Read Navajo JUDGES 20 Bible Online

JUDGES 20 - Navajo bible

JUDGES 20

¹Ákohgo Dan kin haal'áádóó Bíyer-shííba kin shijaa'jį' Ízrel dine'é t'áá ałtso nidahaaskaigo Gíliyad kéyah nahós'a'dę́ę́' ałdó' t'áá yił niheeskaigo éí Mízpeh kin haal'áagi t'áá ła' bizhi'ee Bóhólníihii yaa áłah silį́į́'.

²Áko diné t'áá ałtso bits'ą́ą́dóó ayóogo bídahólníihii éí Ízrel dadine'é t'áá ałtso bits'ą́ą́dóó ádaat'į́įgo Diyin God bidine'é danilį́įgo t'áá bí t'ááłáhígi áłah nilį́į́ nít'éé'; diltłish yee nidaabaahii dį́įdi neeznádiindi mííl.

³(Nít'éé' Ízrel dine'é dajílíinii Mízpeh kin haal'áágóó adziiskaígíí Bénjamin dine'é haa dahodiizts'ą́ą́'.) Áko Ízrel dine'é ádaaní, Haash yit'éego díí doo yá'áshónígi áhóót'įįdígíí hazhó'ó bee nihił dahodoołnih.

⁴Áko Líívai dine'é be'asdzą́ą́ bąąh seesyíinii áhodííniid, Gíbiyah kin haal'áagi Bénjamin bikéyahgi níyáago ákwii she'asdzą́ą́ nish'íní bił shiiłkaah nít'éé'.

⁵Áko t'áá éí bitł'éé' Gíbiyah dine'é shaatįįh yikai áádóó kin binaadę́ę́' shinázt'i'go shida'niiłhį́į́ nít'éé'. Áko she'asdzą́ą́ nish'íní yę́ę nídayi'iyííłnáadgo daaztsą́.

⁶Áko she'asdzą́ą́ nish'íní yę́ę nídiiłtį́įgo nihoyéłgizhgo Ízrel dine'é kéyah yii' kéédahat'į́į́góó ałtso ádahaashjaa', háálá Ízrel dine'é bitahgi t'óó baa'ihígi ádahat'į́ índa doo hashkał baa na'asdee'.

⁷Jó, t'áá ánóht'é Ízrel dine'é danohłį́; kót'é dashidohníinii áádóó kót'é ha'níinii, ch'ídadooh'ááł.

⁸Áko diné t'áá ałtso t'áá ła' bizhi'ee nídiijée'go ádaaní, Nihí doo ła' níbaalgóó, doodaii' hooghangóó nídiidáał da.

⁹Nidi Gíbiyah dine'é k'ad kódahodiilníił ni: yáá'iilt'e' bik'ehgo bich'į' hidiikah.

¹⁰Áko Ízrel dine'é bitahgóó t'áá át'é diné neeznádiingo neeznájílt'éego bits'ádahodii'nił, áádóó t'ááł áhídi míilgo neeznádiingo bits'ádahodii'nił, índa neeznáadi mííl ázhnéelą́ą'go t'ááłáhídi mííl ázhnéelą́ą'go bits'ádahodii'niłgo bidookįįłii diné bá ákǫ́ǫ́ adajiijáahgo áká aníjíjah doo. Áko Bénjamin bikéyahgi Gíbiyah kin haal'áajį' joonéełgo Ízrel dine'é bitahgi doo hóshkał yaa naaskaii t'áá ałtso bik'ehgo k'éédazhdidoodlííł.

¹¹Ákohgo Ízrel dine'é t'áá ałtso kin haal'áhígíí yaatįįh nákah; t'ááłá'í ídlínígi át'éego t'áá ła' bizhi'ee ákódaat'į́.

¹²Áko Ízrel dine'é danilíinii éí Bénjamin dine'é bitahgóó diné ła' adayiis'a'go ádaaní, Díísh ha'át'íí doo yá'ádaashóonii nihitahgi baa nida'aldeeh?

