Read Navajo JUDGES 2 Bible Online

JUDGES 2 - Navajo bible

JUDGES 2

¹Áko Bóhólníihii bidiyingo naal'a'í Gílgal haz'ánídóó Bókim haz'áníjį' honíle'go ádííniid, Ííjip kéyahdę́ę́' hanihíí'eezhgo danihizhé'é yę́ę kéyah baa diní'ą́ągo bich'į' bee ádee haasdzíi'ii biih nihíí'eezh. Shą́ą́' ádíshní, Shibee aha'deet'áanii doo t'áá k'ad nihits'ą́ą́' k'íníti' da.

²Áádóó díí kéyahgi kéédahat'ínígíí t'áá ha'át'eegoda ts'ídá doo bił ahadadi'dooht'áał da; bibikáá' náá'iiniihí naa adahidooł kał. Nidi nihich'į' bee haasdzíi'ii t'áadoo bik'eh dahosooł'įįd da. Ha'át'íísh biniinaa kódaohdzaa?

³Éí bąągo ádííniid, Doo nihits'ádínéeshkał da, nidi nihooshk'iizh góne' nihaa anída'ajiłígi át'éego hóyée'go nihich'į' nidahwiiłnáa doo, áádóó bidiyin dabidi'níinii łoh nihá nánídlį́įgo bizahohkáah doo.

⁴Ákódzaago Bóhólníihii bidiyingo naal'a'í éí Ízrel dine'é yich'į' díí saad yee hahaasdzíí', áko diné chánahgo ida'niichago dáácha.

⁵Áko ákwii Bókim hoolyée doo, dadííniidgo Bóhólníihii yich'į' nááda'iisnii'.

⁶Áko Jáshowa éí diné yéé'níłnii'go, Ízrel dine'é t'áá ałtso kéyah ádíí' ádeidoolííłgóó dah nídahidiikai.

⁷Áko diné éí Bóhólníihii yá nidaal'a'go Jáshowa bíiníłką́, áádóó aląąjį' naazíinii Jáshowa bilááh ánízáágóó dahináá nít'éé'; Bóhólníihii éí ayóó ádaat'éii yaa naagháii t'áá ałtso deinééł'į́į́'; éí ayóó ádaat'éii Ízrel dine'é yá yaa naayá.

⁸Áko Nan biye' Jáshowa éí Bóhólníihii yá naal'a'í nilíinii daaztsą́; neeznádiindóó ba'aan neeznáá binááhai nít'éé'.

⁹Áko yóó'ádahoolaa; t'áá hó hakéyah biyi' Tímnath-síírah kin shijaa'gi Dził Íífreiyim nahós'a'gi áhoolyé; Géíyash dah yisk'idígíí náhookǫsjí haz'ą́.

¹⁰Áko éí da'ahílchíihii t'áá ałtso dahazhé'é yę́ę ahikááhgóó dadzizlį́į́', índa bikéé'dóó nááda'ahideeshchínígíí éí Bóhólníihii doo yéédahósin da nít'éé', doodaii' ayóó ádaat'éii Ízrel dine'é yá yaa naayáhígíí doo bił béédahózin da nít'éé'.

¹¹Áko Ízrel dine'é danilíinii éí Bóhólníihii binááł doo yá'át'éhígi ádajíít'įįd, áádóó diyin dabidi'níinii Béíyal daolyéii yich'į' nidahałáá nít'éé'.

¹²Áko dabizhé'é yę́ę biBóhólníihii Diyin God yóó'adeideez'ą́; éí Ííjip kéyahdę́ę́' ch'íbiní'eezh nít'éé', áádóó diyin dabidi'níinii yikéé' dah dahidiikai; diné hanaagóó kéédahat'ínígíí bidiyin dabidi'níinii ła' yich'į' nitséédadigohgo yee Bóhólníihii yá nídahałchįįh nít'éé'.

¹³Bóhólníihii yóó'adeideez'ą́ągo diyin dabidi'níinii Béíyal daolyéii áádóó Áshtarath yá nidahałáá nít'éé'.

