Read Navajo REVELATION 13 Bible Online

REVELATION 13 - Navajo bible

REVELATION 13

¹Áko tónteel bibąąhgi séítahdóó yiizį'. Nít'éé' tónteel biyi'dę́ę́' naaldlooshii naayéé' nilíinii ła' bidee' neeznáá áádóó bitsiits'iin tsosts'id naat'á ch'ah bidee' t'áá neeznáá binídaazt'i'go, índa yízhí bee Diyin God í'díl'íinii dabitsiits'iin t'ááłá'í ní'ánígo bik'idaasdzohgo, haagháahgo yiiłtsą́.

²Naaldlooshii naayéé' nilíinii yiiłtsánígíí náshdóítsoh łikizhígíí nahalin, bikee' shash bikee' nahalin, bizéé' náshdóítsoh bitsiijį' ditł'ooígíí bizéé' nahalin. Áko na'ashǫ́'iitsoh t'áá bí yee bidziilii áádóó yikáá'dóó naha'áii índa bee bóhólnííh ayóó át'éii naayéé' nilíinii yeidiní'ą́.

³Bitsiits'iin ła' t'áá bidiyoołhéełgo k'áák'eh nít'éé' nahalin, nidi t'áá bidiyoołhéełgo k'áák'eh nít'ée'ii náádzíí' lá, áko nihokáá' dine'é t'áá át'éé nít'éé' t'óó bił adahayóigo díí naaldlooshii naayéé' nilíinii yikéé' dah diikai.

⁴Diné éí na'ashǫ́'iitsoh yich'į' nidahasá, háálá bibee óhólníihii éí naayéé' yeidiní'ą́. Áádóó, Háishą' naaldlooshii naayéé' nilíinii yił aheełt'é? Háishą' yił ahidoogą́ąłgo yíneel'ą́? daaníigo naayéé' yich'į' nidahasá.

⁵Saad bee ádaa ha'niihii índa saad bee da'ódziihii naaldlooshii naayéé' nilíinii bizaalyáago dízdiindóó ba'aan naaki nídeezidjį' bee bóhólníihgo yee ááníił doogo baa deet'ą́.

⁶Áko Diyin God yíídóodzihgo házhi' áádóó kééhojit'į́įdi índa yá'ąąshdi kéédahat'íinii ałdó' yíídóodzihgo bizéé' ąą áhoolaa.

⁷Áádóó Diyin God bidiyį́į́' yich'į' anaa' áhodoolííł índa yik'eh didoodleełgo baa deet'ą́. Ał'ąą dine'é áádóó nihokáá' dine'é danilíinii áádóó bizaad ał'ąą ádaat'éii índa ał'ąą dine'é bił dah nidahaz'áanii t'áá ałtso bee bóhólníih doogo baa deet'ą́.

⁸Áko nahasdzáán bikáa'gi kéédahat'íinii t'áá ałtso, nahasdzáán niit'ą́ą́dę́ę́' Dibé Yázhí seesyį́ nilíinii iináájí naaltsoos bíhígíí bii' t'áadoo dabízhi' ádaalyaii, naayéé' yich'į' nidahodoołaał.

⁹T'áá háiida daz'diits'a'ii háni'dii ajíists'ą́ą́'!

¹⁰T'áá háiida yisnááh abi'didoolníłígíí éí háni'dii yisnááh jílį́į doo; t'áá háiida diltłish bee ajiisxínígíí háni'dii diltłish bee hodi'yoolyééł. Díí biniinaa Diyin God bidiyį́į́' dajílíinii ts'ídá hada'jólníi doo áádóó aa deijólíi doo.

¹¹Nít'éé' náánáła' naaldlooshii naayéé' nilíinii nahasdzáán biyi'dę́ę́' haagháahgo náánéiłtsą́. Dibé yázhí nahalingo bidee' naaki, áádóó na'ashǫ́'iitsohgi át'éego haadzíí'.

¹²Naaldlooshii naayéé' nilíinii átséhígíí bee bóhólníhígíí t'áá binááł t'áá ałtso yee ádínááhólníihgo yaa naaghá. Naaldlooshii naayéé' nilíinii átséhígíí t'áá bidiyoołhéełgo k'áák'eh nít'ée'go náádzí'ígíí nahasdzáán índa bikáa'gi kéédahat'íinii bich'į' nidahałáago áyósin.

¹³Álílee k'ehgo bee éédahózinii ayóó ádaat'éii yaa naaghá, azhą́ yádiłhił biyi'dę́ę́' nidi diné binááł nahasdzáán bikáa'jį' kǫ' hadah hidinaadgo áyoolííł.

¹⁴Áádóó naaldlooshii naayéé' nilíinii nihokáá' dine'é yideezlo', Naayéé' diltłish bee t'áá bidiyoołhéełgo k'áák'eh nít'ée'ii nidi hinááh násdlį́į'ii be'elyaago ádaahłééh, yiłníigo, naaldlooshii naayéé' nilíinii binááł álílee k'ehgo bee éédahózinii yaa naagháa doogo baa deet'ánígíí bee nihokáa'gi kéédahat'íinii yina'alo'.

¹⁵Índa naaldlooshii naayéé' nilíinii be'elyaii yee nídídzihii yiih yiyííláago yáłti'go nidi íidoolíiłgo baa deet'ą́ áádóó naaldlooshii naayéé' nilíinii be'elyaii doo bich'į' nidahojiłáa daígíí nidaho'ditseed dooleełgo baa deet'ą́.

¹⁶Índída a'ohgo ádaat'éii índa ayóó ádaat'éii, áádóó da'at'íinii índa badahojoobá'íii, áádóó doo naalte' danilíinii índa naalte' danilíinii t'áá ałtso dabíla' nish'náájí éí doodaléi' dabítáa'gi bídadi'doodliłgo yee hooł'a'.

¹⁷Áko ła'da doo nizhdi'yoołnih da áádóó doo haa nidi'yoonih da, díí naaldlooshii naayéé' nilíinii bízhi' éí doodaléi' bízhi' be'éélta'ii bee hó'diidlidgo t'éiyá.

¹⁸Díí hódzą́ át'é. Éé'di'yiitįįhii bíni'dii naaldlooshii naayéé' nilíinii be'éélta'ii yéé'deetįįh, háálá éí nihokáá' dine'é be'éélta'ii át'é, be'éélta'ii hastą́ądi neeznádiindóó ba'aan hastą́diindóó ba'aan hastą́ą́h.