Read Navajo REVELATION 15 Bible Online

REVELATION 15 - Navajo bible

REVELATION 15

¹Nít'éé' yá'ąąshdi náánáła' ádahodoonííłgóó bee ééhózinii ayóó át'éii dooládó' dago náánéiłtsą́, éí diyingo nidaal'a'í tsosts'idgo bee ach'į' nidahwiiłnáanii tsosts'idgo bee dahólǫ́. Díí bee nihoolzhíishii ádaat'é, háálá éí bee Diyin God t'óó báhádzidgo bibee até'él'íinii niit'ééh.

²Áko ha'át'íí shį́į́ léi' tsésǫ' be'ek'id nahalingo kǫ' bił ałtahgo yiiłtsą́. Áadi naaldlooshii naayéé' nilíinii áádóó t'áá éí be'elyaii índa be'éélta'ii bee bi'dójíii yik'eh dadeesdlį́į'ii, éí Diyin God bitsin tł'óół bąąh daneelzhee'go bee nida'a'néii dah dayíjáahgo tsésǫ' be'ek'id nahalinígíí yibąąhdóó naazį́.

³Mózes éí Diyin God yá naal'a'í biyiin, áádóó Dibé Yázhí nilíinii biyiin yee dahataałgo kódaaní: Ninaanish ayóó ádaat'é áádóó t'óó bik'eda'ayóí, Bóhólníihii Diyin God Aláahgo Ayóó'ánóodziilii nílíinii. Ts'ídá t'áá ákogi át'éego áádóó t'áá aaníigo át'éii bee áánííł, Diyin God bidiyį́į́' Aláahgo biNanit'a'í nílíinii.

⁴Bóhólníihii nílíinii, háishą' nízhi' doo yidísin da, áádóó doo yaa haniih da doo? Jó, t'áá ni t'éiyá t'áá sáhí diníyin. Ał'ąą dine'é bił dah nidahaz'ą́ą́dę́ę́' naa áłah dooleełgo nich'į' nidahałáa doo, háálá t'áá ákogi ááníiłii ííshjání silį́į́'.

⁵Kódzaadóó bik'ijį' náádéésht'į́į́', áko yá'ąąshdi níbaal bii' hodílzinii éí kin bii' sohodizin wolyéii biyi' bee bééhózinii hólónígíí ąą ádzaa.

⁶Kin bii' sohodizin biyi'dóó diyingo nidaal'a'í tsosts'idgo bee ach'į' nidahwiiłnáanii tsosts'idgo bee dahólónígíí ch'ékai, éí áłts'óózígo yisdizígíí bee na'at'ą́hí łigaii dits'idgo ályaii ts'ídá chin bąąh ádaadingo bits'áda'deezdíingo yee hadadít'é, áádóó dabijéíts'iin gónaa óola sis binídaazt'i'.

⁷Áko ha'át'íí shį́į́ dahináanii dį́'ígíí ła', éí Diyin God hool'áágóó ahóyéel'áágóó hináanii t'óó báhádzidgo bibee até'él'íinii óola łeets'aa' tsosts'idgo bii' hadadeezbingo, diyingo nidaal'a'í tsosts'idígíí yitaizką́.

⁸Áádóó Diyin God bee bits'ádi'nílíidii índa bibee adziilii bits'ą́ą́dóó łidígíí kin bii' sohodizin bii' hadéébįįd, áko doo ła' yah anáádzódza' át'ée da, diyingo nidaal'a'í tsosts'idgo bee ach'į' nidahwiiłnáanii tsosts'idgo bee dahólónígíí ałtso ádaadzaago índa.