Read Navajo REVELATION 18 Bible Online

REVELATION 18 - Navajo bible

REVELATION 18

¹Kódzaadóó bik'ijį' náánáła' diyingo naal'a'í ayóó át'éego bóhólníihgo, yá'ąąshdę́ę́' hadah hooleełgo yiiłtsą́. Bee bits'ádi'nílíidii nahasdzáán bikáa'gi bee hoos'įįd.

²Áko kóníigo ayóó íits'a'go hadoolghaazh, Bábilan, ayóó áhoot'éii ahiih náhwiiłdaas, ahiih náhwiiłdaas! Ákwii níłch'i bida'iiníziinii kéédahat'į́ silį́į́'; níłch'i danchxǫ́'ígíí ákwii ahanináhákááh índa nidaat'a'ii danchxǫ́'ógo doo daaldinii t'áá ałtso ákwii ahanináhákááh silį́į́'.

³Háálá wáin bee tsi'na'adáhígi át'éego ał'ąą dine'é bił dah nidahaz'áanii t'áá ałtso t'óó báhádzidgo na'ageh yee tsi'naagháii bił tsi'nidziskai. Áádóó nahasdzáán bikáá'góó aláahgo naat'áanii danilíinii hoł ahá nida'asgeh, índa jit'íinii t'óó bee nijinéego binahjį' nahasdzáán bikáá'góó diné baa nida'iiniihii da'at'į́ daazlį́į́'.

⁴Ákohgo yá'ąąshdę́ę́' náánáła' iinéé' kóníigo náádiséts'ą́ą́', Bibąąhági át'éii doo bił baa nidaahkai da doo biniyé, índa bee bich'į' naho'diilnáanii doo bił ałts'ą́ą́' da'nołk'iiz da doo biniyé bits'ą́ąjį' ch'íhóhkááh, shidine'é!

⁵Háálá bibąąhági át'éii yá'ąąsh bíneel'ą́ silį́į́', áádóó Diyin God éí doo ákǫ́ǫ́ ájíít'įįdígíí yénáálnii'.

⁶T'áá ájíít'įįdígíí bik'ehgo áádóó ahą́ą́h nániidlá bik'ehgo k'éédahodohdlééh. Bee adlání bii' ałtah azníziidii naakidi ákónánéilt'e'go há ałtah nánóhdzííd.

⁷Ádaa hoji'niih áádóó jit'íinii t'óó bee nijizne'ígíí t'áá éigi áníłtsogo atíńdahohdlééh áádóó atíńdizhnidleehgo ádahohłééh. Háálá t'áá hayi'ídi kójíní, Asdzą́ą́ naat'ááh nishłį́įgo dah sédá! Doo bąąh áhásdįįdii nishłį́į da, atínáhodinidleeh éí ts'ídá doo yideestséeł da!

⁸Éí bąą bee hach'į' nahodiyoolnaałii ła'a jį́ hak'i hwiidooleeł, éí aniné, atínáhodinidleeh, índa hodichin, áádóó kǫ' bee ahodi'doolk'ą́ą́ł, háálá Bóhólníihii Diyin God hainít'íinii ayóó ábóodziilii nilį́.

⁹Áko nahasdzáán bikáá'góó aláahgo naat'áanii danilíinii bił ahá nida'dzisgeh áádóó bił t'óó ádee nidadzis'ne'ígíí éí jidook'ą́ąłgo halid dayiiłtsą́ągo, haa atíńdadinidleeh índa ák'idadiit'aah doo.

¹⁰Éí bee atího'diilyaaígíí yéédaaldzidgo ayóó ánízáádę́ę́' naazį́įgo kódaaní, Héi'! Héi'! Bábilan ayóó át'éego kin haal'á nílíinii! T'ááłáhídi ahéé'ílkidjį' atíńdiilyaa!

¹¹Nahasdzáán bikáá'góó baa nida'iiniihii doo ła'da baa na'iiłniih da silį́į'go biniinaa t'óó haa daachxa áádóó haa atíńdadinidleeh;

¹²doo ła'da óola nayiiłniihí da, béésh łigaii, tsé da'ílíinii áádóó diichiłída, áłts'óózígo yisdizígíí bee na'at'ą́hí łigaii dits'idgo ályaii, naak'ą' tsídídééh nahalinígíida, na'at'ą́hí da'dijihígíí áádóó naak'ą' ałchxíi'da, tsin łikání halchinii áádóó áívori bee ádaalyaii, tsin da'ílíinii, béésh łitsoiida, béésh índa tsé nitł'iz nizhóníii bee ádaalyaii t'áá ałtso,

¹³sínaman, spáis, tsin bijeeh dilidgo łikání dahalchinii, tłah ílíinii, tsin bijeeh łikání halchinii fránkinsens wolyéii, wáin, ak'ah ílíinii, ak'áán dibahí áádóó tł'oh naadą́ą'da, béégashii áádóó dibéda, łį́į́' áádóó tsinaabąąs bijáád naakiígíí, índa naalte' danilíinii, azhą́ diné bii' sizíinii nidi doo ła'da nayiiłniihí da.

