Read Navajo JUDGES 7 Bible Online

JUDGES 7 - Navajo bible

JUDGES 7

¹Ákohgo Jerabéíyal, éí Gídiyan óolyé, índa diné hoł naakaígíí t'áá ałtso t'ah doo hąhígóó nízhdiijée'go Héírad tó háálį́ bíighahgi nidadziizná. Mídiyan dine'é éí náhookǫsjígo Móreh dah daask'id bíighahgi honíts'aa'góoda nidahaazná.

²Bóhólníihii éí Gídiyan áyidííniid, Diné nił naakaígíí t'óó ahayóigo biniinaa Mídiyan dine'é doo nílák'ee dideesh'áał da. Doodaii' Ízrel dine'é shik'ijį' danilį́įgo ádaa daha'niihgo ádadidooniił, T'áá nihí yisdá'ádadee'nil.

³Éí bąą k'ad kódíníigo diné bił ch'íhoní'aah, T'áá háiida bił yéé' hólóonii áádóó ádił nahwiijaahgo náldzidii t'ah doo hąhígóó bíni'dii Dził Gíliyadóó hooghangóó nihéédahakááh. Naadiin naakidi mííl anáhaaskaigo neeznáadi mííl éí t'áá ákǫ́ǫ́ bił dah joonééł.

⁴Áko Bóhólníihii éí Gídiyan ánéídoo'niid, Diné t'ahdii t'óó ahayóí; tóojį' díí'ishgo áadi ła' ná bééhózingo ádeeshłíiłgo, Díí lą́ą, nidish'nínígíí nídidííniłgo éí nił yikah doo índa t'áá háiida, Díí doo nił dookah da, nidishnínígíí éí diné doo nił dookah da.

⁵Tóojį' diné jiní'eezhgo Bóhólníihii éí Gídiyan áyidííniid, Łééchąą'í ałch'alígi át'éego da'ałch'alígíí t'áá ałtso t'áá sahdii bits'ádíínił, índa t'áá ałtso nitsidadéesgo'go da'oodlą́'ígíí ałdó' t'áá sahdii bits'ádíínił.

⁶Áko bílák'eejį' tó deiłch'algo da'oodlą́'ígíí jííłta'go táadi neeznádiin yilt'éé lá, nidi ła'ígíí éí t'áá ałtso nitsidadéesgo'go taah danees'ą́ągo da'oodlą́ą́'.

⁷Áko Bóhólníihii éí Gídiyan ánéídoo'niid, Táadi neeznádiingo diné da'ííłch'alígíí éí áádeesįįłgo Mídiyan dine'é nílák'ee dideesh'ááł, áádóó ła'ígíí t'áá ałtso t'ááłá'í nítínígo t'áá bí dabinághangóó bíni'dii nídeíkááh.

⁸Áko Ízrel dine'é ła'ígíí t'áá ałtso dabiníbaal naaznilígóó béé'jiis'nii', nidi táadi neeznádiin dinéhígíí éí ch'iyáán áádóó deenásts'aa' bidee' bee í'dílzoołí nídeidiinil. Áko Mídiyan dine'é éí hayaajígo yíldzis góyaa dah yinééł.

⁹T'áá éí bitł'éé' Bóhólníihii áhodííniid, Nídiidááh, ana'í dah yinéłígóó dínááh, háálá éí nílák'edíí'ą́.

¹⁰Nidi dah oonéłígíí bik'ee nił yée'go éí Púra ná naal'a'í ákǫ́ǫ́ bił díí'ash.

¹¹Áko diné ha'át'íí daanínígíí yídííłts'įįłgo bee níla' bidziil dííleełgo dah oonéłí góyaa hidíídááł. Ákohgo Púra há naal'a'í bił ákóyaa jiní'áazhgo siláo dah yinéłígíí bibąąhjį' jiní'áázh.

¹²Áko nahachagiitsoh t'áadoo bee néelą́'ída nahalingo Mídiyan dine'é áádóó Ámalek dine'é índa ha'a'aahdę́ę'go dine'é éí yíldzis góyaa dah yinééł, áko tónteel bibąąhgi séí t'óó ahayóígíigi át'éego bighą́ą́'ask'idii doo jóołta' ádanéelą́ą' da.

¹³Gídiyan níyáago, jó, diné ła' neizyeelígíí bik'is yee yił halne'go ání, Jó, baa neiseełgo baa neisíyeelii éí tł'oh naadą́ą́' bidee'í bááh ályaaígíí éí Mídiyan dine'é dah yinéłí góne' íímáazgo níbaal yik'i ch'ínímááz. Áko yídeezgohgo ahiih nááłhęęzh.

