Read Navajo JUDGES 9 Bible Online

JUDGES 9 - Navajo bible

JUDGES 9

¹Áko Jerabéíyal biye' Abímelek éí Shííkem kin haal'áágóó jiníyáago hamá bik'éí áádóó t'áá ałtso hamá bizhé'é bik'éí danilíinii ábizhdííniid,

²Shííkem kin haal'áagi kéédahat'íinii t'áá ałtso dadi'doots'į́į́ł biniyé ádabidohní, Jerabéíyal biye'ké tsosts'idiin yilt'éego nihindant'áa dooígíí nihá yá'át'ééh, doodaii' t'ááłá'ígo daats'í nihinant'áa doo? Béédaałniih, shą́ą́' t'ááłá'í dine'é daniidlį́įgo nihik'éí nishłį́.

³Áko hamá bik'éí éí Shííkem dine'é t'áá ałtso yich'į' díí saad t'áá át'é yee haa nidahasne'go Abímelek yikéé' deíkáah dooleełgo tsídadeezkééz, háálá ádaaní, Nihik'éí jílį́.

⁴Áko Béíyal-bíírith dílzinii bikindę́ę́' béésh łigaii tsosts'idiingo haa deiznilgo Abímelek joolyéii éí diné t'áadoo yee chodao'íní daígíí áádóó t'óó ak'i nidanilne'ii bich'į' ni'jiiléego hakéé' tádookai.

⁵Áko Áfra kin shijaa'góó hazhé'é bighangóó ajííyáago hak'is Jerabéíyal biye'ké tsosts'idiin yilt'éego tsé t'ááłá'ígíí bikáa'gi nidzistseed, nidi Jerabéíyal biye' akéédę́'ígíí Jótham t'éí yidzíí', háálá t'áá bíná'ádees'į́į́' lá.

⁶Áko Shííkem kin haal'áagi kéédahat'íinii t'áá ałtso áłah silį́į'go Míllo kin yaa áhídóó danilíinii bił dashdiikai, índa Shííkemgi chéch'il áyah nii'áii bíighahgi Abímelek aláahgo naat'áanii ádayiilaa.

⁷Áko Jótham bił hóóne'go dah diiyáago Dził Gérazim bighą́ą'jį' haayáago sizį́įgo yéego hadoolghaazhgo ání, Shííkem dine'é danohłíinii, dashíínółts'ą́ą́', áko Diyin God nihółts'ą́ą' doo.

⁸Tsin naazkaadii aláahgo yinant'áa dooígíí ak'ah yik'i yadeidooził biniyé dah diikaigo áliv tsin ádeididooniił, Nihinanít'áa dooleeł.

⁹Nidi áliv tsin áhodidooniił, Da' shi'ak'ah bee Diyin God áádóó diné hoł nilínígíí bits'ą́ą́' dah dideesháałgoósh tsin naazkaadii t'áá ałtso t'éí binanisht'áa doo?

¹⁰Áko tsin naazkaadii éí fig tsin ádeididooniił, Hágo, nihinanít'áa doo.

¹¹Nidi fig tsin áhodidooniił, Da' bee łinishkanígíí áádóó bee shineest'ą' yá'át'éhígíí bits'ą́ą́' dah dideesháałgoósh tsin naazkaadii t'éí binanisht'áa doo?

¹²Áko tsin naazkaadii éí ch'il na'atł'o'ii ádeididooniił, Hágo, nihinanít'áa dooleeł.

¹³Nidi ch'il na'atł'o'ii áhodidooniił, Da' shineest'ą' bitoo' bee Diyin God áádóó diné danilíinii éí bił hóshónígíí bits'ą́ą́' dah dideesháałgoósh tsin naazkaadii binanisht'áa dooleeł?

¹⁴Ákohgo tsin naazkaadii t'áá ałtso ch'il deeníní ádeididooniił, Hágo, nihinanít'áa dooleeł.