¹⁴Nídant'į́įhii éí nii' sizíinii t'áá íiyisí bił bidááhání yę́ę nits'ą́ąjį' silį́į́', áádóó ch'iyáán ałtaanáskąądí índa bee nił yá'áhoot'éehgo dah yílééł yę́ę doo shónéidííłt'eełgóó nits'ą́ąjį' silį́į́'!

¹⁵Díí naalyéhé baa nidahaniihii hats'ą́ą́dóó da'ast'įįdii, bee atího'diilyaaígíí yéédaaldzidgo, ayóó ánízáádę́ę́' naazį́įgo ayóó íits'a'go daachxa áádóó atíńdadinidleeh doo,

¹⁶kódaaníigo, Héi'! Héi'! Ayóó át'éego kin haal'áii jílį́į́ nít'éé' yę́ę áłts'óózígo yisdizígíí bee na'at'ą́hí łigaii dits'idgo ályaii, naak'ą' tsídídééh nahalingo índa naak'ą' ałchxíí' bee hazhdít'éii yę́ę, óola, tsé da'ílíinii, índa diichiłí bee nijishch'ąą' yę́ę!

¹⁷Éí jit'ínígíí t'áá ałtso t'ááłáhídi ahéé'ílkidjį' t'áá ádzaaí silį́į́'! Áádóó bik'ehgo nida'a'eełii áádóó nida'ał'eełii binaanish danilíinii, naalnishí danilį́įgo bił nida'a'eełii índa táłkáá'góó na'iini' yaa nidaakaii, díí t'áá ałtso nízaadę́ę́' naazį́įgo

¹⁸jidook'ą́ąłgo halid dayiiłtsą́ągo, kódaaníigo hadadeeshghaazh, Ha'át'íí kin haal'áá shį́įshą' hógi át'éego ayóó át'éego kin haal'áhígíí yił aheełt'éé nít'éé'?

¹⁹Bitsii' łeezh yik'ídayiighaasgo daachxa índa atíńdadinidleeh; kódaaníigo hadadeeshghaazh, Héi'! Héi'! Ayóó át'éego kin haal'áii jílį́į́ nít'éé' yę́ę ákwii táłkáa'di tsinaa'eeł neisnilii t'áá ałtso jit'ínígíí yee da'ast'įįdii! Éí t'ááłáhídi ahéé'ílkidjį' t'áá ádzaaí dzizlį́į́'!

²⁰Yá'ąąshii nílíinii, Diyin God bidiyį́į́' danohłíinii, daal'aadii danohłíinii índa Diyin God bá dahołne'ii baa nihił dahózhǫ́ǫ le'! Háálá Diyin God nihá hainíst'įįdgo há nihoní'ą́!

²¹Nít'éé' diyingo naal'a'í ayóó ábóodziilii tsé bee ak'áhí ayóó áníłtsoígíí nahalingo tsé léi' néidii'ą́ągo kóníigo tónteel biyi' góne' yee adzííłne', Kót'éego Bábilan ayóó át'éego kin haal'áii jílíinii t'áá na'níle'dii nikíhodidooltsxis, áádóó ts'ídá doo hwénáhodoodzįįł da.

²²Tsin bee nida'a'néii, sin yee nidaanéii, bee í'dílzoołí yee nidaanéii, índa béésh dilní bee í'dílzoołí yee nidaanéii nidaanéego nitahgi ts'ídá doo náádidoots'į́įł da; t'áadoo le'é dayiichįįhgo ádeił'íinii nitahgi ts'ídá doo néidooltséeł da; tsé bee ak'áhí ak'áago nitahgi ts'ídá doo náádidoots'į́įł da!

²³Bee hool'iní diltłi'ii nitahgi ts'ídá doo náádi'níłdíin da doo; iiyehii índa bá'iigehii biinéé' nitahgi ts'ídá doo náádidoots'į́įł da. Jó, ná nida'iiłniihii nahasdzáán bikáá'dóó diné ayóó ádaat'éii danilį́į́ nít'éé', áádóó nina'adlo'go álílee bee nahółáá nít'éé' yę́ę bee ał'ąą dine'é bił dah nidahaz'áanii t'áá ałtso bida'deesdlo'.

²⁴Diyin God yá dahalne'ii áádóó Diyin God bidiyį́į́' índa nahasdzáán bikáa'gi t'áá ałtso nidaaztseedígíí bidił éí kin haal'áagi bééhoozin.