¹³Éí bąą k'ad Gíbiyah kin haal'áagi diné doo yá'ádaashóonii nihaa dadinoh'aahgo t'óó nidadiiltsxił índa Ízrel dine'é bits'ą́ąjį' doo yá'ádaat'éehii kódadiilnííł. Nidi Bénjamin dine'é éí Ízrel dine'é bik'isóó danilį́į nidi doo dayíists'ą́ą' da.

¹⁴Áko Bénjamin dine'é danilíinii éí Gíbiyah kin haal'áajį' Ízrel dine'é yich'į' anaa' dahodoołeeł biniyé bikin hadaas'áádę́ę́' ch'ídahaazhjéé'.

¹⁵Áko íídą́ą́' Bénjamin dine'é bikin hadaas' áádóó naadiin hastą́ądi mííl ánéelą́ą'go diltłish yee nidaabaahii nii'nil, áádóó ałdó' Gíbiyah kin haal'áagi kéédahat'ínígíí tsosts'idi neeznádiin óóltą'go diné nideiznil.

¹⁶Diné t'áá át'é bitahdę́ę́' nishtł'ají yee da'ditł'į́hígíí tsosts'idi neeznádiingo t'áá łá'í nítínígo bee aditł'į́į́h bee tsiighá áníłtsááz bíighahgo nidi doo nideisį'ígíí nideiznil.

¹⁷Áko Bénjamin dine'é danilíinii t'áágéedgo Ízrel dine'é t'éiyágo dį́įdi neeznádiindi mííl ánéelą́ą'go diltłish yee nidaabaahii nii'nil; díí diné t'áá ałtso anada'a ł'íinii danilį́.

¹⁸Áko Ízrel dine'é dah diikaigo Béthel haz'ánígóó eekai, áádóó Diyin God nideídíłkidgo haash yit'éego dooleeł, deidííniid. Nihí háidíígíishą' átsé Bénjamin dine'é yich'į' anaa' ádahodoolííł? Nít'éé' Bóhólníihii áhodííniid, Júdah dine'é átsé.

¹⁹Ákohgo Ízrel dine'é t'ah abínídą́ą́' nídiijée'go, Gíbiyah dine'é yik'iidoojah biniyé niníná.

²⁰Áko Ízrel dine'é éí Bénjamin dine'é bich'į' anaa' biniyé dah náádii'ná áádóó Gíbiyah kin haal'áagi Ízrel dine'é hach'į' ałkéé' niná'ahi'niłgo hak'i néijah nít'éé'.

²¹Éí bijį́ Gíbiyah kin haal'áádóó Bénjamin dine'é ch'ínínáago Ízrel dine'é naadiin naakidi mííl nideistseed.

²²Nidi Ízrel dine'é danilíinii t'áá bí chánah áda'ahólzingo átsé hach'į' anaa' dahasłį́'ígi át'éego hat'ááh nájah nít'éé'.

²³Áko Ízrel dine'é ákóde anááhaaskaigo Bóhólníihii yinááł daachago i'íí'ą́. Áko haash yit'éego dooleeł Bóhólníihii deidííniid, Bénjamin dine'é nihik'isóó danilíiniísh bit'ááh náádiijahgo bich'į' anaa' ánáádahodiilnííł? Áko Bóhólníihii áhodííniid, Nílááh, bik'i náánáohjeeh.

²⁴Ákohgo naaki jį́ aleeh góne' Ízrel dine'é éí Bénjamin dine'é bit'ááh náájííjéé'.

²⁵Áko naaki jį́ aleeh góne' Gíbiyah kin haal'áádóó Bénjamin dine'é hach'į' anaa' dahasłį́į́', áko tseebííts'áadahdi mííl Ízrel dine'é diltłish yee nidaabaahii nináádeistseed.

