Read Navajo JUDGES 21 Bible Online

JUDGES 21 - Navajo bible

JUDGES 21

¹Mízpeh kin haal'áagi Ízrel dine'é ádee hadahideesdzíi'go ádaaní, T'áá háiida nihitsi' dahólǫ́ǫgo Bénjamin dine'é doo ła' baa diiltéeł da.

²Áko Ízrel dine'é Béthel haz'ánígi nidahaaskaigo ákwii Diyin God binááł nidzíiztą́ągo hwee ada'az'ą́, áko baa saad haghą́ągo t'áá íiyisí dajíícha,

³áádóó ádazhdííniid, Ízrel dine'é biBóhólníihii Diyin God nílíinii, ha'át'éegoshą' díí jį́ Ízrel dine'é bits'ą́ą́dóó dine'íígíí ła' bidíníídee'?

⁴Áko biiskání t'ah abíínígo diné nídiijée'go bikáá' náá'iiniihí hadeiiztł'ingo didlidgo náádahaniihii índa hózhǫ́ǫ́jí náádahaniihii náádadziisnii'.

⁵Áko Ízrel dine'é ádaaní, Ízrel dine'é bitahgóó ła' háidíígíishą' Bóhólníihii binááł áłah ílį́įgi doo nidziiskai da? Háálá Bóhólníihii ts'ídá hódéét'i'go yadazhdiilnii'go bee ádee hadahizhdeesdzíí' yę́ę Bóhólníihii binááł Mízpeh kin haal'áagi áłah ílį́įgi t'áadoo ła' jiníyáágóó, T'óó hodi'yoolyééł, shą́ą́' ho'doo'niid ni'.

⁶Áko Ízrel dine'é éí bik'is Bénjamin dine'é yaa a'áhí danízingo ádaaní, Díí jį́ Ízrel dine'é bits'ąą t'ááłá'í dine'é ábi'disdįįd.

⁷Hait'éegoshą' Bénjamin dine'é daadzí'ígíí bida'asdzą́ą́ dadooleełígíí bá shódeidiilt'eeł? Jó, Bóhólníihii binahjį' bee ádee hadadeedzíi'go ádadii'ní, Danihitsi'ké hoda'asdzą́ą dooleeł biniyé doo haa dahidii'nił da.

⁸Áko ádaaní, Ízrel dine'é bits'ą́ą́dóó háidíígíishą' Mízpeh kin haal'áagi Bóhólníihii binááł áłah ílį́įjį' t'áadoo dazdeeskai da? Nít'éé', shoo, Jéíbesh-gíliyad kin haal'áádóó dine'é dah oonéłíjį' t'áadoo dazdeeskai da lá.

⁹Háálá diné dajííłta' nít'éé'; shoo, Jéíbesh-gíliyadgi kéédahat'íinii t'ááłá'í nidi t'áadoo ła' níyáhí da lá.

¹⁰Ákohgo Ízrel dine'é áłah nádleehii éí bidine'é doo nídanilyéesii naakits'áadahdi míilgo ákǫ́ǫ́ yida'iisnii'go yich'į' yee hadaasdzíi'go ádeidííniid, Nihílááh, Jéíbesh-gíliyadgi kéédahat'íinii, asdzání índa ba'áłchíní t'áá daabił diltłish bee nidaałtseed.

¹¹Diné t'ááłá'í nítínígo índa asdzání bił naazhtéezhii t'ááłá'í nítínígo ałtso nidadoołtsił.

¹²Áko Jéíbesh-gíliyadgi kéédahat'ínígíí ch'ikéí bízháán nidaakaígíí diné doo yił ahéédahólzinii dį́įdi neeznádiingo yik'ídaaskaigo Sháílohgi dah da'ínéhígóó Kéínan kéyahjį' nídeizh'eezh.

¹³Ákohgo áłah nilínígíí t'áá át'é éí Ríman tsé si'áníjį' hasih haz'ą́ąjį' Bénjamin dine'é yich'į' hane' yił ada'iis'aadgo ádaaní, Nihich'į' dahózhǫ́ǫgo naałdeeh le'.

