Read Navajo JUDGES 8 Bible Online

JUDGES 8 - Navajo bible

JUDGES 8

¹Áko Íífreiyim dine'é ádahodííniid, Ha'át'éegoshą' kónihííníł'įįd? T'áadoo hágo nihidiníní Mídiyan dine'é bił da'ahidíígą́ą́łgóó nisíníyáá lá. Áko t'áá íiyisí nahóyádaasti'.

²Áko Gídiyan áhodííniid, Áát'įįdígíí éí ádaot'įįdígíísh bił ałhąąh nidanohnííł? Íífreiyim dine'é bich'il na'atł'o'ii daadziihígíí éí Éíbiyíízer dine'é bich'il na'atł'o'ii bineest'ą' biláahgoósh yá'át'ééh?

³Diyin God éí Mídiyan dine'é bitahdóó bídahólníihii alą́ąjį'ígíí Óreb áádóó Zíyeb nihílák'eidíí'ą́, áko nihí ayóó ádaot'įįdígíísh ha'át'íí bee bíneesh'ą́ągo. Ákohgo ákózhdííniidgo hach'į' bádahachį'ígíí áńdahodiilzee'.

⁴Áko Gídiyan éí Jórdan toohdi jiníyáago tsé'naa nizhníyá, hó áádóó diné táadi neeznádiin hoł naakaígíí bił ch'ééh dzideeskai nidi t'áá bikéé' dajíbááh.

⁵Áko Sákath dine'é áyidííniid, Diné shikéé' yikahígíí bááh ła' baa dadoohniłgo nihííníshkeed, háálá ch' ééh dadeeskai, índa shí éí Mídiyan dine'é aláahgo binanit'a'í Zííbah áádóó Zalmóna wolyéii bikéé' yishbah.

⁶Áko Sákath dine'é aląąjį' bídahólníihii ádahodííniid, K'adísh Zííbah áádóó Zalmóna nílák'ee'nilgo biniinaa nisiláo bááh baa dadii'nił?

⁷Áko Gídiyan ání, Díí bąą Bóhólníihii éí Zííbah áádóó Zalmóna shílák'eidíí'ą́ągo honoojíídę́ę́' hosh índa ch'il ahoshí bee nihits'íís nídínéestsxis.

⁸Áádóó dashdiiyáago Piinúwel hoolyéhígíí baazhníyáago éí dine'é bich'į' t'áá ákót'éego hanáádzoodzíí', áko Sákath dine'é ádahodííniidígi át'éego Piinúwel dine'é hanáádaasdzíí'.

⁹Áádóó Piinúwel dine'é ánáábizhdoo'niid, K'é bił nínáánísdzáago díí kin yót'ááh yí'áhígíí naa'adeeshkał.

¹⁰Nít'éé' Zííbah áádóó Zalmóna hasiláo Kárkor kin haal'áagi bił nijikai; éí diné danilíinii ashdla'áadahdi mííl ánéelą́ą'go ha'a'aahdę́ę́' dine'é kónéelt'e' nidahaasdzíí' lá, háálá t'ááłáhídi neeznádiindóó ba'aan naadiindi mííl ánéelą́ą'go diltłish yee nidaabaahii ałtso ábi'disdįįd.

¹¹Áko Gídiyan dashdiiyáago Nóbah kin haal'áii áádóó Jagbíyah kin haal'áii ha'a'aahjígo níbaal yii' kéédahat'ínígíí éí be'atiingóó jiníyá, áádóó ana'í ádzísdįįd, háálá doo hada'ídées'į́į' da nít'éé'.

¹²Áko Zííbah áádóó Zalmóna nilíinii yóó'ahi'noolchą́ą'go bíjílwod, áko Mídiyandóó aláahgo naat'áanii nidilt'éhígíí Zííbah áádóó Zalmóna dashdii'eezh, áko ana'í dah yinéłígíí tazh'nooskaad.

¹³Áko Jó'ash biye' Gídiyan éí anaa' baa na'aldeehdę́ę́' níjookahgo Hérez báhátis níjookai.

¹⁴Áko Sákathdóó dinééh bił nidadzizdéelgo nidayízhdééłkid; éí Sákathdóó hastóí bídahólníhígíí índa aląąjį' naazíinii tsosts'idiindóó ba'aan tsosts'id ánéelą́ą'go dabízhi' há naaltsoos yikáá' níyíizoh.

¹⁵Áko Sákathdóó dine'é baazhníyáago ábizhdííniid, Shoo, díí Zííbah áádóó Zalmóna éí bee shá nidahołt'i'go kódadooniid yę́ę, K'adísh Zííbah áádóó Zalmóna nílák'ee doot'ą́ągo bąą nisiláo ch'ééh deeskaigo bááh baa dadii'nił?

¹⁶Kin haal'áádóó hastóí aląąjį' naazíinii nízhdii'eezhgo honoojíídę́ę́' hosh áádóó ch'il ahoshí ła' nízhdiiłjoolgo bee Sákathdóó hastóí názneestsxasgo nazneeztą́ą́'.

¹⁷Áádóó Piinúwel hoolyéegi kin yót'ááh yí'áhígíí nazhnííłkaad, índa kin haal'áhídóó diné danilíinii ałtso nidadzistsxeed.