¹⁴Ákohgo Bóhólníihii éí Ízrel dine'é yich'į' báhóóchįįdgo aghada'ii'níiłii hoł nidínóodah biniyé yaa hodiní'ą́. Hanaagóó hwe'ana'í kéédahat'ínígíí hwee ádídahólníihgo áhoolaa, áko hwe'ana'í danilíinii doo bídazhníłdzilgóó áhoolaa.

¹⁵T'áá dah hizhdikááhgóó Bóhólníihii hak'ijį' nilį́įgo doo yá'áshónígi áháł'į́; Bóhólníihii áhodííniidígi át'éego áádóó ákódooníiłgo hach'į' ádee hadoodzí'ígi át'éego atíháł'į́, áko ts'ídá ayóó át'éego bik'ee nitsijíkai.

¹⁶Ákót'ée nidi Bóhólníihii éí ándahodii'aahii ła' há niinínil; éí hwee da'ni'įįhii bits'ą́ąjį' yisdádahwiinííł nít'éé'.

¹⁷Áko bi'ándahodii'aahii ts'ídá doo dayíists'ą́ą' da, nidi ałjiłnii bił ahé'éldahígi át'éego diyin dabidi'níinii yikéé' naanánooyéełgo yich'į' nidahałáá nít'éé'; honít'i' t'óó yits'áhájeehgo dabizhé'é yik'ehgo deíkai yę́ę éí Bóhólníihii bibik'eh ó'oo'níiłii yik'eh dahół'į́įgo deidísin yę́ę doo yik'eh dahół'į́į́góó t'áadoo yik'eh ádaadzaa da.

¹⁸Áádóó Bóhólníihii éí ándahodii'aahii há néidiinilgo Bóhólníihii éí ándahodii'aahii nídaadleehii yił dahólǫ́ǫ́ nít'éé', áko hweda'ana'í bits'ą́ąjį' ánihodii'aahii yisdáhwiiníiłgo yiiníłką́; Bóhólníihii łahgo át'éego hąąh tsíńdeezkééz, háálá hweda'ana'í hade ádahósingo bik'ee chaał nidahojiyiinííh nít'éé' áádóó hóda'ats'ihgo bik'ee ti'dahojiyooznii'.

¹⁹Ákódzaago ánihodii'aahii abííłkáahgo t'ą́ą́' dah nídahidiikááh áádóó t'áá bí t'óó nida'ádiyiishchxǫ'go dabizhé'é yę́ę biláahgo diyin dabidi'níinii yikéé' dah dahidiikaigo yá nidaal'a' índa yich'į' yaa á nídaat'įįhgo yich'į' nidahałá; ádaats'įįł yę́ę áádóó doo ádabidi'nínígi ádaat'įįł yę́ę doo ni'hódeiléeh da.

²⁰Ákohgo Bóhólníihii éí Ízrel dine'é yich'į' báhóóchįįdgo ání, Díí dine'é éí shibee aha'deet'áanii k'ídeizti'; dahazhé'é yę́ę éí yik'eh dahół'į́į doo biniyé bich'į' bee haasdzíí' nít'éé', áko ádíshníinii doo dayíists'ą́ą' da.

²¹Ana'í danilíinii Jáshowa daaztsą́ągo yi'oh ni'níghą́ą́' yę́ę doo ła' há ch'íhidínéeshkał da.

²²Áko éí ana'í bee Ízrel dine'é ádajít'éegi hwééhózíní áhodeeshłíiłgo nahóníshtaah; Bóhólníihii bihonít'i'ii bik'eh ádajít'éego daats'í dajíkááh; t'áá dahazhé'é yę́ę ak'eh dahóół'įįdígi daats'í ádajit'į́, dooda daats'í.

²³Éí bąą Bóhólníihii éí da'ana'í ánéísįįd; t'áadoo t'áá łahjį' baa ch'íníjée' da índa t'áadoo Jáshowa yílák'ee hodíí'ą́ą da.