Read Navajo JUDGES 4 Bible Online

JUDGES 4 - Navajo bible

JUDGES 4

¹Áko Ííhad daaztsą́ą́dóó bik'ijį' Ízrel dine'é éí Bóhólníihii binááł doo yá'áshónígi ánáádáát'įįd.

²Bóhólníihii éí Kéínan kéyahdóó aláahgo naat'áanii Jéíbin wolyéii yílák'ee hodíí'ą́; éí Héízor kin haal'áadi nant'á; Sísera éí Heirósheth-hagóyiim kin shijaa'di kééhajit'íinii éí hasiláo yinanit'a'í nilį́.

³Áko Ízrel dine'é éí Bóhólníihii bíká adoolwoł biniyé nídayookąąh, háálá Sísera éí tsindaabąąs bijáád naakiígíí béésh nitł'izii bee ádaalyaii náhást'éidi neeznádiin yis'nil áádóó Ízrel dine'é doo hasht'é'égóó yide áhósingo naadiin nááhai.

⁴Lápidath be'asdzą́ą́ Déborah éí Diyin God bá hojilne'í jílį́. Éí íídą́ą́' Ízrel dine'é bá nihozhdii'aah nít'éé'.

⁵Dził Íífreiyimgi Réímah kin haal'áii áádóó Béthel kin haal'áii bita'gi Déborah hatsin páam sikaadgo biyaagi kééhojit'į́įgo Ízrel dine'é haa nídaakahgo bá nihozhdiyii'aah nít'éé'.

⁶Áko Abínowam biye' Bérak éí Kéídesh-náftalai kin haal'áagi kééhat'íinii bíká ajííł'a'go ábizhdííniid, Ízrel dine'é biBóhólníihii Diyin God díí yee ná haadzíí': Nílááh, Náftalai dine'é índa Zébyulan dine'é bisiláo neeznáadi míilgo nił yinéeł doo.

⁷Áko Jéíbin bisiláo binanit'a'í Sísera nizahodínéesh'ahgo bitsindaabąąs bijáád naakiígíí yee deínéehii índa t'óó ahayóigo bił deínéehii éí Kíshan tooh nílínígi nidááh doonéełgo nílák'ee hodideesh'ááł.

⁸Nít'éé' Bérak áhodííniid, Shił díní'áazhgo t'éiyá deeshááł, nidi doo shił díní'áázhgóó éí doo deesháał da.

⁹Áko asdzání áhodííniid, T'áá aaníí nił deesh'ash, nidi doo yéí ayóó ánít'éego yínáał da dooleeł, háálá Sísera éí asdzání bílák'eejį' Bóhólníihii nahodiyoołnih. Ákohgo Déborah nídii'na'go Kéídesh kin haal'áágóó Bérak yił dah dii'áázh.

¹⁰Áko Bérak éí Zébyulan dine'é índa Náftalai dine'é danilíinii Kéídesh kin haal'áágóó dooleeł bizhdííniid, áko diné neeznáadi mííl yilt'éego hoł dah diiná índa Déborah ałdó' hoł ní'áázh.

¹¹Áko Hííber éí Kííni dine'é jílíinii Kííni dine'é bits'ázhníyá; éí Mózes yaadaaní nilíní Hóbab bik'éí ła' jílį́; chéch'il t'áá bits'áhwiiní'ą́ądi Zéíyanéíyim nahós'a'gi haníbaal nizhní'ą́, éí Kéídesh kin haal'áii t'áá bíighahgóó áhoolyé.

¹²Abínowam biye' Bérak éí Dził Téíbor si'ánígóó ííyá, ha'níigo Sísera hoł hóóne'.

¹³Áko Sísera éí bitsindaabąąs bijáád naakiígíí t'áá át'é áłah áyiilaa, éí tsindaabąąs bijáád naakiígíí béésh nitł'izii bee ádaalyaii náhást'éidi neeznádiingo áádóó Heirósheth-hagóyiim kin shijaa'dóó Kíshan tooh nílíníjį' diné bił naakaígíí t'áá ałtso áłah áyiilaa.