¹⁵Índa ch'il deeníní éí tsin naazkaadígíí ádeididooniił, T'áá aaníí nihinaat'áanii ádashohłéehgo ak'ah shik'i yadaohsíidgo ats'ádashinołteeh ládą́ą́', hágo, shichaha'ohgi nahísóotą́ nidi doo ákódaahnééhgóó éí háni'dii ch'il deeníní bits'ą́ą́dóó kǫ' hazdoosxihgo Dził Lébanangóó gadtsoh ałtso iididoołk'ą́ą́ł.

¹⁶Éí bąą k'ad t'áá aaníinii áádóó t'áádóo nídíii ádeiilyaa danohsingo éí Abímelek aláahgo naat'áanii ádaohłaago áádóó Jerabéíyal índa bighandóó danilíinii yá'át'éhígi bich'į' ádaohdzaago, éí yaa naayáhígíí bik'ehgo baa nisoohkai ládą́ą́' yá'át'éhígi lá ádaohdzaa ni,

¹⁷háálá shizhé'é nihá naazbaa'go be'iina' ts'ídá nihá ninéidiní'ą́, áádóó Mídiyan dine'é bits'ą́ąjį' yisdánihíínil.

¹⁸Nidi shizhé'é bighandóó danilíinii díí jį́ bik'ijį' dasoolį́į'go biye'ké tsosts'idiin yilt'éego tsé t'ááłá'ígíí bikáa'jį' nidasoołtseed, áko shizhé'é éí asdzání há naal'a'í biyáázh Abímelek éí Shííkem dine'é aláahgo binanit'a'í nilį́įgo ádaohłaa, háálá aají nihí nihik'is nilį́.

¹⁹T'áá aaníinii áádóó t'áádóo nídíii díí jį́ Jerabéíyal áádóó bighandóó danilíinii bił bich'į' bee ádanoht'éé nít'ée'go Abímelek baa nihił nidahoozhǫǫh doo índa bí ałdó' bíni'dii nihaa bił nihoozhǫǫh doo.

²⁰Nidi doo ákót'éégóó bíni'dii Abímelek bits'ą́ą́dę́ę́' kǫ' hazdoosxihgo Shííkem kin haal'áádóó dine'é índa Míllo kin yaa'áhídóó dine'é iidółk'ą́ą́h, áádóó bíni'dii Shííkemdóó dine'é índa Míllo kin yaa'áhídóó dine'é bits'ą́ą́dóó kǫ' hadónaadgo Abímelek iidółk'ą́ą́h.

²¹Áko Jótham yóó'ajoolwodgo yóó'azhnííchą́ą́' áádóó Bíyer haz'ánígi jiníyáago ákwii kééhojit'į́į́ nít'éé', háálá hak'is Abímelek bik'ee hoł yéé'.

²²Abímelek éí Ízrel dine'é binazh'nt'áago táá' nááhai.

²³Diyin God éí Abímelek índa Shííkem dine'é bita'gi ak'e'diniih hólǫ́ǫgo áyiilaa. Áko Shííkem dine'é éí Abímelek yindahaz'ą́.

²⁴Áko Jerabéíyal biye'ké tsosts'idiinígíí yich'į' t'óó báhádzidígi ádáát'įįd áádóó hak'isóó naaztseedii bidiłígíí Abímelek hak'i didoot'ááł, índa Shííkem dine'é háká ííjée'go hak'isóó neistseedígíí ałdó' yik'i deididoo'ááł.

²⁵Áko Shííkem dine'é éí diné haa nidahidoo'nahígíí dziłghą́ą'di nideiznil. Ákǫ́ǫ́ ch'ídahakáhígíí ałtso yighanída'ii'nił, áko éí bee Abímelek hoł hóóne'.

²⁶Áko Ébed biye' Géíyal hak'éí bił Shííkem kin haal'áágóó jíkai, índa Shííkemdóó dine'é t'áá íiyisí haa deidzólí.

²⁷Ákohgo dá'ák'ehgóó ch'ídahaaskaigo bich'il na'atł'o'ii áłah ádayiilaa áádóó ch'il na'atł'o'ii bitoo' yąąh hadayiiznii'go ída'íísįįd; bidiyin bidi'níinii dílzinii bikin góne' yah aakaigo da'ííyą́ą́' áádóó da'oodlą́ą'go Abímelek hóyée'go yá hadaasdzíí'.