¹⁸Ákohgo Zííbah índa Zalmóna ábizhdííniid, Dził Téíborgi diné nidasoołtseedígíí haa daat'éé shį́įshą' ádaał'į́? Áko ánááhodoo'niid, Ni ánít'éhígi ádaat'éé nít'éé'; éí t'ááłá'í nítínígo aláahgo naat'áanii biye'ké nidahalin nít'éé'.

¹⁹Áko ábizhdííniid, Éí shik'is danilį́į́ nít'éé'; shimá biyáázhké ádaat'éé nít'éé'; ts'ídá t'áá aaníí Bóhólníihii hiná; ákót'éego yisdéínínilgo shí ts'ídá t'áá aaníí doo nanihideestsxił da nít'éé'.

²⁰Áko Jííther alą́ąjį' há yizhchíinii ábizhdííniid, Nídiidáahgo naniłtsxeed. Nidi ániid naagháhígíí biniinaa t'áadoo bidiltłish hayíítą́ą da, háálá t'ah ániid nijigháhígíí biniinaa hoł yéé'.

²¹Ákohgo Zííba índa Zalmóna ázhdííniid, T'áá ninídii' néehgo nihik'i hooleeh, háálá adziil bee hólóonii éí diné ákót'į́. Áko Gídiyan náhidiitahgo Zííbah áádóó Zalmóna neistsxeed. Áko dah yiitą́ be'elyaago ghą́ą́'ask'idii bizéédéenilígíí nizh'diinil.

²²Ákohgo Ízrel dine'é éí Gídiyan ádeidííniid, Níhólníihgo nihinanít'áa doo, áádóó niye' índa ninálí ałdó' nihinant'áa doo, háálá Mídiyin dine'é bits'ą́ąjį' yisdánihíínínil.

²³Gídiyan áhodííniid, Doo nihinanisht'áa da doo, índa shiye' ałdó' doo nihinant'áa da doo, nidi Bóhólníihii t'éiyá nihinant'áa doo.

²⁴Áko Gídiyan ánááhodoo'niid, Nánihooshkąąh, diné t'ááłá'í nootínígo jaa' bighání'áhí dasoołnánígíí shaa dahidoohnił. (Háálá Íshmeiyel dine'é danilį́įgo óola jaa' bighání'áhí bee dahólǫ́ǫ́ nít'éé'.)

²⁵Áko ádadííniid, Nihił dahadlee'go naa dadii'nił. Áádóó éé' nideiskaadgo diné t'ááłá'í nítínígo ajaa' bighání'áhí deisnánígíí yikáa'jį' adayiiznil.

²⁶Áko óola jaa' bighání'áhí jííkeedígíí éí shékel wolyéhígíí t'ááłáhídi mííldóó ba'aan tsosts'idi neeznádiin dah hidiidloh áádóó dah yiitą́ bida'alyaiida áádóó yoo'da índa Mídiyan dine'é aláahgo binanit'a'í bi'éé' tsídídééh nahalingo łichí'ígíí bóóltą'go áádóó bighą́ą́'ask'idii bizéédaazt'i' nít'é'ígíida.

²⁷Áko Gídiyan éí aheesnilígíí bee íífad wolyéii áyiilaago bikin haal'áhígíí Áfra hoolyéegi dah hidíłtsoozgo áyiilaa. Áko ałjiłnii bich'į' ałk'i na'aldeehígi át'éego éí bich'į' Ízrel dine'é t'áá ałtso ałk'i naakai áádóó Gídiyan índa ha'áłchíní t'áá bił łoh bizajiiskai nidahojílin silį́į́'.

²⁸Ákohgo Mídiyan dine'é éí Ízrel dine'é biyaa dziznil dadzizlį́į'go doo dah náádazhnéet'aah da. Áko éí kéyahgi hasht'ehodít'éego Gídiyan bíyoołkáałgo dízdiin nááhai.

²⁹Jó'ash biye' Jerabéíyal dashdiiyáago t'áá hó hakin bii' kééhojit'į́į́ nít'éé'.

³⁰Áko Gídiyan haye'ké tsosts'idiin, t'áá íiyisí t'áá hó ha'áłchíní, háálá hwe'asdzą́ą́ t'óó ahayóí.

³¹Áko hwe'asdzą́ą́ jíł'íní Shííkem kin haal'áagi haye' ła' há yishchį́, éí Abímelek bee jíízhi'.

³²Áko Jó'ash biye' Gídiyan dadziztsą́; są́ biisxį́; éí Éíbiyíízer dine'é bikéyah Áfra nahós'a'gi hazhé'é yę́ę Jó'ash bitséní'ootséél góne' yóó'áho'diilyaa.

³³Gídiyan dadziztsą́ą́dóó t'áadoo hodíína'í Ízrel dine'é t'ą́ą́' dah nínáádiijée'go ałjiłnii bich'į' ałk'i na'aldeehígi át'éego Béíyal bił nidahodíłchiiłgo Béíyal-bíírith bidiyin dabidi'níinii ádayiilaa.

³⁴Áko Ízrel dine'é biBóhólníihii Diyin God doo yéédáálnii' da; éí bida'ana'í t'áá ałtso bílák'eedę́ę́' t'áá ałtsojį' hááboo'nil.

³⁵Áko Jerabéíyal (éí Gídiyan óolyé) Ízrel dine'é éí ha'áłchíní t'áadoo yaa nídajoozba' da, Ízrel dine'é nizhónígo bich'į' ájít'éé nít'éé', nidi t'áadoo ákónídahoodlaa da.