikin haal'áajį' doo diikah da, háálá doo Ízrel dine'é danilį́į da. Nidi t'óó bíighah ch'ídiikahgo Gíbiyah kin haal'áágóó diikah.

¹³Áko há naal'a'í ánáábizhdoo'niid, Haa'íshą' kin haal'áhí bit'áahjį' diikah. Gíbiyah kin haal'áagi, doodaii' Réímah kin haal'áagi danihiidoołkááł.

¹⁴Áko t'óó bíighah ch'íjíkai áádóó nihináájíkaigo i'íí'ą́ągo Bénjamin dine'é bikin haal'á Gíbiyahjį' jíkai.

¹⁵Áko dahwiidoołkááł biniyé Gíbiyah kin haal'áá góne' yah ajookai. Áko kintah da'nítiingóó dzineezdáago t'áá ákwii shiidoołkááł, dziniizį́į́', háálá diné ła' ba'ałk'ee dahwiidoołkáłígíí doo ła' náhodiiníił da.

¹⁶Nít'éé' shoo, i'íí'ą́ągo diné haastih léi' niilnishgo dá'ák'ehdę́ę́' náádááł; éí ałdó' Dził Íífreiyimdę́ę́' naagháago Gíbiyah kin haal'áagi t'óó átsééd níyáá lá, nidi Bénjamin dine'é éí íiyisí ákwii kéédahat'į́.

¹⁷Áko hastiin sání háághalgo kintahgi atiin bąąhgóó diné léi' sidáago yiyiiłtsą́ áádóó hastiin sání ání, Háágóoshą' díníyá? Háádę́ę'shą' yínááł?

¹⁸Áko ábizhdííniid, Júdah nahós'a' Béthlehem kin shijaa'dę́ę́' Dził Íífreiyimgóó yiikahgo ádeiit'į́; t'áá áádę́ę́' naashá. Júdah nahós'a' Béthlehemjį' niséyáago Bóhólníihii bikin bii' sohodizin si'ánígóó nááshdáałgo ásht'į́. Nít'éé' doo ła'da bighan góne' shá hooł'aahí da.

¹⁹Nihitélii deidoołchoshígíí índa deidoo'áłígíí nihee hólǫ́; bááh índa wáin ániidíii ałdó' nihee hólǫ́. Éí shí áádóó asdzání ná naal'a'í niidlíinii índa dinééh bił neiikaígíí ałdó' nił dadiidį́į́ł. T'áadoo bídin daniidlínígóó yiikah.

²⁰Áko hastiin sání ání, Nihich'į' hózhǫ́ǫ le'. Ha'át'íhída danohsingo éí bee nihaa áháshyą́ą doo, nidi kintah da'nítiingóó éí doo danihiidoołkáał da.

²¹Ákohgo bikin góne' bił yah ajookai áádóó télii yá nida'azhjaa', áko hakee' táádadzizgiz áádóó da'jííyą́ą́' índa doodlį́įłii dajoodlą́ą́'.

²²Kót'éego ił hózhǫ́ yaa naakai nít'éé'; jó, kintahdę́ę́' diné doo yá'ádaashóonii kin yinázt'i'go dáádílkał nídeiniłhałgo kin yee bóhólníihii hastiin sání ádeiłní, Diné nikin góne' yah ííyáhígíí béédahodiilzįįł biniyé bił ch'íní'aash.

²³Áko hastiin sání, kin yee bóhólníihii nilíinii, diné yich'į' ch'íníyáago áyidííniid, Dooda, shik' isóó danohłíinii, t'áadoo doo yá'áshónígi ádaaht'íní. Díí diné shighan góne' yah ííyáhígíí t'áadoo doo aa nínígi ádaoł'íní.

²⁴Shoo, kóoní shitsi' bizháán naagháhígíí índa diné be'asdzą́ą́ yíł'ínígíí k'ad nihich'į' ch'íhonish'éésh. T'áá nihí danohsinígi át'éego nábida'ayołnaad, nidi díí dinéhígíí bíká ádaaht'ínígíí t'áadoo doo aa nínígi ádaoł'íní.

²⁵Nidi diné danilíinii doo dahwíists'ą́ą' da. Ákohgo diné be'asdzą́ą́ yíł'íní yisxiłgo diné yich'į' ch'íhóníyil áádóó tł'éé' bíighah nídayi'iyiiłnaadgo hoos'įįd, áko hoos'įįdjį' t'óó yik'i deeskai.

²⁶Áko abínígo asdzání dah diiyáago diné bighangi habóhólníihii sidáago bich'é'étiinjį' tsé'yaa ajíígo'go t'áá ákǫ́ǫ́ hwee ha'íí'ą́.

²⁷Áko t'ah abínídą́ą́' habóhólníihii nídii'na'go kin si'ánígi dáádílkał ąą ádeile'go ákǫ́ǫ́ ch'íghááh nít'éé'; jó, hwe'asdzą́ą́ jíł'íní kin bich'é'étiingóó k'ídées'nii'go sitį́.

²⁸Nít'éé' ábizhdííniid, Nídiidááh, tį' yiikah. Nidi t'áadoo haadzíi' da. Ákohgo diné hach'į' dah diiyáago télii yik'i dah hastį́įgo bighangóó hoł dah néidiilóóz.

²⁹Áko hakin góne' yah anídzoodzá áádóó béésh nízhdii'ą́ągo hwe'asdzą́ą́ jíł'íní yę́ę naakits'áadahgóó ałts'ájiizhgizh. Áko Ízrel dine'é bił nahaz'ą́ą́góó t'áá át'é aheeshjaa'.

³⁰Áko éí dahoołtsánígíí t'áá át'é ádadííniid, Ts'ídá t'ah doo kóhánéeh da nít'éé', doodaii' Ííjip kéyahdę́ę́' Ízrel dine'é ch'íkaidóó díí jį́į́góó t'ah doo kót'éego deiiltséeh da nít'éé'. Baa nitsídaahkees áádóó baa nídaaht'į́ índa baa yádaałti'.