²⁸Áko Ébed biye' Géíyal ázhdííniid, Abímelekshą' ha'át'íí jílį́? Shííkem dine'é daniidlíiniishą' ha'át'íí niidlį́įgo Abímelek há nideiil'a'? Doósh Jerabéíyal biye' jílį́į da? Doósh Zííbal há naal'a' da? Shííkem dine'é bizhé'é nilíinii Héímor bá nidaał'a'. Ákoshą' ha'át'íí biniyé há nideiil'a'?

²⁹Díí diné shílák'ee sinil le' nisin. Ákót'éego Abímelek nahjį' kóhodeeshłííł, áádóó Abímelek ííłní, Nisiláo lą'í áníléehgo nihich'į' nídiibááh.

³⁰Áko kin haal'áádóó naat'áanii jílíinii Zííbal joolyéii éí Ébed biye' Géíyal bizaad baa hozdiizts'ą́ą'go bik'ee háhóóchįįd.

³¹Áko t'áá nahont'inee Abímelek bich'į' naal'a'í adziis'a'go ájíní, Shoo, Ébed biye' Géíyal bik'éí yił Shííkem kin haal'áajį' yíkai, áko kin haal'áagi ts'ídá ditą́ągo nich'ą́ą́h ahéé'ítł'ingo áyiilaa.

³²Éí bąą k'ad, díí tł'éé' nílááh yínááł; diné nił naakaígíí bił halgaidi baa hínóhjéé'.

³³Ákohgo t'ah abíínígo jį́honaa'éí t'óó hááyáhígo nídidoohjahgo kin haal'áhígíí bik'i dah doohjahgo diné yił naakaígíí nihá hashjada'doolíiłgo t'áá nínízinígi át'éego atídadíílííł.

³⁴Áko éí bitł'éé' Abímelek índa diné hoł naakaígíí t'áá ałtso nídiijée'go t'áá nahont'inee nizhnínáago Shííkem kin haal'áhígíí dį́į́'dę́ę'go baa nijiyeekai.

³⁵Áko Ébed biye' Géíyal dashdiiyáago kin haal'áhí yah a'atiinígi dzizį́, áádóó Abímelek índa diné bił naakaígíí aa niheekai yę́ędóó nídiijéé'.

³⁶Áko Ébed biye' Géíyal éí diné dziiłtsą́ągo Zííbal ábizhdííniid, Shoo, dziłghą́ą́'dę́ę́' diné hadah deíjeeh. Áko Zííbal ánááhodoo'niid, Dził bichaha'ohígíí diné nahalingo yíní'į́į́ lá!

³⁷Géíyal hanáánáádzíi'go ání, Jó, kéyah ałníí'dę́ę́' diné deíjeeh, áko t'ááłáhígo dah náánáá'néłígíí éí Míyon-íínim hóteeldę́ę́' deíjeeh.

³⁸Ákohgo Zííbal áhodííniid, Háájíshą' ádííníniid yę́ę silį́į'go ádíní, Abímelekshą' ha'át'íí jílį́įgo há nideiil'a' dooleeł? Díí diné ni'ínígíísh ádaat'į́? K'ad nílááh, bił da'ahígą́.

³⁹Áko Géíyal éí Shííkem dine'é yinááł dah diiyáago Abímelek bisiláo yił da'ahoogą́ą́'.

⁴⁰Áko Abímelek dah hodíníiłchą́ą́' áádóó bik'ee yóó'azhnííchą́ą́', índa t'áá níléí yah a'atiinjį' t'óó ahayóí bik'eh dazdeesdlį́į'go tídazhdiilaa.

⁴¹Áko Arúmah haz'ánígi Abímelek kééhojit'į́, índa Zííbal éí Géíyal áádóó bik'isóó t'áá bił ch'ínizhníłkaadgo doo Shííkem kin haal'áagi kénáádahat'į́į da.

⁴²Áádóó éí biiskání halgaigóó nidaaskaigo Abímelek yił dahoolne'.