²⁶Ákohgo Ízrel dine'é t'áá ałtso, siláo danilínígíí t'áá át'é, Béthel haz'ánígóó aheeskaigo áadi Bóhólníihii yinááł daachago áádóó shá bíighah t'áadoo da'ayání i'íí'ą́, índa didlidgo náádahaniihii áádóó hózhǫ́ǫ́jí náádahaniihii Bóhólníihii yich'į' náádayiisnii'.

²⁷Áko Ízrel dine'é danilíinii Bóhólníihii bíndabízhdééłkid, (áko éí yoołkááł yę́ędą́ą́' Diyin God bitsits'aa' dílzinii éí bee aha'deet'áanii bii' sinilii ákwii si'ą́

²⁸áádóó éí yoołkááł bítséédą́ą́' Éran biye' Eliyéízar nilíinii éí haye' Fíniyas naal'a' nít'éé',) Ízrel dine'é ádaaní, Nihik'isóó Bénjamin dine'é danilíinii bich'į' nááhidiikahgoósh bich'į' anaa' ánáádahodiilnííł, doodaii' daats'í t'óó bik'i diikááh? Áko Bóhólníihii ánááhodoo'niid, Nílááh, ákóde bich'į' nááhidohkááh, háálá yiską́ągo nihílák'ee hodideesh'ááł.

²⁹Ákohgo Ízrel dine'é éí Gíbiyah kin haal'áii binaagóó diné aa héeshjée'go ádayiilaa.

³⁰Áko tágí jį́ aleeh góne' Ízrel dine'é dah náádiikaigo Bénjamin dine'é yik'i náánéijéé' áádóó t'áá átsé ádaadzaa yę́ęgi át'éego Gíbiyah kin haal'áii yaa ninááhaakai.

³¹Áko Bénjamin dine'é ch'ínááná'náago hak'i náánéijéé' áádóó kin haal'áhígíí bits'ą́ąjigo yóó'adahoneez'aa'. Índa t'áá átsé nidahastseed yę́ęgi át'éego halgaigóó áádóó da'nítiingóó, ła' éí Béthel haz'ánígóó atiin áádóó ła' éí Gíbiyah kin haal'áágóó atiin ákǫ́ǫ́ dahoníłtseedgo Ízrel dine'é t'áá tádiiní nideistseed.

³²Áko Bénjamin dine'é ádadííniid, Átséédą́ą́' yę́ęgi át'éego yóó'adahineezhchą́ą́'. Nidi Ízrel dine'é ádaaní, Kin haal'áádóó da'nítiingóó yóó'adahodíníit'ah biniyé dadíníichééł.

³³Áko Ízrel dine'é t'áá ałtso aa héeshjéé' yę́ędóó nídiijée'go Béíyal-téímar haz'ánígi anaa' biniyé ałkéé' ninááda'ahí'nil áádóó Gíbiyah binaagóó ch'iltahdóó Ízrel dine'é aa héeshjée'ii ch'éheezhjéé'.

³⁴Áko neeznáadi míilgo Ízrel dine'é bits'ą́ą́dóó nídii'nilii t'áá ałtso Gíbiyah kin haal'áagi ak'i náánéijéé', índa t'áá íiyisí ałk'iijéé', nidi Bénjamin dine'é éí doo yá'át'éehii baa honíle'ígíí doo bił béédahózin da.

³⁵Áko Ízrel dine'é dabinááł Bóhólníihii éí Bénjamin dine'é yik'eh deesdlį́į́', áádóó éí bijį́ Ízrel dine'é danilíinii éí Bénjamin dine'é naadiin ashdladi mííldóó ba'aan t'ááłáhídi neeznádiingo nideistseed. Díí diné t'áá ałtso diltłish yee nidaabaahii danilį́į́ nít' éé'.

