Read Navajo JUDGES 3 Bible Online

JUDGES 3 - Navajo bible

JUDGES 3

¹Bóhólníihii díí ał'ąą ana'í yidziihgo áyiilaa; éí bee Ízrel dine'é hwééhózíní áhodoolíiłgo nahwíintaah; Kéínan kéyahgi Ízrel dine'é ła' anaa' baa nida'asdee'ígíí doo bił béédahózin da.

²Ts'ídá díidíígíí t'éiyá biniyé ákót'éego Ízrel dine'é náás ahoolchíiłii bił ééhodoozįįłgo ákóyiilaa; éí anaa' bich'į' na'abaah doo bił béédahózin dago anaa' bíńdabidi'niltin doo.

³Díí lą́ą: Filístiya dine'é éí binanit'a'í ashdlalt'éego yił bikin hadaas'á áádóó Kéínan dine'é t'áá ałtso kéyahgi kéédahat'į́į́ nít'éé' áádóó Sáídan dine'é índa Háíva dine'é Dził Lébanangóó éí Dził Béíyal-hérman si'ánídóó Héímath kin haal'áii yah ahóót'i'jį' kéédahat'į́į́ nít'éé'.

⁴Áko t'áá bí bee Ízrel dine'é nayídeintaahgo bik'eh ó'oo'níiłii dayíists'ą́ą'go daats'í bił béédahodoozįįł; éí dabizhé'é yę́ę yich'į' Mózes yiniit'aa yee haadzíí' nít'éé'.

⁵Ákohgo Ízrel dine'é éí Kéínan dine'é áádóó Het dine'é áádóó Ámor dine'é áádóó Píírez dine'é áádóó Háíva dine'é índa Jííbas dine'é yitahgóó kéédahat'į́į́ nít'éé'.

⁶Áko Ízrel dine'é éí ana'í dabitsi'ké bida'asdzą́ą doo biniyé t'áá bí ádá nídayiisdláá', áádóó dahatsi'ké éí dabiye'ké bił ahaa dayii'nííł nít'éé', índa bidiyin dabidi'níinii bich'į' nidahojiłáá nít'éé'.

⁷Ízrel dine'é éí Bóhólníihii binááł doo yá'áshónígi ádajíít'įįd áádóó Bóhólníihii haDiyin God baa dajiyooznah, áko Béíyal índa Ashíírah eda'alyaii bich'į' nidahojiłáá nít'éé'.

⁸Éí bąą Bóhólníihii éí Ízrel dine'é yich'į' báhóóchįįdgo, Mesopotéímiya kéyahdóó aláahgo naat'áanii Kúshan-rishathéíyim wolyéii hasnáago Ízrel dine'é éí Kúshan-rishathéíyim yinaalte' danilį́įgo tseebíí nááhai.

⁹Áádóó Ízrel dine'é éí Bóhólníihii nídayookąąhgo Bóhólníihii éí Ízrel dine'é yisdáyiiníił dooígíí niiníłtį́įgo Ízrel dine'é yisdáyíínil; éí Kéíleb bitsilí Kíínez biye' Áthniyel wolyé.

¹⁰Éí Bóhólníihii biNíłch'i Diyinii hak'i hoole'go Ízrel dine'é yá nihodiyii'aah nít'éé' áádóó anaa' baa na'aldeehgóó dah diiyá; Bóhólníihii éí Mesopotéímiya kéyahdóó aláahgo naat'áanii Kúshan-rishathéíyim wolyéii hálák'eidíí'ą́; Kúshan-rishathéíyim bik'ijį' jílį́įgo bik'esdeesdlį́į́'.

¹¹Áádóó éí kéyahgi hasht'ehodít'éego dízdiin nááhai. Ákohgo Kíínez biye' Áthniyel daaztsą́.

¹²Nít'éé' Ízrel dine'é éí Bóhólníihii binááł doo yá'áshónígi ánáádáát'įįd. Áko Mó'ab kéyahdóó aláahgo naat'áanii Églan wolyéii Bóhólníihii bidziil ábiilaago Ízrel dine'é atíyiilaa, háálá Bóhólníihii binááł doo yá'áshónígi ádajíít'įįd.

¹³Églan éí Áman dine'é índa Ámalek dine'é áłah áyiilaago Ízrel dine' é yaa heekaigo yik'eh dadeesdlį́į́', áko kin haal'áii tsin páam yíl'áii hoolyéii bíí' daazlį́į́'.

¹⁴Áko Ízrel dine'é éí Mó'ab kéyahdóó aláahgo naat'áanii Églan wolyéii yá nidaal'a'go tseebííts'áadah nááhai.

