Read Navajo JUDGES 5 Bible Online

JUDGES 5 - Navajo bible

JUDGES 5

¹Éí íídą́ą́' Déborah áádóó Abínowam biye' Bérak díí sin yee hóótáalgo ání,

²Bóhólníihii baa dahohniih, háálá Ízrel dine'é yisdáyíínil, índa diné t'áá bí ádeinízingo náá'áda'diisnii'.

³Shoo, aláahgo naat'áanii danohłíinii, aląąjį' nisoozíinii, hazhó'ó da'íísínółts'ą́ą́': shí éí Bóhólníihii bich'į' hashtaał; shí Ízrel dine'é biBóhólníihii Diyin God baa hashniihgo hashtaał.

⁴Bóhólníihii nílíinii, Síyerdę́ę́' ch'ííníyá yę́ędą́ą́', Íídam kéyahdóó ch'ííníyá yę́ędą́ą́' nahasdzáán ditsxiz, índa yádiłhiłdę́ę́' nahóółtą́; k'os ałdó' bits'ą́ą́dóó nahóółtą́.

⁵Bóhólníihii binááł dził nidaha'ná, t'áá éí Dził Sáínai si'ánígíí Ízrel dine'é biBóhólníihii Diyin God binááł nidi naha'ná.

⁶Shámgar éí Éínath biye' hináádą́ą́' áádóó Jéíyel hóyoołkááłdą́ą́' da'nítiingóó doo nida'aldeeh da, índa nidaaldeehii ats'á'iiztiinjí t'éí nídadikah.

⁷Kin dah naazhjaa'góó doo nidaagháhí da, Ízrel kéyahgi doo nidaagháhí da; wónáásee Déborah yinishyéii á yiizį'go Ízrel dine'é bitahdóó amá sélį́į́'.

⁸Diyin dabidi'níinii łahgo át'éii nideideez'ą́, áko dáń'dítį́hígi anaa' hazlį́į́'. Naagé, doodaii' tsiidétáán doo Ízrel dine'é dízdiindi mííl ánéelą́ą'go bitahgi hadeel'į́į' da.

⁹Ízrel dine'é bindanit'a'í t'áá bí ádeinízingo diné bitahgóó náá'áda'diisnii'ígíí baa shił hózhǫ́. Bóhólníihii baa dahohniih.

¹⁰Téliiłgaii nihił nidaaldlooshii, nihí ak'i dahi'niłí da'ílíinii bik'i dah nahísóotáanii, índa atiingóó nidaałdeehii díí baa dahołne'.

¹¹Tó háálį́įdi dibé ats'á'níiłgo bee í'dílzoołí diits'a'ígi át'éego nidaanéego áádóó dahataałgo Bóhólníihii t'áá ákogi ááníiłii yaa náádahoolne'. Ízrel dine'é kin dah naazhjaa'góó kéédahat'ínígíí t'áá ákogi ááníiłii yaa náádahoolne'. Ákohgo Bóhólníihii bidine'é dáń'da'ditį́híjį' niníná.

¹²Ch'éénídzííd, Déborah, ch'éénídzííd! Ch'éénídzííd, sin ła' bee hótaał, ch'éénídzííd! Nídiidááh, Abínowam biye' Bérak yinílyéii, dasíníłná danilíinii dah dii'éésh.

¹³Áko daadzíi'ii bi'oh da'oogą́'ígíí éí aghádahideezį́į́ nít'é'ígíí binaat'áanii áhoolaa; Bóhólníihii éí ayóó ádajít'éii honanit'a'í áshiilaa.

¹⁴Íífreiyim dine'é bitahdóó ehétł'óól danilíinii Ámalek yik'ijį' danilį́; Bénjamin dine'é, danihik'éí bił danihikéé' ádaat'į́; Méíker bits'ą́ą́dóó naat'áanii yichíiłii áádóó Zébyulan dine'é bitahdóó naaltsoos ádeiił'íní ałdó' neheeskai.

¹⁵Ísakar dine'é bindanit'a'í éí Déborah yił yíkai, t'áá éí Ísakar dine'é Bérak ałdó' yił yíkai, honíts'aa' góyaa Bérak bikéé' hadajííjéé'. Rúben dine'é ał'ąą dah deíkáhígíí ádadooníiłgi t'áá íiyisí haleebee hazhó'ó nayik'ítsídaaskééz.

¹⁶Ha'át'íísh biniyé dibé bá í'dílzooł dadidoohts'į́įłgo dibé dabighandi t'óó nidaahkai nít'éé'? Rúben dine'é ał'ąą dah deíkáhígíí ádadooníiłgi t'áá íiyisí haleebee hazhó'ó nayik'ítsídaaskééz.

