Read Navajo REVELATION 17 Bible Online

REVELATION 17 - Navajo bible

REVELATION 17

¹Nít'éé' diyingo nidaal'a'í tsosts'idgo łeets'aa' tsosts'id dah dayíjáhígíí ła' kóshidííniid, Tį', ałjiłnii ná'áyóí át'éii tó t'óó ahayóigo yik'ijį' dah sidáhígíí bee baa náhódóot'įįłii nił bééhodeesįįł biniyé dínííł'įįł.

²Éidí nahasdzáán bikáá'góó aláahgo naat'áanii danilíinii yił ahá nida'asgeh, áádóó éí na'ageh yee tsi'naagháii, wáingi át'éego nahasdzáán bikáá'góó kéédahat'íinii bik'ee tsi'nidaaskai.

³Áádóó éí diyingo naal'a'í honoojíígóó Níłch'i Diyinii yee ashííłtį́, nít'éé' naaldlooshii naayéé' nilíinii łichxíi'go bitsiits'iin tsosts'idgo áádóó bidee' neeznáá yiiłtsą́. Éí yízhí bee da'ódziihii t'áá át'éé nít'éé' bee bik'e'ashchį́, éí asdzání léi' bik'i dah sidáago yiiłtsą́.

⁴Díí asdzání, naak'ą' tsídídééh nahalingo łichí'ígíí áádóó naak'ą' ałchxíí' yee hadít'é, áádóó óola, tsé da'ílíinii índa diichiłí yee naashch'ąą'. Doo daaldinii índa t'óó baa'ihgo na'ageh yee tsi'naagháii óola bee adlání bii' hadeezbingo dah yookááł.

⁵Áádóó bítáa'gi, Bábilan ayóó át'éii, da'ałjiłnii áádóó nahasdzáán bikáa'gi doo daaldinii bimá, níigo yízhí doo bééhózinii bee bik'e'ashchį́.

⁶Díí asdzání éí Diyin God bidiyį́į́' dabidił yę́ę índa Jesus yá daneeznáanii dabidił yę́ę yik'ee tsi'naagháago yiiłtsą́. Kót'éego yiiłtsą́ągo t'áá íiyisí bik'ee t'óó shił ahóóyóí.

⁷Nidi diyingo naal'a'í áshidííniid, Ha'át'íísh bik'ee t'óó nił ahayóí? Asdzání áádóó naaldlooshii naayéé' nilíinii bitsiits'iin tsosts'idgo índa bidee' neeznáá, asdzání bik'i dah sidáhígíí ááhyiłníinii doo bééhózin da yę́ę bee nił hodeeshnih.

⁸Naaldlooshii naayéé' nilíinii yiniłtsánígíí, hólǫ́ǫ́ nít'ée'ii k'ad ádinii, éí a'áán doo nihoodzą́ą́dę́ę́' hadoogáałgo í'dooldįįłgo haz'ą́ąjį' dah didoogááł. Nahasdzáán niit'ą́ą́dę́ę́' éí nihokáá'góó kéédahat'íinii iináájí naaltsoos bii' doo bízhi' ádaalyaii naaldlooshii naayéé' nilíinii dayiiłtsą́ągo bik'ee t'óó bił adahayói doo, háálá éí hólǫ́ǫ́ nít'éé', éí k'ad ádin, nidi nídoodááł.

⁹Hojíyáanii áádóó ak'izhdi'yiitįįhii t'éiyá díí ááhyiłníinii hoł bééhodoozįįł. Tsosts'id atsiits'iinígíí éí tsosts'idgo dah yisk'id ádaat'é, áko éí asdzání yikáá' dah sidá.

¹⁰Éí ałdó' aláahgo naat'áanii tsosts'idgo ádaat'é, t'áá éí ashdla'go nahjį' haníídee', ła' éí t'ah nant'á, ła' éí t'ah doo yígháah da, níyáago t'óó kónígháníjį' bee hodidoonaał.

¹¹Naaldlooshii naayéé' nilíinii hólǫ́ǫ́ nít'éé' k'ad ádinígíí, éí tseebíí góne' nilį́į nidi tsosts'idígíí yitah nilį́, éí í'dooldįįłgo haz'ą́ąjį' dah didoogááł.

¹²Adee' neeznáá yiniłtsánígíí éí aláahgo naat'áanii neeznáá yilt'éego bee bídahólníih dooleełii t'ah doo bee dahaleehii ádaat'į́, t'ááłá'í ahéé'ílkidjį' naaldlooshii naayéé' nilíinii bił aláahgo naat'áanii danilíinii bee óhólnííh bee dahodooleeł.

¹³Díí t'ááłá'í yee nitsídaakeesgo bee adziilii áádóó bee bídahólníhígíí naaldlooshii naayéé' nilíinii yaa deidii'aah.

¹⁴Éí Dibé Yázhí nilíinii yich'į' anaa' ádahodoolííł, nidi Dibé Yázhí nilíinii áádóó bíká ádahodoo'niidii áádóó bitah dahaasdláa'ii índa bada'ahódlíii bił naakaigo bik'eh dadidoodleeł, háálá Dibé Yázhí nilíinii éí bídahólníihii bee Bóhólníihii nilį́, áádóó aláahgo naat'áanii danilíinii yiNanit'a'í nilį́.

¹⁵Áádóó diyingo naal'a'í ánááshidoo'niid, Tooh yiniłtsánígíí, ałjiłnii yikáá' dah sidáhígíí, éí nihokáá' dine'é danilíinii áádóó diné t'óó ahayóí dayíl'áii áádóó ał'ąą dine'é bił dah nidahaz'áanii índa bizaad ał'ąą ádaat'éii éí ádaat'é.

¹⁶Adee' neeznáá yiniłtsánígíí éí naaldlooshii naayéé' nilíinii yił, ałjiłnii deijoołáa doo, éí doo ajílį́į́góó índa t'áá jilchí'ígo ádahodoolíiłgo hatsį' deidoolghał índa adahodidoołk'ą́ą́ł.

¹⁷Háálá Diyin God bizaad ałtso bohoolyaajį' Diyin God íinízinii bidazh'doolííł biniyé t'ááłá'í bee nitsídadzikees dadzizlį́į'go, bee hódahólníhígíí naaldlooshii naayéé' nilíinii baa dazhdidoo'áałgo, Diyin God hwiih yiyiizla'.

¹⁸Asdzání yiniłtsánígíí éí ayóó át'éego kin haal'áii, éí nahasdzáán bikáá'góó aláahgo naat'áanii danilíinii yinant'áii át'į́.