¹⁵Nidi Ízrel dine'é éí Bóhólníihii nídayookąąhgo Bóhólníihii éí yisdáhwiiníił dooígíí niiníłtį́; Ííhad éí Gííra biye' Bénjamin dine'é nilíinii éí diné nitł'aii nilį́. Mó'ab kéyahdóó aláahgo naat'áanii Églan wolyéii baa doolyéełii yił hach'į' Ízrel dine'é ida'as'a'.

¹⁶Áko Ííhad t'áá bí diltłish ałts'ą́ąjį' deenínígíí t'ááłá'ídóó ałníí' ké silá áníłnéezgo áyiilaa, índa bik'ai' nish'náájí bi'éé' biyaadi yił ákászaazgo áyiilaa.

¹⁷Áko Mó'ab kéyahdóó aláahgo naat'áanii Églan wolyéii baa doolyéełii bich'į' jiníjaa'. Églan éí t'áá íiyisí diné neesk'ahii jílį́.

¹⁸Áádóó aa doolyéełii bich'į' nizh'nínilgo, ada'azláii dah nídazhdiił'a'.

¹⁹Nidi Gílgal haz'ání bíighahgi tsé eda'alyaii bik'i nida'ashk'aazhii sinilíjį' yił niikaigo Églan yich'į' t'ą́ą́' nádzáago ííłní, Aláahgo naat'áanii nílíinii, t'áá ádííghahígo hane' ła' bee nił hodeeshnih. Áádóó naat'áanii ání, Haa'íshą' diiłhééł. Áko bíighahgóó naazínígíí ałtso ch'ékai.

²⁰Áádóó Ííhad hach'į' niníyá; t'áá sáhí chaha'oh biyaagi dzizdáago áhodííniid, Diyin God bits'ą́ą́dę́ę́' hane' ła' bee nił hodeeshnih. Áko dzizdáhídóó nízhdii'na'go

²¹Ííhad bik'ai' nish'náájí diltłish bąąh ní'áhígíí nishtł'ají yee yił háádéelgo habid góne' yaa ayííłgeed.

²²Diltłish bitsiin t'áá bił baa eelwodgo bik'ah bee diltłish t'áá át'é doo yit'į́į́góó áyiilaa, áko bibid biyi'dę́ę́' diltłish doo háájótą́ą́' át'ée da silį́į́' índa bibid biyi'dę́ę́' chąą' háágo'.

²³Ákohgo Ííhad éí dah náhást'ání góne' ajoolwodgo chaha'ohgi dáń'da'ditį́hígi dáda'deeskaalgo ájiilaa.

²⁴Índa Ííhad ch'élwodgo Églan bá nidaal'a'í níjée'go chaha'ohgi dáádílkał dáda'deeskaalgo dayiiłtsą́, nít'éé' ádaaní, Nii'ohdi sidá sha'shin.

²⁵Áko haba' nidaakaigo dadooshch'iizh, nidi chaha'ohgi dáádadilkał t'áadoo ąą ájíléhí t'óó bee ąą ńdítį́hí nídeidiinilgo ąą ádayiilaa; nít'éé' binanit'a'í daaztsą́ągo ni'góó sitį́įgo dayiiłtsą́.

²⁶T'ah nida'áhodilziidgo Ííhad ch'élwodgo tsé bik'i nida'ashk'aazhii eda'alyaii sinilígíí bine' góne' ch'íneet'į́į́', áádóó Siyáírath haz'áníjį' yisdáálwod.

²⁷Áko nídzídzáago Dził Íífreiyimdi deenásts'aa' bidee' bee í'dílzoołí bee ázhdííniidgo Ízrel dine'é dziłghą́ą́'dę́ę́' hoł adah deíjeehgo bilą́ąjį' joolwołgo

²⁸ábizhdííniid, Shikéé' deínóhjeeh; jó, Bóhólníihii éí Mó'ab dine'é nihi'ana'í danilíinii nihílák'eidíí'ą́. Ákohgo bikéé' joonéełgo Mó'ab kéyah bich'į'go Jórdan tooh tsé'naa nideetiinígi ana'í baa nijiyeekaigo t'áadoo ła' ch' ééyáhí da.

²⁹Íídą́ą́' Mó'ab dine'é neeznáadi mííl nideistseed; éí t'áá ałtso ayóó ádabóodziilii índa ayóó ádaaltahii danilį́į nidi t'áadoo ła' yisdááyáhí da.

³⁰Ákohgo éí bijį́ Mó'ab dine'é dajílíinii Ízrel dine'é biyaa azhníídee'. Áko éí kéyahgi hasht'ehodít'éego tseebídiin nááhai.

³¹Áádóó hak'ijį' Éínath biye' Shámgar éí béégashii binahaalyéii bee Filístiya dine'é hastą́ądi neeznádiin neistseed, índa Ízrel dine'é yisdáyíínil.