Read Navajo REVELATION 11 Bible Online

REVELATION 11 - Navajo bible

REVELATION 11

¹Nít'éé' bee ída'neel'ąąhí gish nahalin léi' shaa yítą́ągo áshi'doo'niid, Nídiidáahgo Diyin God bikin bii' sohodizin áádóó bikáá' náá'iiniihí índa diné ákóne' nidahałáhígíí bída'neeł'ąąh.

²Nidi kin bii' sohodizin binaagi haz'ánígíí doo bídí'nííł'ąął da. Éí t'áadoo baa nánít'íní, háálá ał'ąą dine'é bił dah nidahaz'áanii baa deet'ą́, áko diyingo kin haal'áii yik'i naaldeehgo dízdiindóó ba'aan naaki nídidooził.

³Oo'íinii k'ehgo shá halne'ii nidilt'éego t'ááłáhídi mííldóó ba'aan naakidi neeznádiindóó ba'aan hastą́diin yiską́ąjį', aghaashzhiin yistł'ǫ́ǫgo yee hadít'éego Diyin God yá halne' doogo bee adziilii baa dideesh'ááł.

⁴Diyin God éí nahasdzáán yee Bóhólníihii bidááhdóó díí áliv naaki sikaadgo íí'áhígíí áádóó naakigo bee hool'iní bá yadaa'áhígíí oo'íinii át'é.

⁵Diné ła'da atíhodeeshłííł hó'níigo, hazéé'dóó kǫ' hazdoosihgo hwe'ana'í danilíinii bee ázhdoołdįįł; ła'da atíhodeeshłííł hó'níigo t'áá ákót'éego nabidi'dootsił.

⁶Ádahodooníiłii yaa halne'go yoołkááł góne' doo nahałtingóó íidoolííł biniyé yá yidádi'doołkałgo bee óhólníihii bee hólǫ́, áádóó tó dił íidoolíiłgo, índa t'áá ánéiniidzįįh bik'eh bee ach'į' nidahwiilnáanii t'áá ałtso nahasdzáán bikáa'gi ánáyoodlíiłgo bee óhólníihii bee hólǫ́.

⁷Áko ałtso nahasne'go, a'áán doo nihoodzą́ą́dę́ę́' naaldlooshii naayéé' nilíinii haayáii hak'ijį' anaa' áhodoolíiłgo hak'eh didoodleełgo nahodoołtsił,

⁸áko ayóó át'éego kin haal'áii, Sádam áádóó Íijip t'óó bik'ijį' si'ą́ągo bee wójíii, bitaa'aztiingi, nihiBóhólníihii tsin ałnáoszid bikáa'jį' bił o'oolkaal yę́ęgi bits'íís shitéezh doo.

⁹Tágí jį́ azlį́į́'dóó ałní'ní'ą́ąjį' nihokáá' dine'é danilíinii áádóó ał'ąą dine'é áádóó bizaad ał'ąą ádaat'éii índa ał'ąą dine'é bił dah nidahaz'áanii dabitahdę́ę́' bits'íís deiníł'į́įgo, yóó'ádoolníiłgi dooda, daaníi doo.

¹⁰Díí Diyin God yá halne'ii nidilt'éego nahasdzáán bikáá'góó kéédahat'íinii atííł'į́į́ nít'é'ígíí biniinaa nahasdzáán bikáá'góó kéédahat'íinii jineeznánígíí bąą bił dahózhǫ́ǫ doo, honeeni yaa naakai doo, índa ahidiníłnáago t'áadoo le'é ahaa dayii'níił doo.

¹¹Nidi tágí jį́ azlį́į́'dóó ałní'ní'ą́ągo Diyin God bits'ą́ą́dę́ę́' ayol bee iiná biih hóóle'go, nídiit'áazhgo yiizį', áko dabiiłtsánígíí ayóó át'éego bik'ee bił dahóóyéé'.

¹²Nít'éé' yá'ąąshdę́ę́' iinéé' ayóó íits'a'go kóbíłníigo yidiizts'ą́ą́', Wóshdę́ę́' hashoh'aash! Áko bida'ana'í dabinááł yá'ąąsh góde k'os yee íí'áázh.

¹³Éí oolkiłígíí biyi' ayóó át'éego ni' nahaasnáa'go kin haal'áii neeznáágóó ałts'áádzooígíí t'ááłáhígo haadzo naa'ííłdááz, índa ni' nahaasnáa'go tsosts'idi mííl diné yiyííghą́ą́', łahjį'ígíí éí nídaasdzíidgo yá'ąąshdi Diyin God nilíinii yaa dahaznih.

¹⁴Naaki góne' yéé' silį́į'ii bibanááhodooshzhiizh; jó'akon, táá' góne' yéé' náádoodleełii k'adę́ę baa nááhoolzhíísh!

¹⁵Ákohgo diyingo naal'a'í tsosts'id góne'ígíí bidilní yee ádííniidgo, yá'ąąshdi ayóó át'éego iinéé' dadiists'ą́ą'go kódadííniid, Nihokáá' bee óhólníihgo bił haz'áanii éí nihiBóhólníihii índa biChrist bee bóhólníihgo bił haz'áanii silį́į́', éí hool'áágóó ahóyéel'áágóó yinant'áa doo.

¹⁶Áko naadiin dį́į́' hastóí danilíinii bibikáá'dóó nidahat'áii bikáá'dóó Diyin God yidáahjį' dah nidaháaztánígíí tsé'yaa daneeshjoolgo Diyin God yich'į' nidahasá,

¹⁷kódaaníigo: Bóhólníihii Diyin God Aláahgo Ayóó'ánóodziilii honílóonii áádóó hodeeyáádę́ę́' honílóonii [índa díínáałii], nich'į' ahééh daniidzin, háálá nidziil ayóó át'éii nídiniláago naat'áanii nílį́įgo ch'íhwíínísá.

¹⁸Ał'ąą dine'é bił dah nidahaz'áanii bádahazhchįįd. Áádóó t'óó báhádzidgo bee atí'éł'íinii baa hoolzhiizh, daneeznáanii baa nídahódóot'įįł, ná nidaal'a'ii, Diyin God yá dahalne'ii áádóó Diyin God bidiyį́į́' áádóó nízhi' deidísinii, éí a'ohgo ádaat'éii índa ayóó ádaat'éii, bich'į' nidadi'yoolyééł, índa nahasdzáán nidayiiłchxǫǫhii ádooldįįłii baa hoolzhiizh.

¹⁹Áádóó yá'ąąshdi Diyin God bikin bii' sohodizin ąą ádzaago, biyi'di tsits'aa' dílzinii bibee aha'deet'áanii bii' sinilii yit'íní silį́į́'. Áádóó atsiniltł'ish anídahata' áádóó ayóó íits'a'go dahodiists'ą́ą́', áádóó da'di'ní, áádóó ni' nidaha'ná, índa nílótsoh nááłtą́.