¹⁴Áko bik'is ábidííniid, Díí Ízrel dine'é Jó'ash biye' Gídiyan bidiltłish át'éé lá, háálá Diyin God éí Mídiyan dine'é áádóó yił dah deínéehii t'áá ałtso hálák'eidíí'ą́.

¹⁵Áko baa nidziizyeelígíí áádóó ááhyiłnínígíí dzidiizts'ą́ą'go Gídiyan sodoolzin, áádóó Ízrel dine'é dah yinéłígóó nídzídzáago ájíní, Hasht'e'ádadołnééh, háálá Mídiyan dine'é bits'ą́ą́dóó dah deínéehii Bóhólníihii nihílák'eidíí'ą́.

¹⁶Áko diné táadi neeznádiingo diné dah yinéłígíí táá'góó ałts'ázhnínil, índa deenásts'aa' bidee' bee í'dílzoołí áádóó ásaa' éí honooyééł bii' naaznilgo t'áá ałtso deíjáahgo ájiilaa.

¹⁷Áko ábizhdííniid, Dashinół'į́įgo ííshją́ą́ íisdzaaígi ádaaht'į́į doo; dah oonéłígíí bit'áahjį' niníyáago íisdzaaígi ádaaht'į́į dooleeł.

¹⁸Deenásts'aa' bidee' bee ídílzoołí bee ádííniidgo shí índa diné shił naakaígíí t'áá ałtso éí dah oonéłígi t'áá ałtsodę́ę́' deenásts'aa' bidee' bee í'dílzoołí bee ádadidoohniiłgo, Bóhólníihii índa Gídiyan bidiltłish, dadidoohniił.

¹⁹Áko Gídiyan áádóó diné neeznádiingo hoł naakaígíí dah oonéłígíí bit'áahjį' ajííjée'go tł'é'ííłníi'go hada'ídées'į́'í ániid ałnánáá'nil, áko deenásts'aa' bidee' bee í'dílzoołí bee ádazhdííniidgo ásaa' hálák'ee naaznilígíí nidadziists'il.

²⁰Áko táa'go ałts'áá'nilígíí deenásts'aa' bidee' bee í'dílzoołí yee ádaaníigo áádóó ásaa' nidadzistseedgo honooyééł éí nishtł'ají bílák'ee naaznil, índa adee' bee í'dílzoołí éí nish'náájígo bílák'ee naaznilgo hadadeeshghaazhgo ádaaní, Bóhólníihii índa Gídiyan bidiltłish!

²¹Áko diné t'ááłá'í nítínígo dah oonéłígíí yinázį́, áádóó ana'í t'áá ałtso nídiijée'go hahodííłdláadgo dah dadíníichą́ą́'.

²²Deenásts'aa' bidee' bee í'dílzoołí táadi neeznádiingo yee ádaaníigo Bóhólníihii éí ana'í t'áá át'é t'ááłá'í nítínígo bidiltłish yee ałtaa alghaałgo áyiilaa, índa ana'í éí Beth-shítah kin shijaa'góó Zerérah nahós'a' bich'į'go aheezhjéé' áádóó Éíbel-miihólah kin shijaa'góoda éí Tábath nahós'a'góó ałdó' aheezhjéé' lá.

²³Áko Ízrel diné danilíinii éí Náftalai dine'é áádóó Ásher dine'é índa Manáseh dine'é t'áá át'é bits'ą́ą́dóó áłah silį́į'go Mídiyan dine'é yikéé' aheezhjéé'.

²⁴Áko Dził Íífreiyimgóó t'áá át'é Gídiyan éí nidaal'a'í adziis'a'go ájíní, Hágo, Mídiyan dine'é bik'iidoohjahgo Bethbára ha'naa nideetiiníjį' Jórdan tooh bibąąhgi bidááh nihidoohkah. Ákohgo Íífreiyim dine'é t'áá ałtso áł ah silį́į'go Bethbára ha'naa nideetiiníjį' Jórdan tooh bibąąhgóó t'áá át'é baa nijiyeekai.

²⁵Áko Mídiyan dine'é binanit'a'í naakigo, ła' Óreb wolyé, ła'ígíí Zíyeb wolyé, Óreb éí Óreb tsé'éłkáa'gi dayiisxį́, áádóó Zíyeb éí Zíyeb ch'il na'atł'o'ii yiljizhígi dayiisxį́, áádóó Mídiyan dine'é yikéé' yijah. Áko Óreb áádóó Zíyeb bitsiits'iin éí Jórdan toohjį' Gídiyan yaa deizhjaa'.