Read Navajo REVELATION 12 Bible Online

REVELATION 12 - Navajo bible

REVELATION 12

¹Áádóó yá'ąąshdi ádahodoonííłgóó bee ééhózinii ayóó át'éii yit'íní silį́į́', éí asdzání ła' jį́honaa'éí yee hadít'éego, tł'éhonaa'éí yik'i dah dées'eezgo, naat'á ch'ah sǫ' naakits'áadah bii' sinilgo bich'ah.

²Éí yiltsą́, áádóó awéé' bídii'na'go índa i'niiłchį́įgo niigaígíí yik'ee hadoo'níí'.

³Nít'éé' yá'ąąshdi náánáła' bee ééhózinii yit'íní náánásdlį́į́'. Jó'akon, na'ashǫ́'iitsoh łichíi'go ayóó át'éé léi' bitsiits'iin tsosts'idgo áádóó bidee' neeznáá, índa naat'á ch'ah bitsiits'iin t'áá tsosts'idgo binídaazt'i'.

⁴Yádiłhił biyi'di sǫ' yíl'áhígíí táá'góó ałts'áá'nilgo t'ááłáhígo sinil bíighahgo bitsee' yee yideeshóo'go, ni' bikáa'jį' nayííghaz. Na'ashǫ́'iitsoh éí asdzání ashchį́įgo be'awéé' yits'ą́ą́' iidoołnah biniyé asdzání k'adę́ę ałchíhígíí yidááhdóó yiizį'.

⁵Hayáázh jishchį́, éí ał'ąą dine'é bił dah nidahaz'áanii bitahgóó t'áá ałtso béésh hał yee yinant'áa doo, nidi hwe'awéé' nídiiltį́įgo Diyin God índa bibikáá'dóó nahat'áii bich'į' eeltį́.

⁶Áko asdzání honoojíidi łahgo Diyin God há hasht'ehoolaago, t'ááłáhídi mííldóó ba'aan naakidi neeznádiindóó ba'aan hastą́diin yiską́ąjį' ha'altso' doo biniyé ákǫ́ǫ́ azhnííchą́ą́'.

⁷Nít'éé' yá'ąąshdi anaa' hazlį́į́'! Máíkel áádóó bidiyingo nidaal'a'í éí na'ashǫ́'iitsoh yił da'ahigą́ą́ nít'éé', áko na'ashǫ́'iitsoh áádóó bindaal'a'í hoł da'ahoogą́ą'go

⁸bik'eh hodeesdlį́į́', áko yá'ąąshdi doo bá haz'ą́ą da hazlį́į́'.

⁹Na'ashǫ́'iitsoh ayóó'át'éii, ałk'idą́ą́' tł'iishtsohígíí, éí níłch'i bida'iiníziinii binanit'a'í, Séítan wolyéii, nahasdzáán t'áá si'ą́ą́ nít'éé' yina'alo'ii nahasdzáán bikáa'jį' bidah ahoolghan; bindaal'a'í t'áá bił bidah adabidiistł'ííd.

¹⁰Áádóó yá'ąąshdi iinéé' ayóó íits'a'go kóníigo diséts'ą́ą́', K'ad lą́ą, nihiDiyin God bibee yisdá'iildéehii áádóó bibee adziilii áádóó bee bóhólníihgo bił haz'áanii índa biChrist bibee óhólníihii k'ad dahoníle'! Háálá nihik'isóó yik'i hodii'aahii, éí nihiDiyin God binááł t'áá ákwíí jį́ índa t'áá ákwíí tł'éé' yik'i hodii'aahii, bidah ahoolghan.

¹¹Nihik'isóó éí Dibé Yázhí nilíinii bidił yee áádóó saad yee yaa dahalne'ígíí yee yik'eh dadeesdlį́į́', háálá éí dahinánígíí doo ayóó'ádayó'níígóó da'dootsaałjį' nidi niná'ádadeest'ą́.

¹²Éí bąą yá'ąąshii índa biyi' kéédahoht'íinii nihił dahózhǫ́ǫ le'! Nidi nihí nahasdzáán índa tónteel nohłíinii doo hojooba' ájíníi da! Háálá níłch'i bida'iiníziinii binanit'a'í t'óó kónígháníjį' bee nááhodidoo'naałígíí bił bééhózingo ayóó át'éego báháchį'go nihich'į' hadahóóle'.

¹³Nahasdzáán bikáa'jį' na'ashǫ́'iitsoh bidah abidi'yoolghango yaa ákoniizį́į'go, asdzání éí ashkii yishchínígíí yaatįįh yíyáago yidínéeshchą́ą́'.

¹⁴Nidi asdzání éí tł'iishtsohígíí bits'ą́ą́' honoojíígóó yóó'azhdoot'ah biniyé atsá ayóó áníldíilii bit'a'ígíí naaki haa yí'nil. Áadi táá' nááhaidóó ná'áłníi'jį' haa áhályą́ą doo.

¹⁵Áko asdzání yee iidooł'oł biniyé tł'iishtsohígíí bizéé'dę́ę́' tó tooh nahalingo asdzání bikéé' hadzíísi'.

¹⁶Nidi nahasdzáán, éí asdzání yíká aalwodgo bizéé' ąą áhoolaago na'ashǫ́'iitsoh bizéé'dę́ę́' tooh hadzíísi'ígíí ayííłna'.

¹⁷Ákohgo na'ashǫ́'iitsoh éí asdzání yich'į' báhóóchįįdgo, asdzání ba'áłchíní daadziihígíí, Diyin God yee has'áanii yik'eh dahół'íinii índa Jesus baa hane'ii dayoodlánígíí yich'į' anaa' ánéidoodlíiłgo dah diiyá.