¹⁴Áko íídą́ą́' Bénjamin dine'é nináhaaskaigo Jéíbesh-gíliyadóó ch'ikéí ninádajiizh'eezhígíí baa dadziiznil, nidi doo ałtso bininíłna' da.

¹⁵Áko Bénjamin dine'é baa a'áhí dazniizį́į́', háálá éí Ízrel dine'é bits'ąą nahjį' Bóhólníihii kóbiilaa.

¹⁶Ákohgo áłah ílínídóó hastóí aląąjį' naazíinii ádadííniid, Hait'éegoshą' Bénjamin dine'é t'ahdii asdzání bee ádaadinígíí be'asdzą́ą́ dahólǫ́ǫgo ádadiilnííł? Shoo, Bénjamin dine'é bits'ąą asdzání ałtso ádaasdįįd.

¹⁷Áko ádadííniid, Bénjamin dine'é bíí' dooleełii ts'ídá bá át'ée doo, áko Ízrel dine'é bitahdóó doo ałtso ádoodįįł da.

¹⁸Azhą́ ákót'ée nidi danihitsi'ké bida'asdzą́ą dooleeł biniyé doo baa dahidii'nił da, háálá íídą́ą́' Ízrel dine'é ádee hadadeesdzíi'go ádaaní, Bénjamin dine'é be'asdzą́ą dooleełii baazhníłtį́įgo éí hóyée'go há ha'doodzih.

¹⁹Áko ánáádadi'ní, Bóhólníihii baa áłah ná'ádleeh t'áá nináháhááh bik'eh néit'aahígíí éí Sháíloh haz'ánígi éí Béthel kin shijaa' náhookǫsjígo, Bétheldóó Shííkem kin haal'áajį' atiinígíí ha'a'aahjígo índa Lebónah kin shijaa' shádi'ááhjígo t'éí bá náhoot'aah.

²⁰Éí bąą Bénjamin dine'é yich'į' yee hadaasdzíi'go ádaaní, Nílááh, ch'il na'atł'o'ii k'éédílyééhgóó dohkáahgo áadi aa híshóojée' doo,

²¹áko shoo, Sháíloh haz'ánídóó ch'ikéí da'doolzhish biniyé azhishjį' daats'í ch'ídahidookahígíí baa nihidoohkah, ákohgo ch'il na'atł'o'ii k'éédílyééhdóó nídidoohjahgo t'ááłá'í nootínígo Sháílohdóó ch'ikéí nihe'asdzą́ą dooleełígíí biniyé bił dadidoohdiłgo Bénjamin dine'é bikéyahgóó bił nihééhidoohkah.

²²Áko dabizhé'é, doodaii' dabik'isóó danilíinii nihaa heeskaigo nihich'į' saad dahasłį́į'go ádabididii'niił, Baa dajiidoohbaałgo ch'ikéí nihá baa dahidoohnił, háálá anaa' yę́ędą́ą́' diné t'ááłá'í nítínígo t'áadoo asdzání bá áádasiilzįįd da; jó, nihí doo baa dahoyohnííłgóó bee ádił da'soohsiihgo ádidahodoołt'i' doo nít'éé'.

²³Áko Bénjamin dine'é t'áá ákódaadzaa; ádanéelt'e'ígíí bik'ehgo be'asdzą́ą́ dooleełii nídayiizláá'; ch'ikéí t'áá da'alzhishdóó nídayiizláa'go kéyah yii' kéédahat'į́į́ nít'éé' yę́ęgóó yił anídahaaskaigo ákwii bikin hadaas'áá nít'éé' yę́ęgi áńdayiidlaago ákwii kéénáádahat' į́.

²⁴Áko íídą́ą́' Ízrel dine'é áádę́ę́' dah nídahidiikaigo t'ááłá'í nítínígo dabidine'é áádóó dabik'éí índa bikédaayah yii' kéédahat'į́ yę́ęgóó łah hodit'éhee anídahaaskai.

²⁵Éí yoołkááł yę́ędą́ą́' Ízrel dine'é bitahgi aláahgo naat'áanii doo hólǫ́ǫ da nít'éé', nidi diné t'ááłá'í jinítínígo díí t'áá ákóne' ásht'į́ daznízingo ádajoonííł.