¹⁷Gíliyad dine'é éí Jórdan tooh wónaanídi t'óó nidaakai, áádóó ha'át'íísh biniinaa Dan dine'é t'áá tsinaa'eeł t'óó yii' hólǫ́? Ásher dine'é éí tábąąhgi táłts'á da'ii'eełígi t'ahdii t'óó nidaakai.

¹⁸Dahoníteelgóó ninádahałaah doo biniyé wódah nahaz'ą́ągo ádaalyaaígi Zébyulan dine'é áádóó Náftalai dine'é dajílíinii hóyée'jį' hwe'iina' ninádazdeez'ą́ągo bee aniné bich'į' nidahodít'é ídazh'diilyaa.

¹⁹Aláahgo naat'áanii nidahaaskaigo anaa' ádahoolaa; Kéínan kéyahdóó aláahgo nidant'áii éí Téíyanak kin haal'áadi Megído tooh ílíní bibąąhgi anaa' ádahoolaa; béésh łigaii t'áadoo ła' ghadayiisnil da.

²⁰Yádiłhiłdę́ę́' sǫ' hoł da'ahoogą́ą́', sǫ' dabideetiindę́ę́' Sísera yił da'ahoogą́ą́'.

²¹Kíshan tooh nílínígíí adabis'éél; éí t'áá ałk'idą́ą́' tooh nílį́įgo Kíshan tooh wolyé. Shii' sizíinii nílíinii, nidziilgo bik'i nanináa doo.

²²T'óó báhádzidgo łį́į́' dayíltaałgo ayóogo bikétł'in dadiits'a'; łį́į́' bee na'abaahii doo nidadilna'góó dadilwo'.

²³Mííraz haz'ánígi kéédahat'íinii hóyée'go bá hadahohdziih, ní Bóhólníihii bidiyingo naal'a'í, ákwii kéédahat'íinii ts'ídá bik'e'íyé'ígi át'éego hóyée'go bá hadahohdziih, háálá Bóhólníihii t'áadoo yíká ííjée' da; ayóó ádaat'éii bich'į' t'áadoo Bóhólníihii yíká ííjée' da.

²⁴Kííni dine'é Hííber wolyéii be'asdzą́ą́ Jéíyel éí sáanii biláahgo bik'ihojidlíi le'; sáanii éí níbaal yii' dabighanígíí biláahgo bik'ihojidlíi le'.

²⁵Tó jííkeedgo abe' hainíką́; ásaa' ílíinii bee abe' dík'ǫ́zhí hainíką́.

²⁶Bíla' yee níbaal bá anídaalkałí néidiitą́ áádóó bíla' nish'náájíígíí yee bee atsidí néidii'ą́ągo Sísera bitsiits'iin yigházníłne'; bijaat'ah góne' ayídzííłne'.

²⁷Hakétsį́įjį' naa'íígo', índa k'ídahineezdéél; jó, hakétsį́įjį' naa'íígo'; t'áá ákǫ́ǫ́ naa'íígo'ígi daaztsą́.

²⁸Sísera yę́ę bimá tsésǫ'gi tsin yistł'ǫ́ǫgo dáádiníbaalígíí yiníká déez'į́į'go ání, Ha'át'éegoshą' bitsinaabąąs bijáád naakiígíí doo hąh bee nináda'iibąąs da? Ha'át'éegoshą' bilį́į́' doo hąh da'íłbąąs da?

²⁹Binaal'a'í sáanii dahóyánígíí ádabidííniid, áádóó t'áá bí ałdó' t'áá ádíyi'ídi ádííniidgo ání,

³⁰Ła'da daats'í hak'ídaneeztą́ą'go hanaalye'é deiisnáago ałtaa dei'niih: diné t'ááłá'í nítínígo bá ch'ikę́ę́h t'ááłá'ígo, doodaii' nidilt'éego yá ats'ádayiinííł. Sísera bá naa'at'ą́hí ał'ąą át'éego nidaashch'ąą'ígíí, naa'at'ą́hí ał'ąą át'éego nidaashch'ąą'ígíí tsahts'ósí bee t'áá ałch'ishdę́ę́' ayóó ánóolningo ádaalyaii éí nídeididooniłígíí azéédéełtsoozí ałtaa dei'niih.

³¹Bóhólníihii nílíinii, bíni'dii nida'ana'í t'áá ałtso ádadoodįįł! Nidi ayóó'ádahó'níinii éí hózhónígo ha'íí'ą́ nahalingo náás yikah doo. Áko éí kéyahgi hasht'ehodít'éego dízdiin nááhai.