¹⁴Áko Déborah éí Bérak áyidííniid, Sołtį', háálá díí jį́ Bóhólníihii éí Sísera nílák'ee hodíí'ą́. Ts'ídá t'áá aaníí Bóhólníihii nilą́ąjį' hooleeł doo. Ákohgo Bérak éí Dził Téíbor bighą́ą́'dę́ę́' diné neeznáadi míilgo hoł hadááná.

¹⁵Áko Bóhólníihii éí Sísera bił ałk'eh hólǫ́ǫgo áyiilaa; bitsindaabąąs bijáád naakiígíí índa bisiláo t'áá át'é t'óó bił dahóóląądgo Bérak éí diltłish ałtso yee áhásdįįd, áko Sísera bitsinaabąąs bijáád naakiígíí yikáá'dę́ę́' hadah yaaltáalgo yóó'eelwod lá.

¹⁶Áko Bérak éí tsindaabąąs bijáád naakiígíí índa siláo Heirósheth-hagóyiim kin shijaa'jį' yikéé' nídiilwodgo Sísera bisiláo ałtso diltłish yee nideistseed; t'ááłá'í nidi t'áadoo ła' yidzíi' da.

¹⁷Nidi Sísera éí Kííni dine'é Hííber wolyéii be'asdzą́ą́ Jéíyel biníbaalígóó yóó'ajoolwod, háálá Héízor kin haal'áádóó aláahgo naat'áanii Jéíbin índa Kííni diné nilíinii Hííber bighandóóígíí éí yił k'é da'ahó'ní.

¹⁸Áko Jéíyel éí Sísera yidááh níyáago áyidííniid, Yah aninááh, shinanit'a'í, shił yah aninááh; t'áadoo nił yé'í. Ákohgo biníbaal góne' yah ajííyáago beeldléí hak'íísti'.

¹⁹Áko asdzání ábizhdííniid, Baa nánooshkąąh, tó doodlį́łígíí áłch'į́į́dígo ł a' shaa níkaah, háálá dibáá' sélį́į́'. Ákohgo abe' bee naat'áhí ąą ájiilaago doodlį́įłii baazhníką́ągo bik'ínídzísti'.

²⁰Áko ánáábizhdoo'niid, Níbaal bich'é'étiingi sínízį́įgo t'áá háiida naa níyáago nanídíłkidgo, Ła'daásh kwe'é naaghá, nidííniidgo, Nidaga', bididííniił.

²¹Nidi Jéíyel éí Hííber be'asdzą́ą́ nilíinii níbaal bá anídaalkałí ła' néidiitą́ áádóó bee atsidí néidii'ą́, áko hazhó'ógo haa níyáago éí t'áá íiyisí ch'ééshdeeyáago ajiłhosh, índa níbaal bá anídaalkałí hajaat'ah góne' yaa ayííłkaalgo ni'jį' yił i'ííłkaal, áko dadziztsą́.

²²Áádóó shoo, Bérak éí Sísera yíkantáago Jéíyel hadááh yílwodgo áháłní, Hágo, diné hanítáii bich'į' nił dish'aash. Ákohgo biníbaal góne' yah ajííyáago, jó, Sísera daaztsą́ą́ lá índa níbaal bá anídaalkałí bijaat'ah góne' bił eelkaal lá.

²³Ákohgo íídą́ą́' Diyin God éí Ízrel dine'é dabinááł Kéínan kéyahdóó aláahgo naat'áanii Jéíbin wolyéii yik'eh dadeesdlį́į́'.

²⁴Ízrel dine'é náás deeskai, áádóó éí Kéínan kéyahdóó aláahgo naat'áanii Jéíbin dayiisxį́įjį' t'áá bizááká ádaat'į́į́ nít'éé'.