³⁶Áko Bénjamin dine'é éí hak'eh dahodeesdlį́į'go baa ákodazniizį́į́'. Ízrel dine'é éí Bénjamin dine'é yá dahooł'a'go Ízrel dine'é héeshjée'ii yada'ólíigo Gíbiyah kin haal'áagi ak'eh dadeesdlį́į́'.

³⁷Áko diné héeshjée'ii hatsin bee í'dílzoołí Gíbiyahgi kin haal'áhígíí yaatįįh híjéé', áádóó diné aa héeshjée'ii kin haal'áagi kéédahat'íinii ałtso diltłish yee dayííghą́ą́'.

³⁸Áko Ízrel dine'é áádóó nahdę́ę́' aa héeshjée'ii éí kin haal'áádóó ayóó ánéelą́ą'go łid hahagháahgo, ííshją́ą́ éí bee ééhózin doo, da'ahidoo'niid.

³⁹Áko Ízrel dine'é yóó'iijeehgo Bénjamin dine'é hak'iijée'go Ízrel dine'é tádiin yilt'éego nideistseed, áko ádaaní, T'áá aaníí átséédą́ą́' anaa' hazlį́'ígi át'éego nihinááł bik'eh dahodidleeh.

⁴⁰Nidi kin haal'áhídóó łid hahagháahgo hakéé'dę́ę́' Bénjamin dine'é t'ą́ą́' nídadéét'į́į́' nít'éé'; shoo, kin haal'áhídóó yót'ááhgóó łid hahagháahgo dayiiłtsą́.

⁴¹Ákohgo Ízrel dine'é nát'ą́ą́' hak'i néijée'go Bénjamin dine'é t'áá íiyisí t'óó bił dahóóyée'go nídaasdzííd, háálá doo yá'át'éehii bik'i hoole'go yaa ákodaniizį́į́'.

⁴²Éí bąą Ízrel dine'é dabinááł t'ą́ą́' dah nídiijée'go honoojíijigo dah diijéé', nidi anaa' dahółóonii t'áá hoł naneesdaa', áádóó kin hadaas'áádóó hach'į' nídiijée'go biníi'gi ałtso ádahasdįįd.

⁴³Bénjamin dine'é yinázt'i'go áádóó t'áadoo ádahodiilzéhí deinéełkaadgo Gíbiyah kin haal'á binaashii ha'a'aahjigo ałtso nidahastsxeed.

⁴⁴Bénjamin dine'é tseebííts'áadahdi míilgo nabízdįįd; éí t'áá ałtso diné doo nídanilyéesii danilį́į́ nít'éé'.

⁴⁵Áádóó daadziihígíí naanídahaazhjée'go honoojíígóó Ríman tsé si'ánígóó hasih haz'ą́ą́góó aheezhjéé'. Áko ashdladi mííl ánéelą́ą'go atiingóó dajííghą́ą́' índa Gídam bich'į' t'áá haz'ą́ądi bídadzizbaa'go nibíjiizhjée'ii naakidi mííl ánéelą́ą'go dajííghą́ą́'.

⁴⁶Ákohgo éí bijį́ Bénjamin dine'é naadiin ashdladi míilgo diltłish yee nidaabaahii ałtso nabízdįįd; éí t'áá ałtso diné doo nídanilyéesii danilį́į́ nít'éé'.

⁴⁷Nidi hastą́ądi neeznádiin ánéelą́ą'go éí t'áá honoojíígóó Ríman tsé si'ání bighą́ą'jį' hasih nahaz'ą́ąjį' yóó'aheezhjée'go áadi dį́į́' bee nídadeezid lá.

⁴⁸Áko Ízrel dine'é éí Bénjamin dine'é baatįįh náájookaigo diltłish bee nabínáádadzisdįįd; diné danilíinii áádóó naaldlooshiida índa t'áá át'é t'áá shódadzoost'e'ígi nabídadzisdįįd. Áko kin hadaas'áágóó t'áá bik'ídajiikáhígíí adahizdeesk'ą́ą́'.