⁴³Áko hasiláo ałts'ájíínilgo táa'go dah yinéełgo halgaigi bił baa nijiyeekai, áádóó jidéé'į́į'go kin haal'áádóó diné ch'ídahaazhjée'ii áadi dziiłtsą́, áko náhizhdiitahgo bich'į' jiyeedzáago ałtso nidzistseed.

⁴⁴Abímelek áádóó hoł dah yinéłígíí bił kin haal'áhígi yah e'etiinígi nizhníjée'go naakigo dah yinéłígíí halgaijį' ch'íheezhjée'ii bik'i dah jizhjée'go ałtso nidadzistseed.

⁴⁵Áko éí bijį́ shá bíighah kin haal'áagi Abímelek bił da'ahijigą́ągo kin haal'áagi hak'eh deesdlį́į́' áádóó diné ałtso neistseed, áko kin haal'áii naa'adadziiskaadgo ákwii áshįįh nihidadziiskaad.

⁴⁶Shííkem kin yaa'áhídóó diné t'áá ałtso díí deidiizts'ą́ą'go bidiyin Bíírith wolyéii bikin niłdzilgo si'ą́ągo yiyaa aheezhjéé'.

⁴⁷Éí bee Abímelek bił hóóne'; Shííkem kin haal'áagi kin bidziilgo yaa'áhígi diné t'áá át'é áłah silį́į́' lá, hodoo'niid.

⁴⁸Áko Abímelek éí Dził Zálman si'ánígóó haayá; diné hoł naakaígíí ałdó' áajį' bił hadziskai, áko Abímelek éí tsénił nízhdii'ą́ągo tsin bits'ádaoz'a' k'ídziisne'go hawosgi dah dziznil. Áko diné hoł naakaígíí ábizhdííniid, T'áá dashooh'į́įgo íisdzaaígi át'éego tsį́įłgo nihí ałdó' ákódaaht'į́.

⁴⁹Diné t'ááłá'í nítínígo ats'áoz'a' dayiisne'go Abímelek yikéé' dah diikai; kin niłdzilgo haz'áníjį' nidayiizhjaa'go kin yiih dahodeeznilgo Shííkemgi kin yaa'áhígi diné t'áá ałtso daneezná; t'ááłáhídi mííl daats'í diné áádóó asdzání daneezná.

⁵⁰Ákohgo Abímelek éí Thííbez kin haal'áágóó dashdiiyáago Thííbezgi kéédahat'íinii binijíznáago bik'eh dazdeesdlį́į́'.

⁵¹Nidi éí kin haal'áhígi kin bidziilgo yaa'áhí hólǫ́ǫ́ lá, áko éí kin haal'áhídóó diné índa asdzání áajį' adahineezhchą́ą'go ádá da'deeskaal, áko kin yaa'áhígíí bighą́ą'jį' hahaazhjéé'.

⁵²Áádóó Abímelek éí kin yaa'áhíjį' ajííbaa'go bił da'ahijoogą́ą́' áádóó kin yaa'áhígíí bidáádílkał biih hozhdidoonił biniyé baatįįh jííyá.

⁵³Áko asdzání léi' tsédaashch'íní nitsxaii yee Abímelek yitsiit'áá iidzííłne'go bitsiits'iin sits'il.

⁵⁴Ákohgo dinééh éí bee na'abaahii há neijaahii ábijiní, Nidiltłish hahíłhango bee shiyíłhé, áko, Asdzání hwiisxį́į́ lá, doo dadidooniił da. Áko dinééh éí diltłish haníkáiníłgeedgo dadziztsą́.

⁵⁵Áko Ízrel dine'é éí Abímelek daaztsą́ągo dayiiłtsą́, índa t'áá ałtso bighangóó anídahaaskai.

⁵⁶Kót'éego Abímelek doo yá'áshónígi ájíít'įįdígíí Diyin God k'ééhodiidlaa; jó, hazhé'é bits'ą́ą́' hak'is tsosts'idiingo nidzistseedgo bąą ákóhoolaa.

⁵⁷Áko Shííkem dine'é t'áá ádzíłtso doo yá'áshónígi ádajíít'įįdígíí Diyin God k'ééhodiidlaa, índa Jerabéíyal biye' Jótham hóyée'go há haadzíi'ii hak'ijį' silį́į́'.